ខេត្តប៉ៃលិន ៖ បុរសម្នាក់ត្រូវបានគេស្គាល់ថា ជាកូនរបស់អតីតអនុប្រធានមន្ទីរពាណិជ្ជកម្មខេត្តប៉ៃលិន និងជាអ្នកមានស្តុកស្តម្ភនៅក្នុងក្រុងប៉ៃលិនជាម្ចាស់ស្តង់ពោត ដំឡូងមី (ស្តង់តាអឿង) បានបើកបររថយន្តក្នុងល្បឿនលឿន បង្កគ្រោះថ្នាក់ចរាចរណ៍ដោយវ៉ាជែងទៅបុ.កម៉ូតូ២គ្រឿង ដែលបើកច្រាសទិសគ្នា…
ខេត្តប៉ៃលិន ៖ បុរសម្នាក់ត្រូវបានគេស្គាល់ថា ជាកូនរបស់អតីតអនុប្រធានមន្ទីរពាណិជ្ជកម្មខេត្តប៉ៃលិន និងជាអ្នកមានស្តុកស្តម្ភនៅក្នុងក្រុងប៉ៃលិនជាម្ចាស់ស្តង់ពោត ដំឡូងមី (ស្តង់តាអឿង) បានបើកបររថយន្តក្នុងល្បឿនលឿន បង្កគ្រោះថ្នាក់ចរាចរណ៍ដោយវ៉ាជែងទៅបុ.កម៉ូតូ២គ្រឿង ដែលបើកច្រាសទិសគ្នា បណ្តាលឱ្យយុវជនពីរនាក់រងរបួសធ្ងន់ស្រាល ត្រូវបានក្រុមគ្រួសារ ដឹកបញ្ជូនទៅព្យាបាលនៅមន្ទីរពេទ្យបង្អែកខេត្តប៉ៃលិន។ រហូតមកដល់ថ្ងៃទី២០ ខែមេសា ឆ្នាំ២០២២នេះ ជនរងគ្រោះទាំងពីរនាក់ បានចេញពីមន្ទីរពេទ្យបង្អែកខេត្តប៉ៃលិនហើយ រីឯរថយន្តបង្កត្រូវបាននគរបាលយកទៅរក្សាទុកនៅស្នងការនគរបាលខេត្តប៉ៃលិន រង់ចាំការដោះស្រាយ។
សូមបញ្ជាក់ថា ៖ ហេតុការណ៍នេះបានកើតឡើងកាលពីវេលាម៉ោង ៥និង ៥៥នាទី នៅថ្ងៃទី១៧ ខែមេសា ឆ្នាំ២០២២ ស្ថិតក្នុងភូមិអូរពឺត សង្កាត់ទទួលល្វា ក្រុងប៉ៃលិន ខេត្តប៉ៃលិន។ បើតាមប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា ៖ បុរសបើកបររថយន្ត មានឈ្មោះ សារ ឈុនវង្សវឌ្ឍនៈ ភេទប្រុស អាយុ៣១ឆ្នាំ ជាកូនអ្នកមានម្នាក់ឈ្មោះ សា ចំរើន ហៅតាអឿង ជាអតីតអនុប្រធានមន្ទីរពាណិជ្ជកម្មខេត្តប៉ៃលិន រស់នៅភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន គ្មានរបួស ដោយបើកបររថយន្តម៉ាកតូយ៉ូតារ៉េវ៉ូ (TOYOTA REVO) ពណ៌ស ពាក់ស្លាកលេខ ប៉ៃលិន2B-2168 រងការបែកចំហៀងខាងឆ្វេង។ ចំណែកយុវជនរងគ្រោះទី១. ឈ្មោះ ប៊ុន ផែន ភេទ អាយុ១៧ឆ្នាំ រស់នៅភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ជនរងគ្រោះទី២. ឈ្មោ សឹម ថានិត ភេទប្រុស អាយុ១៥ឆ្នាំ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។
ប្រភពបន្តទៀតថា គេឃើញបុរសកូនអ្នកមានខាងលើ បានបើកបររថយន្តដឹកមិត្តភក្តិក្នុងទិសដៅពីកើតទៅលិចសង្ស័យចេញពីផឹកស៊ី ដោយបើកបររថយន្តកណ្តាលក្រុង ល្បឿនយ៉ាងលឿន ហើយក៏វ៉ាជែងរថយន្តដទៃទៀត ដែលកំពុងតែបើកបរស្របទិសគ្នា ក៏ជ្រុលចង្កូតទៅបុកនឹងម៉ូតូយុវជនរងគ្រោះទាំងពីរគ្រឿងយ៉ាងពេញទំហឹង បណ្តាលឱ្យដួលប្រាវទៅលើគម្របលូតែម្តង ក្បែរកន្លែងលក់ម្ឈូស ស្របពេលដែលម៉ូតូ និងរថយន្តប្រជាពលរដ្ឋកំពុងបើកបរដើរលេងលើដងផ្លូវយ៉ាងមមារញឹក។
ប្រភពបញ្ជាក់ទៀតថា ក្រោយពីធ្វើការវាស់វែងកម្លាំងនគរបាលជំនាញ បានយកវត្ថុតាងទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយ ដោយជនបង្កបង់សងថ្លៃការខូចខាតទៅលើជនរងគ្រោះបន្តិចបន្តួចហើយក៏រួចខ្លួនតែម្តង។ ប្រជាពលរដ្ឋធ្វើការរិះគន់ទៅលើជនបង្កយ៉ាងចាស់ដៃថា ៖ រូបគេធ្លាប់បើកបររថយន្តក្នុងក្រុងប៉ៃលិនដូចបើកប្រណាំង មិនខ្លាចញញើតនឹងច្បាប់អ្វីនោះឡើយ ដោយអាងតែបុ.កបង់លុយ ហើយរួចខ្លួន ក៏ធ្លាប់មានអ្នកមិនចូលចិត្តជាច្រើន ហើយថែមទាំងភ័យបារម្ភទៅប៉ះពារអ្នករួមដំណើរតាមដងផ្លូវជាមួយផងដែរ។
ម្យ៉ាងវិញទៀត បុរសខាងលើ តែងតែបើកបររថយន្តបង្កគ្រោះថ្នាក់ចរាចរណ៍តាមដងផ្លូវជាញឹកញយមកហើយ ដោយអាងតែខ្លួនជាកូនអ្នកមានជាងគេ ក្នុងក្រុងប៉ៃលិន ពោលគឺមានលុយកាក់ច្រើន បង់លុយរួចក៏បញ្ចប់បញ្ហាយ៉ាងរលូន ដែលធ្វើឱ្យប្រជាពលរដ្ឋរស់នៅក្នុងក្រុងប៉ៃលិនបារម្ភពីសុវត្ថិភាពយ៉ាងខ្លាំង ខណ:ពេលដែលបើកបរក្បែរបុរសខាងលើម្តងៗ ហើយក៏ធ្លាប់បើកទៅបុកដើមឈើក្បែររង្វល់មូលសាលាក្រៅ បណ្តាលឱ្យខ្ទេចរថយន្តម្តងរួចទៅហើយ ក៏ធ្លាប់បង្កគ្រោះថ្នាក់ចរាចរណ៍ប៉ះអ្នកធ្វើដំណើរតាមដងផ្លូវ រួចរត់គេចខ្លួនមួយរយ: ទើបតែត្រឡប់មកវិញ ក៏បង្កគ្រោះថ្នាក់ម្តងទៀត ៕
ចែករំលែកព័តមាននេះ