ខេត្តកំពង់ចាម ៖ អាជ្ញាធរខេត្តបានកែលម្អមាត់ទន្លេក្រុងកំពង់ចាមដោយធ្វើសួនច្បារយ៉ាងល្អប្រណីតនិងបំពាក់អំពូលភ្លើងចម្រុះពណ៌ឲ្យកាន់តែមានភាពស្រស់ស្អាតឡើងនៅពេលរាត្រី ។
ខេត្តកំពង់ចាម ៖ អាជ្ញាធរខេត្តបានកែលម្អមាត់ទន្លេក្រុងកំពង់ចាមដោយធ្វើសួនច្បារយ៉ាងល្អប្រណីតនិងបំពាក់អំពូលភ្លើងចម្រុះពណ៌ឲ្យកាន់តែមានភាពស្រស់ស្អាតឡើងនៅពេលរាត្រី ។
បុរសឈ្មោះភិន ស្រ៊ាង អាយុ៣៣ឆ្នាំ រស់នៅភូមិបឹងបាសាក់ សង្កាត់សំបួរមាស ក្រុងកំពង់ចាមកាលពីរាត្រីថ្ងៃទី២៨ កញ្ញា ២០១៦និយាយថា នៅពេលរូបលោកជិះម៉ូតូចេញពីផ្ទះ ជាមួយប្រពន្ធ និងកូនឃើញទេសភាពស្រស់ស្អាតនៃសួនច្បារមាត់ទន្លេត្រង់មុខខណ្ឌរដ្ឋបាលជលផលខេត្តកំពង់ចាមក៏ចូលអង្គុយលេងស្រូបយកខ្យល់អាកាស ។
លោកអាន ស៊ិនឡុង អាយុ៥២ឆ្នាំ នៅភូមិបឹងកុកទី២ សង្កាត់បឹងកុក ក្រុងកំពង់ចាមឲ្យដឹងថា ក្រោយឆ្នាំ១៩៧៩ មាត់ទន្លេក្រុងកំពង់ចាមជាកំពង់ផែកាណូតដឹកអ្នកដំណើរ (កំពង់ចាម-ភ្នំពេញ-ក្រចេះ-ស្ទឹងត្រែង) ។ រយៈពេលជាច្រើនឆ្នាំក្រោយមកថ្នាក់ដឹកនាំខេត្តបានកែលម្អ បន្តិចម្តងៗ ហើយចុងក្រោយនេះក្រោមការដឹកនាំរបស់លោកលន់ លឹមថៃ អភិបាលខេត្ត បានធ្វើសួនច្បារតាមដងទន្លេមេគង្គរចនាម៉ូដយ៉ាងស្រស់ស្អាត ព្រមទាំងបំពាក់អំពូលភ្លើងចម្រុះពណ៌ ។ «កន្លងមកនៅពេលដែលខ្ញុំចេញទៅសិក្សានៅបរទេស បើប្រៀបធៀបជាមួយនឹងទេសភាពមាត់ទន្លេក្រុងកំពង់ចាម គឺមិនចាញ់គេទេ ។ ឃើញស្អាតបែបនេះ ទើបនាំប្រពន្ធកូនមកអង្គុយលេងស្រូបយកខ្យល់អាកាសបរិសុទ្ធធម្មជាតិ » ។
អ្នកស្រីសយ វាសនា អាយុ៤៥ឆ្នាំ រស់នៅខេត្តព្រះសីហនុ ដែលនាំ កូនៗទៅលេងសួនច្បារមាត់ទន្លេក្រុងកំពង់ចាមឲ្យដឹងថា បណ្តាឆ្នាំកន្លងទៅ ពេលគាត់ទៅស្រុកកំណើត ហើយដើរលេងតាមមាត់ទន្លេក្រុងកំពង់ចាមមិនដែលបានឃើញកសាងអ្វីស្អាតគួរឲ្យចាប់អារម្មណ៍ទេ តែក្នុងឆ្នាំ២០១៦នេះ ឃើញសួនច្បារស្រស់ស្អាតតាមដងទន្លេធ្វើឱ្យគាត់រំភើបចិត្ត ។
ចំណែកលោកចាន់ ផល្លី អភិបាលក្រុងកំពង់ចាមលើកឡើងថា ក្រុងកំពង់ចាមកែលម្អតាំងពីជំនាន់លោកហ៊ុន ណេង ជាអភិបាលខេត្តដោយសាងសង់សួនច្បារជា បណ្តើរៗ។ គិតរហូតដល់ជំនាន់ដល់លោកលន់ លឹមថៃ ជាអភិបាលខេត្តនាពេលបច្ចុប្បន្នសរុបសួនច្បារទាំងអស់មាន៥៨ ។ ចាប់ពីត្រង់ចំណុចរង្វង់មូលក្បាលស្ពានគីហ៊្សុណា ដល់កន្លែងប្រារព្ធពិធីបុណ្យអុំទូក សួនច្បារតាមមាត់ទន្លេចាប់ពីត្រង់ចំណុចត្រីដល់ក្រោមស្ពានបានកែលម្អធ្វើសួនច្បារស្អាត។ មាត់ទន្លេត្រូវបានចាក់បេតុងឲ្យរឹងមាំល្អដើម្បីចៀសវាងការបាក់ច្រាំង ក្រោមការឧបត្ថម្ភពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
អ្នកកំពង់ចាមខ្លះដែលចាកចេញពីមាតុភូមិទៅរស់នៅបរទេស ពេលត្រឡប់មកលេងស្រុកកំណើតវិញ ឃើញក្រុងកំពង់ចាមមានសោភ័ណភាពស្រស់ស្អាតតែងតែលាន់មាត់សរសើរ ។ នោះជាកិច្ចខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ ៕
ចែករំលែកព័តមាននេះ