ខេត្តព្រះសីហនុ៖ រដ្ឋបាលខេត្តព្រះសីហនុ នឹងរៀបចំពិធីបដិមាភិសេក ព្រះថោងនាងនាគ ក្រោមអធិបតីភាពដ៏ខ្ពង់ខ្ពស់សម្តេចតេជោ នាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន នៅថ្ងៃសៅរ៍ ទី១៦ ខែមេសា ឆ្នាំ២០២២។
ក្នុងសេចក្តីជូនដំណឹង រដ្ឋបាលខេត្តព្រះសីហនុ លើកឡើងថា ដើម្បីឱ្យកម្មវិធីបដិមាភិសេក ព្រះថោងនាងនាគ ប្រព្រឹត្តិទៅដោយរលូន មានសន្តិសុខ សុវត្ថិភាព និងរក្សាបានសណ្តាប់ធ្នាប់សាធារណៈល្អប្រសើរ រដ្ឋបាលខេត្តព្រះសីហនុ នឹងផ្អាកការធ្វើចរាចរណ៍យានជំនិះគ្រប់ប្រភេទជាបណ្តោះអាសន្ន ចាប់ពីម៉ោង ៣ទៀបភ្លឺ នៅថ្ងៃទី១៦ ខែមេសា ឆ្នាំ២០២២ រហូតដល់ចប់កម្មវិធី នៅតាមមហាវិថីមួយចំនួន ដូចខាងក្រោម៖ ១-មហាវិថីជំទាវម៉ៅ ចាប់ពីចំណុចផ្លូវបំបែកស្លាកខ្មែរធ្វើបាន រហូតដល់រង្វង់មូលព្រះថោងនាងនាគ។ ២-មហាវិថីជំទាវម៉ៅ ចាប់ពីផ្លូវបំបែកផ្លូវជាិតលេខ៤ រហូតដល់រង្វង់មូលព្រះថោងនាងនាគ។ ៣-មហាវិថីឆ្នេររាម ចាប់បីរង្វង់មូលព្រះឧមា-មហេសូរ រហូតដល់រង្វង់មូលព្រះថោងនាងនាគ។
រដ្ឋបាលខេត្តព្រះសីហនុ អំពាវនាវសូមបងប្អូនប្រជាពលរដ្ឋ និងសាធារណជន មេត្តាជ្រាប និងយោគយល់អធ្យាស្រ័យ ចំពោះការបញ្ចៀសការធ្វើដំណើរឆ្លងកាត់តាមទីតាំងខាងលើ នៅថ្ងៃទី១៦ ខែមេសា។ ផុតពេលហាមឃាត់បណ្តោះអាសន្ននេះ រដ្ឋបាលខេត្ត នឹងបើកឱ្យធ្វើចរាចរណ៍ជាធម្មតាឡើងវិញ៕
ចែករំលែកព័តមាននេះ