គោលដៅនៃកម្មវិធីនេះរួមមាន ៖ បង្កើនប្រសិទ្ធភាពនៃការធ្វើការងារជាក្រុម បង្កើនសិល្បៈនៃការធ្វើទំនាក់ទំនង វិធីសាស្ត្រនៃការលើកទឹកចិត្តក្រុមការងារ ជារួមគឺពង្រឹងភាពជាអ្នកដឹកនាំរបស់លោកគ្រូ អ្នកគ្រូ និងសិស្សានុសិស្ស។ ដោយឡែកសិល្បៈស្គរនេះ ក៏នឹងចូលរួមយ៉ាងខ្លាំងដល់ការបង្កើតឲ្យមានសិល្បៈ សាមគ្គី និងស្នាមញញឹមបន្ថែមនៅក្នុងសាលា។
នេះជាលើកទី១ ដែលសិស្សានុសិស្សនៅជនបទនៅខេត្តកំពង់ចាម មានឱកាសស្វែងយល់ពីអ្វីដែលហៅថា ភាពជាអ្នកដឹកនាំ និងសិល្បៈស្គរពីលោក Roy Lai និងលោក Syed Ibrahim ។ លោក Roy Lai ជាអ្នកជំនាញបណ្តុះបណ្តាលភាពជាអ្នកដឹកនាំ ជាគ្រូបង្វឹក និងជាវាគ្មិនសិង្ហបុរីដ៏ល្បីល្បាញមួយរូបដែលមានបទពិសោធន៍ជិត២០ឆ្នាំ ឬឯលោក Syed Ibrahim ជាគ្រូជំនាញផ្នែកសិល្បៈស្គរ ដែលមានបទពិសោធន៍ដឹកនាំផ្នែកតន្រី្ត៣០ឆ្នាំ។
ជាការពិត ! វគ្គបណ្តុះបណ្តល ភាពជាអ្នកដឹកនាំ ត្រូវបានគេគិតថា គឺសំរាប់តែអ្នកដែលត្រូវបានគេទទួលស្គាល់ និងតែងតាំងឲ្យធ្វើជាមេក្រុម អ្នកបង្គាប់បញ្ជា អ្នកសម្រេចចិត្ត អ្នកផ្តល់គំនិតយោបល់ ឬចាត់ចែងការងាររបស់ក្រុម អង្គការ សហគមន៍ ប្រទេស ។ល។ ប៉ុន្តែទាំងនេះត្រូវបានលោក Roy Lai បដិសេធ។ លោកនិយាយថា ភាពជាអ្នកដឹកនាំគឺជាជំនាញទន់ដែលដែលមនុស្សគ្រប់រូបគប្បីត្រូវមាន ឬបណ្តុះតាំងតែពីវ័យក្មេង ហើយនេះជាអ្វីដែលប្រព័ន្ធអប់រំនៅប្រទេសសិង្ហបុរីកំពុងអនុវត្ត។
កម្មវិធីបណ្តុះបណ្តាលទាំង២ មានរយៈពេល៣ថ្ងៃ ចាប់ពីថ្ងៃទី៨ ដល់ទី១០ ខែកញ្ញា ២០១៦ ដោយមានការសហការរៀបចំដោយសមាគមអតីតសិស្សអូរដា ដែលមានលោក ឃឹម ប៊ុនឡែន ជាប្រធាន ជាមួយនឹងអង្គការ Choice Family Singapore មានលោក Ashok Kurma ជាប្រធាន។ លើសពីការផ្តល់នូវជំនាញភាពជាអ្នកដឹកនាំ និងសិល្បៈប្រគំតន្ត្រីស្គ លោក Syed Ibrahim ក៏បានឧបត្ថម្ភឧបករណ៍ស្គរមួយឈុតធំយ៉ាងថ្មីស្រឡាង ដែលគិតជាទឹកប្រាក់ជាង៤ពាន់ដុល្លារ សំរាប់ជាកាប្រើប្រាស់ និងសម្តែងជាប្រចាំដល់សិស្សានុសិស្ស លោកគ្រូ អ្នកគ្រូ នៃវិទ្យាល័យ ន.រណបទ្ធិ-គន្ធបុប្ផា និងវិទ្យាល័យហ៊ុនសែនព្រៃទទឹងផងដែរ ។
ចំណែកលោក ឃឹម ប៊ុនឡែន ប្រធានក្រុមអតីតសិស្សសាលាអូរដាបានលើកឡើងថា កាលដែលអង្គការ Choice Family Singapore ជ្រើសរើសសាលាទាំងពីរ ក្នុងការផ្តល់ជូនវគ្គបណ្តុះបណ្តាលនេះ គឺដោយសារសកម្មភាពកន្លងមករបស់ក្រុមអតីតសិស្សរបស់លោក ដែលបានប្រឹងប្រែងអស់ពីកំលាំងកាយចិត្តក្នុងការវិលត្រឡប់ទៅជួយសាលា ស្ថិតនៅក្នុងស្រុកកំណើតផ្ទាល់ ដោយបានបង្កើតឱ្យមាននូវបណ្តាល័យ បន្ទប់កុំព្យូទ័រ និងការដាំដើមឈើជាដើម។ ជាពិសេសទៅទៀតនោះ អង្គការបានឃើញនូវសក្តានុពលរបស់សិស្សដែលចេះជួយខ្លួនឯងក្នុងការខិតខំរៀនសូត្រ ព្រមទាំងមានក្តីសុបិន្ត ។
លោក ឃឹម ប៊ុនឡែនបន្តថា «ខ្ញុំមានក្តីសុបិន្តថា ក្នុងរយៈពេល៥ទៅ១០ឆ្នាំទៀត ប្អូនៗដែលទទួលបានការបណ្តុះបណ្តាលនៅថ្ងៃនេះ នឹងត្រលប់មកសាលាវិញ ហើយដឹកនាំការងារអភិវឌ្ឍធនធានមនុស្សបន្តទៀត។ ចលនានេះ គឺជាការចួលរួមចំណែកជាមួយលោកគ្រូ អ្នកគ្រូ ដើម្បីបង្កើតឲ្យមានការអភិវឌ្ឍ និងមិត្តភាពប្រកបដោយនិរន្តរភាពកាន់តែប្រសើរនៅស្រុកកំណើតរបស់យើង»។
គួរជំរាបជូនថា ក្រុមអតីតសិស្សអូរដា បង្កើតឡើងដោយអតីតសិស្សដែលធ្លាប់រៀនសូត្រនៅសាលានេះ ជាមួយនឹងគោលបំណងចូលរួមអភិវឌ្ឍន៍ធនធានមនុស្សនៅក្នុងសាលា និងស្រុកកំណើត។
ចែករំលែកព័តមាននេះ