ស្រុកព្រៃនប់ ៖ មន្ត្រីអ្នកនាំពាក្យសាលាខេត្តព្រះសីហនុបានឱ្យដឹងនៅព្រឹកថ្ងៃទី០៥ មេសា នេះ ថា ការដាក់តម្លើងរូបសំណាកបដិមា«ព្រះថោងនាងនាគ»នៅទីតាំងរង្វង់មូលចំណុចប្រសព្វ រវាងមហាវិថីជំទាវម៉ៅ និងមហាវិថីឆ្នេររាមនោះ គិតត្រឹមម៉ោងជាង១១ព្រឹក…
ស្រុកព្រៃនប់ ៖ មន្ត្រីអ្នកនាំពាក្យសាលាខេត្តព្រះសីហនុបានឱ្យដឹងនៅព្រឹកថ្ងៃទី០៥ មេសា នេះ ថា ការដាក់តម្លើងរូបសំណាកបដិមា«ព្រះថោងនាងនាគ»នៅទីតាំងរង្វង់មូលចំណុចប្រសព្វ រវាងមហាវិថីជំទាវម៉ៅ និងមហាវិថីឆ្នេររាមនោះ គិតត្រឹមម៉ោងជាង១១ព្រឹក គឺនៅមិនទាន់បានដំឡើងរួចនៅឡើយទេ ។
ប្រភពខាងលើឱ្យដឹងថា ការយឺតយ៉ាវនេះ គឺដោយសារដាក់លរជើងមិនទាន់ត្រូវគ្នា ។ ប៉ុន្តែគេរំពឹងថា នឹងហើយជាស្ថាពរនៅម៉ោងជិត១២ថ្ងៃដដែលនេះ ដោយនៅមានការកែសម្រួលជើងលរបន្តិច ទើបដំឡើងលើកដាក់ជាផ្លូវការតែម្តង ។
សូមរំលឹកថា ៖ រូបសំណាកបដិមាព្រះថោងនាងនាគ (ព្រះថោងតោងស្បៃ) ដែលកំពុងល្បីល្បាញក្នុងខេត្តព្រះសីហនុ គ្រោងនឹងលើកតម្កល់ឡើងលើបល្ល័ង្គ ជាមួយនិងការរៀបចំតុបតែលម្អតាមគំរូប្លង់នៅរង្វង់មូលព្រះថោងនាងនាគចំណុចប្រសព្វរវាងមហាវិថីជំទាវម៉ៅ និងមហាវិថីឆ្នេររាម ក្នុងភូមិគគីរ ឃុំបិតត្រាង ស្រុកព្រៃនប់ព្រះសីហនុ នេះបើតាមការបញ្ជាក់ពីមន្ត្រីរដ្ឋបាលខេត្ត ។
បើទោះជាពុំទាន់តម្លើងជាផ្លូវការ ប៉ុន្តែរូបបដិមា (ព្រះថោងតោងស្បៃ) នេះ កំពុងល្បីល្បាញ ទទួលបានការនិយមចូលចិត្តពីមហាជនប្រជាពលរដ្ឋ ក្នុងនោះ ឯកឧត្តមគួច ចំរើន អភិបាលខេត្តបានអញ្ជើញចុះទៅពិនិត្យជាបន្តបន្ទាប់ ដើម្បីជំរុញសកម្មភាពតម្លើងរូបសំណាកបដិមា «ព្រះថោងនាងនាគ» បានឆាប់រួចរាល់ ពិសេសដើម្បីឲ្យពលរដ្ឋ អ្នកទេសចរណ៍ដែលមកលេងកម្សាន្តខេត្តព្រះសីហនុ ថ្ងៃបុណ្យចូលឆ្នាំថ្មីប្រពៃណីជាតិបានទស្សនា សមិទ្ធិផលដ៏អស្ចារ្យនេះ។
សុំបញ្ជាក់ថា រូបសំណាកបដិមាព្រះថោងនាងនាគសាងសង់ពីស្ពាន់មានទម្ងន់៦០តោន មានកម្ពស់២១ម៉ែត្រ ចាប់ពីព្រះបាទរហូតដល់ម្កុដ នឹងដាក់តាំងតម្កល់លើបល្ល័ង្គកម្ពស់៦,៣៤ម៉ែត្រ មានអង្កត់ផ្ចិត៩៩ម៉ែត្រ ដោយដាក់តាំងបែរព្រះភក្ត្រ ឆ្ពោះទៅសមុទ្ររាម តាមទម្រង់ «ព្រះថោងតោងស្បៃ» ទ្រង់ដំណើរយាងទៅជួបព្រះមាតាបិតានៅឋានភុជង្គនាគ ជានិម្មិតរូបនៃការកកើតទឹកដីវប្បធម៌ អរិយធម៌ ប្រពៃណីទំនៀមទម្លាប់ខ្មែរ និងជារូបបដិមាធ្វើពីស្ពាន់ធំជាងគេនៅព្រះរាជាណាចក្រកម្ពុជា។
ព័ត៌មានលម្អិតនឹងមានផ្សាយជូនបន្ត ។
ចែករំលែកព័តមាននេះ