ខេត្តបាត់ដំបង៖ ឥទ្ធិពលភ្លៀងកក់ខែមួយមេនាដូវប្រាំង បានបង្កជាផ្គរ រន្ទះ និងខ្យល់កន្ត្រាក់យ៉ាងសាហាវគួរឲ្យខ្លាច ហើយរន្ទះបានបាញ់សម្លា.ប់អ្នកកង្វាលគោ០១នាក់ រីឯចំនួន០៣នាក់ទៀតរងរបួសនៅស្រុករុក្ខគិរី ខណៈលំនៅឋានប្រជាពលរដ្ឋចំនួន០៥ខ្នង បានរងការខូចខាតដោយសារខ្យល់កន្រ្តាក់ នៅស្រុករតនមណ្ឌល ដែលកើតឡើងស្ទើរតែដំណាលៗគ្នា កាលពីរសៀលថ្ងៃទី៣០ មីនា នៅក្នុងខេត្តបាត់ដំបង ។
តាមរបាយការណ៍សមត្ថកិច្ចបានឲ្យដឹងថា គ្រោះធម្មជាតិខាងលើនេះ បានកើតឡើងនៅពេលមានភ្លៀងធ្លាក់ដែលមានលាយឡំនឹងផ្គររន្ទះ និងខ្យល់កន្រ្តាក់បោកបក់យ៉ាងខ្លាំងក្លាផង ដែលប៉ះទង្គិចស្ទើរគ្រប់ទីកន្លែង តែនៅស្រុករុក្ខគិរី និងស្រុករតនមណ្ឌលរងគ្រោះធ្ងន់ធ្ងរជាងគេ រហូតដល់មានមនុស្សស្លា.ប់ និងរបួសដោយសាររន្ទះបា.ញ់ និងខ្យល់កន្រ្តាក់រលំផ្ទះ។
សេចក្ដីរាយការណ៍ពីស្រុករុក្ខគិរីបានឲ្យដឹងថា អ្នកគង្វាលគោចំនួន០៤នាក់ ដែលក្នុងចំណោមនោះមានប្រុស០១នាក់ត្រូវរន្ទះបា.ញ់ស្លា.ប់ម្នាក់នៅកន្លែងកើតហេតុ រីឯចំនួន០៣នាក់ទៀតដែលអង្គុយនៅក្បែរគ្នារងរបួសដល់សន្លប់។ ជនរងគ្រោះទាំង០៤នាក់មាន ១-ឈ្មោះ យ៉ុង អួយ ភេទស្រី អាយុ១៨ឆ្នាំ (ស្លា.ប់) ២-ឈ្មោះ សៅ ប៉ាង ភេទប្រុស អាយុ៤០ឆ្នាំ (រងរបួស) ៣-ឈ្មោះ សេង ស្រីម៉ុច ភេទស្រី អាយុ១៥ឆ្នាំ (រងរបួស) និង៤-ឈ្មោះ ហឿន រឿត ភេទស្រី អាយុ៤២ឆ្នាំ (រងរបួស) ។ ជនរងគ្រោះទាំង០៤នាក់ រស់នៅភូមិមុខរាហ៍ ឃុំមុខរាហ៍ ស្រុករុក្ខគិរី។
លោក ឆែម ឆើត នាយប៉ុស្ដិ៍រដ្ឋបាល ឃុំមុខរាហ៍បានប្រាប់ថា នៅក្នុងមូលដ្ឋានរបស់លោកមានភ្លៀងធ្លាក់លាយឡំផ្គររន្ទះយ៉ាងកក្រើកផង។ ប៉ុន្តែលោកបានបញ្ជាក់ថា នៅពេលមេឃរាំងភ្លៀងបន្តិច ស្រាប់តែពលរដ្ឋរាយការណ៍អំពីអ្នកភូមិ០៤នាក់ ត្រូវរន្ទះបាញ់ស្លាប់.និងរបួស ពេលកំពុងឃ្វាលគោនៅវាលស្រែ ។ បើតាមការសាកសួរព័ត៌មាននេះ ជនរងគ្រោះទាំង០៤នាក់ខាងលើនេះ ត្រូវរន្ទះបាញ់រហូតដល់ស្លាប់និងរបួស នៅពេលគាត់អង្គុយជុំគ្នានៅវាលស្រែកន្លែងឃ្វាលគោ ។ លោកម៉េប៉ុស្តិ៍ដ៏រូបនេះបានបញ្ជាក់ថា ក្មេងស្រីជំទង់ម្នាក់បានស្លា.ប់នៅនឹងកន្លែង រីឯចំនួន០៣នាក់ទៀតរងបួសរហូតដល់សន្លប់ ហើយត្រូវបានក្រុមគ្រួសារបញ្ជូនទៅកាន់មណ្ឌលសុខ
ភាពភ្លាមៗដែរ។
ដោយឡែក នៅឯស្រុករតនមណ្ឌលវិញ សេចក្ដីរាយការណ៍បន្តបន្ទាប់គ្នាបានឲ្យដឹងថា គ្រោះមហន្តរាយដែល
បង្កើតឡើងដោយខ្យល់កន្រ្តាក់ បានវាយប្រហារទៅលើភូមិសាស្រ្ត ក្នុងឃុំផ្លូវមាស បណ្ដាលឲ្យខូចខាតលំនៅឋានរបស់ប្រជាពលរដ្ឋអស់ចំនួន០៥ខ្នង។ បើតាមមន្រ្តីរដ្ឋបាលស្រុករតនមណ្ឌលបានឲ្យដឹងថា លំនៅឋានពលរដ្ឋចំនួន០១ខ្នងត្រូវខ្យល់កន្រ្តាក់វាយដូលរលំទាំងស្រុង នៅក្នុងភូមិទឹកសាប រីឯចំនួន០៤ទៀត របើកដំបូល ស្ថិតនៅភូមិអូរត្រែង។ ប៉ុន្តែសេចក្ដីរាយការណ៍មិនបានបញ្ជាក់អំពីគ្រោះថ្នាក់ដល់មនុស្ស ឬ ខូចខាតផលដំណាំនោះទេ។
ទោះយ៉ាងណា មន្រ្តីសាខាកាកបាទក្រហមខេត្តបានប្រាប់ថា ពេលនេះ អាជ្ញាធរខេត្ត និងសាខាកាកបាទក្រហមខេត្តបានសហការជាមួយអាជ្ញាធរមូលដ្ឋានចុះស្រង់របាយការណ៍នៅក្នុងមូលដ្ឋាន ដើម្បីផ្ដល់សង្រ្គោះបឋមដល់គ្រួសាររងគ្រោះទាំងនោះហើយ៕
ចែករំលែកព័តមាននេះ