ខេត្តព្រះសីហនុ​៖ ផ្លូវលេខ​១៤៦បេ ដែលតភ្ជាប់ពីផ្លូវជាតិលេខ៤ ត្រង់រង្វង់មូល​សម្ដេច​សង្ឃរាជ ទេព វង្ស ក្នុងស្រុកព្រៃនប់ ឆ្ពោះទៅកាន់ស្រុកស្ទឹងហាវ ​និង​​ទៅ​ភ្ជាប់​ដល់​កំពង់ផែក្រុងព្រះសីហនុ នឹងស្ថាបនារួចរាល់ជា​ស្ថាពរ ​​ក្នុងកំឡុងខែមេសាខាងមុខនេះ។

នៅពេលអញ្ជើញដឹកនាំមន្ដ្រី​ជំនាញ​ត្រួតពិនិត្យគុណភាពផ្លូវមួយខ្សែនេះ នារសៀលថ្ងៃទី២៨ ខែមីនា ឆ្នាំ២០២២ លោក​ទេសរដ្ឋមន្ត្រី ស៊ុន ចាន់ថុល បានឲ្យ​ដឹង​ថា ការស្ថាបនាផ្លូវ១៤៦បេ គឺមានគុណភាពល្អត្រឹមត្រូវតាមបច្ចេក​ទេស​ ដែលនឹងប្រើប្រាស់យូរអង្វែង ពិសេសគឺការធ្វើចរាចរណ៍រថយន្ត​ដឹក​ទំនិញ​ធំៗ ចេញចូលកំពង់ផែ ដើម្បីកាត់បន្ថយគ្រោះថ្នាក់ ឬ​កកស្ទះ​ចរាចរណ៍ ក្នុងក្រុងព្រះសីហនុ។

ផ្លូវលេខ១៤៦បេ សាងសង់ឡើង ក្រោមកញ្ចប់​ថវិកាសន្សំរបស់​ជាតិ។ ផ្លូវនេះ មានប្រវែងសរុប ៤៣,០២ គីឡូម៉ែត្រ ក្នុងនោះ ប្រវែង ២១គីឡូម៉ែត្រ ជាប្រភេទផ្លូវបេតុងកៅស៊ូ (AC) កម្រាស់ ៩សង់ទីម៉ែត្រ។ ចំណែកប្រវែង ២២គីឡូម៉ែត្រទៀត ជាប្រភេទ​ផ្លូវបេតុង កម្រាស់ ២៦​សង់ទីម៉ែត្រ និងទទឹងផ្លូវសរុបជារួម១២ ម៉ែត្រ៕