ខេត្តកំពង់ឆ្នាំង ៖ ក្រោយសម្តេចតេជោ ហ៊ុនសែន នាយករដ្ឋមន្ត្រីកម្ពុជាបានប្រកាសចេញបញ្ជាម៉ឺងម៉ាត់ដល់មន្ត្រីពាក់ព័ន្ធគ្រប់ជាន់ខ្ពស់ឱ្យចុះបង្ក្រាបបទល្មើសនេសាទនោះ ស្រាប់តែនៅព្រឹកថ្ងៃទី២៦ ខែមីនានេះ សមត្ថកិច្ចបានធ្វើការឃាត់ខ្លួនឈ្មួញទិញត្រីពីបទល្មើសឆក់ត្រជាក់ម្នាក់ នៅវេលាម៉ោង២ រសៀលនេះ…
ខេត្តកំពង់ឆ្នាំង ៖ ក្រោយសម្តេចតេជោ ហ៊ុនសែន នាយករដ្ឋមន្ត្រីកម្ពុជាបានប្រកាសចេញបញ្ជាម៉ឺងម៉ាត់ដល់មន្ត្រីពាក់ព័ន្ធគ្រប់ជាន់ខ្ពស់ឱ្យចុះបង្ក្រាបបទល្មើសនេសាទនោះ ស្រាប់តែនៅព្រឹកថ្ងៃទី២៦ ខែមីនានេះ សមត្ថកិច្ចបានធ្វើការឃាត់ខ្លួនឈ្មួញទិញត្រីពីបទល្មើសឆក់ត្រជាក់ម្នាក់ នៅវេលាម៉ោង២ រសៀលនេះ ។
សមត្ថកិច្ចចម្រុះ រួមមានអធិការដ្ឋាននគរបាលជលផលខាងត្បូងបឹងទន្លេសាប ខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទអាជ្ញាធរខេត្តបានធ្វើការឃាត់ខ្លួនឈ្មួញទិញត្រីពីបទល្មើសឆក់ត្រជាក់ម្នាក់ នៅវេលាម៉ោង ២ រសៀល ថ្ងៃទី២៦ ខែមីនានេះ នៅចំណុច ភូមិឆ្នុកទ្រូ ឃុំឆ្នុកទ្រូស្រុកបរិបូណ៌ ដោយដកហូតនូវត្រីឆក់បានពីបទល្មើស ឆក់ត្រជាក់មួយចំនួនផងដែរ ។
លោក លី ឡា នាយខណ្ឌ រដ្ឋបាលជលផលកំពង់ឆ្នាំង បានឲ្យដឹងថា ការឃាត់ខ្លួនអ្នកទិញត្រីឆក់ត្រជាក់ខាងលើ គឺបន្ទាប់ពី២ ថ្ងៃមុន សមត្ថកិច្ចបានចាប់ខ្លួន អ្នកប្រើឧបករណ៍ឆក់ត្រជាក់ដែលជាជនជាតិវៀតណាមបានម្នាក់ ហើយបានឆ្លើយថា រាល់ពេលធ្វើសកម្មភាព ឆក់ត្រីបាន គឺយកមកលក់ឲ្យជនជាតិវៀតណាមខាងលើ ។
លោកបានបញ្ជាក់ថា អ្នកចាំទិញត្រីពីបទល្មើសឆក់ត្រជាក់ខាងលើមាន ឈ្មោះ ហ៊ី ប៊ុនធី ជនជាតិវៀតណាម អាយុ ២៧ ឆ្នាំនៅចំណុចកោះមនោ ក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ។
ជាក់ស្តែងនៅថ្ងៃទី២៦ ខែមីនានេះ ដែលជាថ្ងៃទី៣ សមត្ថកិច្ចចម្រុះបន្តអនុវត្តការចុះបង្ក្រាបបទល្មើសនេសាទ ។ ដោយថ្ងៃនេះសមត្ថកិច្ចចម្រុះសរុបចំនួន៦៧ នាក់ ក្នុងនោះមានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង១៥នាក់ ស្នងការដ្ឋាននគរបាលខេត្តចំនួន ២៦ នាក់ គណៈបញ្ជាការឯកភាពស្រុកទាំង ៣ ចំនួន ១៧ នាក់ សហគមន៍នេសាទ ៩ នាក់ ដោយបានប្រើប្រាស់កាណូតចំនួន ១៥ គ្រឿង ចែកចេញជាបីគោលដៅ បង្ក្រាបបទល្មើស នៅក្នុងភូមិសាស្ត្រស្រុកកំពង់លែង ស្រុកជលគីរី និងស្រុកបរិបូណ៌ ជាលទ្ធផល គឺរុះរើរបាំងសាច់អួន ១៧កន្លែងមានប្រវែង 11 30 ម៉ែត្រ បង្គោល 700 ដើម លបលូសាច់អូន 9គ្រឿង ។ រើសម្រាស់ 26 កន្លែងស្មើនឹង 1850 ម៉ែត្រការ៉េ បង្គោលចំនួន 470 ដើម និង មែកចំនួន 3600 មែក ។
ជាមួយនឹងការឃាត់ខ្លួនអ្នកទិញត្រីពីបទល្មើសឆក់ត្រជាក់នេះ សមត្ថកិច្ច ក៏បានដកហូតត្រីឆ្លាំង ដែលជាប្រភេទត្រីអត់ស្រកា ដែលបានពីការនេសាទដោយប្រើប្រាស់ឧបករណ៍ឆក់ត្រជាក់ផងដែរ។ ជនសង្ស័យខាងលើត្រូវបានកសាងសំណុំរឿងបញ្ជូនមកតុលាការ តាមនីតិវិធី ៕
ចែករំលែកព័តមាននេះ