រាជធានីភ្នំពេញ ៖ ការប្រើប្រាស់ប្រេងឥន្ទនៈនៅកម្ពុជាទំនងជាថយចុះនៅពេលប្រេងសាំងធម្មតាឡើងដល់ ៥៣០០រៀល ចំណែកប្រេងស៊ូពែថ្លៃ ៥៨៥០ រៀលក្នុងមួយលីត្រនោះ ។ ការប្រើប្រាស់សាំងទំនងថយចុះនៅពេលនេះ ត្បិតអីបរិមាណនាំប្រេងចូលតាមកំពង់ផែក្រុងព្រះសីហនុ…
រាជធានីភ្នំពេញ ៖ ការប្រើប្រាស់ប្រេងឥន្ទនៈនៅកម្ពុជាទំនងជាថយចុះនៅពេលប្រេងសាំងធម្មតាឡើងដល់ ៥៣០០រៀល ចំណែកប្រេងស៊ូពែថ្លៃ ៥៨៥០ រៀលក្នុងមួយលីត្រនោះ ។ ការប្រើប្រាស់សាំងទំនងថយចុះនៅពេលនេះ ត្បិតអីបរិមាណនាំប្រេងចូលតាមកំពង់ផែក្រុងព្រះសីហនុ បានថយចុះ ។ ស្ថិតិពីកំពង់ផែស្វ័យតក្រុងព្រះសីហនុបានឱ្យដឹងនៅថ្ងៃទី ២៤ ខែមីនាឆ្នាំ ២០២២ នេះ ថា ការនាំចូលប្រេងឥន្ធនៈក្នុងរយៈពេល ២ ខែដើមឆ្នាំ ២០២២ នេះមានប្រមាណ ៣៦៣.៧៥១ តោន ។ ក្នុងនោះការនាំចេញចូលប្រេងឥន្ធនៈនៅខែកុម្ភៈមានប្រមាណ ១៦៥.១១៥ តោន ពោលគឺមានការថយចុះបើប្រៀបធៀបទៅនិងខែមករា ការនាំចូលប្រេងឥន្ធនៈមាន ១៩៨.៦៣៦ តោន។ ការនាំចូលប្រេងឥន្ធនៈក្នុងរយៈពេល ២ ខែដើមឆ្នាំ ២០២១ មានប្រមាណ ៣០២.៥៧៦ តោន ។
ចាប់ពីពាក់កណ្តាលខែមីនា ប្រេងសាំងនៅកម្ពុជាបានឡើងថ្លៃខ្ពស់ដោយសាប្រេងលើសកលលោកឡើងថ្លៃដោយសារសង្គ្រាមរុស្ស៊ី អ៊ុក្រែន ។ កាលពេលថ្មីៗអន្តរក្រសួង ដែលមានក្រសួងសេដ្ឋកិច្ច ក្រសួងពាណិជ្ជកម្ម និងក្រសួងរ៉ែ និងថាមពល បានកំណត់រូបមន្តថ្មីក្នុងការកំណត់តម្លៃលក់រាយប្រេងឥន្ទនៈនៅកម្ពុជា ។ លោក ប៉ែន សុវិជាតិ មន្ត្រីអ្នកនាំពាក្យ ក្រសួងពាណិជ្ជកម្ម បានឱ្យដឹងថា ការកំណត់រូបមន្តថ្មីនោះសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជានេះ ធ្វើឡើងដើម្បីធានានូវសមធម៌បានទាំងសងខាងរវាងអ្នកប្រើប្រាស់និងអ្នកលក់ប្រេងនៅកម្ពុជា ។
មន្ត្រីអ្នកនាំពាក្យខាងលើបញ្ជា្កក់ថា ការកំណត់រូបមន្តថ្មីនេះដើម្បីធានាបាននូវសមធម៌រវាងអ្នកលក់ និងអ្នកទិញប្រេងឱ្យតាមទាន់នៅតម្លៃប្រេងនៅលើទីផ្សារអន្តរជាតិ ។ ម្យ៉ាងទៀតដើម្បីរក្សាតុល្យភាពឱ្យក្រុមហ៊ុននាំចូលប្រេងនៅមានលទ្ធភាពនាំចូលប្រេងមកលក់នៅកម្ពុជាដដែល ហើយទីផ្សារលក់រាយនៅតាមស្ថានីយប្រេងឥន្ធនៈនៅក្នុងស្រុក វាចំណុះទៅតាមថ្លៃប្រេងទីផ្សារអន្តរជាតិ ។
ពលរដ្ឋ និងអ្នកសេដ្ឋកិច្ចថា ការកំណត់រូបមន្តថ្មីនោះទំនងមិនអាចធ្វើឱ្យតម្លៃប្រេងឥន្ទនៈនៅកម្ពុជា មានតម្លៃទាបដូចប្រទេសមួយចំនួនបានទេ បើទោះបីប្រេងលើផ្សារអន្តរជាតិធ្លាក់ថ្លៃក្តី បើមិនមានការបញ្ចុះតម្លៃពន្ធនោះ ។ ក្នុងសេចក្តីជូនដំណឹងរបស់អន្តរក្រសួង ពុំបានបញ្ជាក់ពីការបញ្ចុះតម្លៃពន្ធនោះឡើយ ។ នៅក្នុងសេចក្តីជូនដំណឹងនោះ ការយកពន្ធរបស់រដ្ឋចំពោះប្រេងឥន្ទនៈមានពន្ធគយ ពន្ធអាករបន្ថែម ពន្ធអាករពិសេស ។
ប្រេងសាំងនៅលើទីរផ្សារក្នុងប្រទេសកម្ពុជាត្រូវបានកំណត់អាស្រ័យលើតម្លៃទីផ្សារអន្តរជាតិ ។ ប៉ុន្តែពលរដ្ឋខ្លះបានទទួចសូមឱ្យបន្ថយលើការយកពន្ធប្រេងឥន្ទនៈនេះ ។ ឆ្លើយតបសំណូមពរនេះ កាលពីពាក់កណ្តាលខែកុម្ភៈកន្លងមកនេះ លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់នៅក្នុងវេទិកាសាធារណៈមួយថា ការបញ្ចុះតម្លៃពន្ធប្រេងឥន្ធនៈនៅកម្ពុជាមិនអាចធ្វើបាននៅពេលនេះទេ ពីព្រោះនឹងធ្វើឱ្យប៉ះពាល់ចំណូល និងថវិកាជាតិសម្រាប់ទ្រទ្រង់សេដ្ឋកិច្ចទាំងមូល ។ លោកបានគូសបញ្ចាក់បន្ថែមថា ប្រសិនបើតម្លៃពន្ធនោះគ្មានស្ថេរភាព កម្ពុជានឹងប្រឈមបាត់បង់ក្រុមហ៊ុនវិនិយោគ ៕
ចែករំលែកព័តមាននេះ