បន្ទាយមានជ័យ៖ បុរសម្នាក់ បានជួបគ្រោះថ្នាក់ចរាចរណ៍ បង្កឲ្យរបួសជើងម្ខាង និងម៉ូតូខ្ទេចមួយកំណាត់មុខ ដោយសារជិះម៉ូតូបុកលូរបស់ក្រុមហ៊ុនមួយ ដែលទុកចោលកណ្តាលផ្លូវ ហើយគ្មានស្លាកសញ្ញាចរាចរណ៍ ឬភ្លើងបំភ្លឺ។
ករណីនេះ បានកើតឡើង នៅចំណុចផ្លូវបេតុងមួយ ក្នុងភូមិមិត្តភាពសង្កាត់ប៉ោយប៉ែត កាលពីយប់ថ្ងៃទី២២ ខែមីនា ឆ្នាំ២០២២។
ជនរងគ្រោះ ឈ្មោះ លី វុទ្ធា អាយុ ៣៨ឆ្នាំ ជាសន្តិសុខសណ្ឋាគារ និងមានទីលំនៅ ក្នុងភូមិប្រជាធម្មកើតសង្កាត់ផ្សារកណ្តាល ក្រុងប៉ោយប៉ែត។ ជនរងគ្រោះ រងរបួសជើងស្តាំ ដោយគេសង្ស័យថា បាក់ភ្លៅ។
ជនរងគ្រោះ បានបើកបរម៉ូតូ ម៉ាកសង់ សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ បន្ទាយមានជ័យ 1F-5046 ក្នុង ទិសដៅពីជើង ទៅត្បូង លុះដល់ចំណុចកើតហេតុ ដោយសារមេឃងងឹត ក៏បានបុកលូ ដែលក្រុមហ៊ុនមួយ ទុកចោលកណ្តាលផ្លូវពេញទំហឹង បណ្តាលឲ្យរងរបួសតែម្តង។ ជនរងគ្រោះ ត្រូវបានអ្នកស្រុកនាំគ្នាលើកដាក់ផាស់អាប់ ដឹកទៅមន្ទីរពេទ្យបង្អែកក្រុងប៉ោយប៉ែត ខណៈម៉ូតូរបស់រងគ្រោះ ត្រូវបានសមត្ថកិច្ច នាំយកទៅរក្សាទុកជាបណ្តោះអាសន្ន នៅប៉ុស្តិ៍រដ្ឋបាលសង្កាត់ប៉ោយប៉ែត។
ដោយឃើញហេតុផលផ្ទាល់ភ្នែកនេះ អ្នកស្រុកបានលើកឡើងថា ក្រុមហ៊ុន មិនគួរដាក់លូចោលកណ្តាលផ្លូវ គ្មានភ្លើងបំភ្លឺ ឬសញ្ញាចរាចរណ៍ដូចនេះឡើយ។
អ្នកស្រុកលើកឡើងទៀតថា ករណីបែបនេះ មិនមែនជាលើកទី១ទេ កន្លងមក ក៏មានយានយន្តជួបគ្រោះថ្នាក់ស្មានមិនដល់បែបហ្នឹង ជាញឹកញយផងដែរ។
អ្នកស្រុក បានសំណូមពរដល់ក្រុមហ៊ុន ដែលអភិវឌ្ឍន៍ផ្លូវនានា នៅក្រុងប៉ោយប៉ែត ក៏ដូចជា កន្លែងផ្សេងៗ មេត្តាដាក់សញ្ញាចរាចរណ៍ឲ្យបានត្រឹមត្រូវផង តាមទីតាំង ដែលកំពុងអភិវឌ្ឍន៍ ឬទើបអភិវឌ្ឍន៍ហើយដើម្បីបញ្ចៀសបញ្ហាចរាចរណ៍ កុំឲ្យកើតមានជាយថាហេតុ ដូចករណីខាងលើទៀត។
ជុំវិញករណីនេះ ខាងក្រុមហ៊ុន ដែលជាប់ពាក់ព័ន្ធ មិនអាចរកការបំភ្លឺបានទេ ខណៈអាជ្ញាធរភូមិមិត្តភាព អះអាងថា មិនស្គាល់ឈ្មោះក្រុមហ៊ុនដាក់លូនោះទេ និងប្រាប់ថា លូដែលគេដាក់ចោលកណ្តាលផ្លូវនេះ កើតមានមួយរយៈមកហើយ៕ មុត សារុន
ចែករំលែកព័តមាននេះ