រាជធានីភ្នំពេញ ៖ ក្រសួងពាណិជ្ជកម្ម បានជំរុញឱ្យអាជ្ញាធរដែនដីពិនិត្យ និងអន្តរាគមន៍មិនឱ្យកន្លែងលក់សាំងផ្អាកលក់សាំង ដើម្បីមានឱកាសដំឡើងថ្លៃ ឬធ្វើការដំឡើងថ្លៃប្រេងសាំងហួសពីការកំណត់របស់ក្រសួង ដែលនាំឱ្យប៉ះពាល់ស្ថិរភាព និងជីវភាពប្រជាពលរដ្ឋនោះឡើយ ។…
រាជធានីភ្នំពេញ ៖ ក្រសួងពាណិជ្ជកម្ម បានជំរុញឱ្យអាជ្ញាធរដែនដីពិនិត្យ និងអន្តរាគមន៍មិនឱ្យកន្លែងលក់សាំងផ្អាកលក់សាំង ដើម្បីមានឱកាសដំឡើងថ្លៃ ឬធ្វើការដំឡើងថ្លៃប្រេងសាំងហួសពីការកំណត់របស់ក្រសួង ដែលនាំឱ្យប៉ះពាល់ស្ថិរភាព និងជីវភាពប្រជាពលរដ្ឋនោះឡើយ ។
បើតាមក្រសួងពាណិជ្ជកម្ម បានបញ្ជាក់ថា នៅពេលប្រេងសាំងឡើងថ្លៃនេះគ្រប់ស្ថានីយ៍លក់ប្រេងឥន្ធនៈទាំងអស់ របស់ក្រុមហ៊ុនប្រេងឥន្ទនៈនៅកម្ពុជា បាននៅបន្តលក់ជាធម្មតា ភាគច្រើនមានទីតាំងនៅកណ្តាលរាជធានីភ្នំពេញ ឬនៅតាមបណ្តាទីរួមខេត្ត ឬទីរួមស្រុក ប៉ុន្តែចំពោះដេប៉ូស្ថានីយប្រេងឥន្ធនៈឯកជនមួយចំនួន ដែលភាគច្រើននៅតាមដងផ្លូវក្រៅពីទីរួមខេត្ត ឬទីរួមស្រុក បានផ្អាកការលក់រាយរបស់ខ្លួន និងមួយចំនួនបានឡើងថ្លៃប្រេងឥន្ធនៈមុនការកំណត់ ។
«ស្នើឱ្យអភិបាលខេត្តទាំងអស់ ជួយជំរុញឱ្យដេប៉ូស្ថានីយប្រេងឥន្ធនៈឯកជនទាំងនោះ អនុវត្តតាមគោលការណ៍ច្បាប់ ឬសហការផ្តល់ព័ត៌មានមកមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) រាជធានី-ខេត្ត មន្ត្រីពាណិជ្ជកម្មរាជធានីខេត្ត និងមន្ត្រីពាក់ព័ន្ធ» នេះបើតាមការលិខិតរបស់ក្រសួងពាណិជ្ជកម្មចេញនៅថ្ងៃទី ១៦ មីនាកន្លងមកនេះ ។
ក្រសួងពាណិជ្ជកម្ម បានព្រមានចាត់វិធានការ ចំពោះស្ថានីយប្រេងឥន្ធនៈណាលក់លើសតម្លៃដែលក្រសួងបានកំណត់ និងស្ថានីយណា ដែលផ្អាកការលក់បណ្តោះអាសន្ន ដើម្បីទុកប្រេងលក់ដំឡើងថ្លៃនាពេលខាងមុខនោះ ។
ជាការកត់សម្គាល់នៅពេលប្រេងសាំងឡើងថ្លៃដល់មួយលីត្រ ៥៣០០ រៀល សម្រាប់ប្រេងសាំងធម្មតា និងប្រេងម៉ាស៊ូតនោះ ហើយសាំងស៊ូពែឡើងដល់ ៥៨៥០ រៀល គេសង្កេតឃើញស្ថានីយ៍ចាក់សាំងខ្លះ សូម្បីនៅភ្នំពេញក៍មានដែរ បានបិទស្លាកទាំងថ្ងៃថា «អស់សាំងពីស្កុក» ។
មានករណីខ្លះទៀតពលរដ្ឋបានលើកឡើងថា កន្លែងលក់សាំងមួយចំនួនបានដំឡើងថ្លៃខ្ពស់ជាងការកំណត់របស់ក្រសួង ដែលប្រការទាំងនេះបានបង្កឱ្យពលរដ្ឋមានការព្រួយបារម្ភពីតម្លៃសាំងកាន់តែឡើងថ្លៃ ពិសេសគ្មានសាំងប្រើប្រាស់តែម្តង ។
បន្ថែមពីលិខិតជូនដំណឹងទៅអាជ្ញាធរខេត្តមន្ត្រីជាន់ខ្ពស់ក្រសួងពាណិជ្ជកម្មបានអះអាងថា នឹងអនុវត្តតាមគោល ការណ៍ច្បាប់ ស្តីពីកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ដល់អ្នករកស៊ីណាដែលកេញចំណេញនាពេលនេះ ។ ការជូនដំណឹងពីតម្លៃប្រេងសាំងថា នឹងធ្លាក់ថ្លៃជាងពេលបច្ចុប្បន្ននេះ ឬបន្តឡើងថ្លៃទៀត គេរង់ចាំរហូតចុងខែមីនានេះទើបដឹង ពីព្រោះការកំណត់តម្លៃលក់សាំងនៅកម្ពុជាដែលផ្អែកទីផ្សារប្រេងអន្តរជាតិនោះធ្វើឡើងនៅក្នុងពេល ២ សប្តាហ៍ម្តង ៕
ចែករំលែកព័តមាននេះ