អាជ្ញាធរគូសបញ្ជាក់ថា ជនអត្តឃាតម្នាក់ដែលបើករថយន្តផ្ទុកគ្រឿងផ្ទុះមួយបានធ្វើឱ្យផ្ទុះកាលពីថ្ងៃទី៣០ សីហា នៅមុខស្ថានទូតចិនប្រចាំទីក្រុងប៊ីស្កេក រដ្ឋធានីកៀហ្ស៊ីស៊ីស្ថាន អតីតសាធារណរដ្ឋសូវៀតមួយ បណ្តាលឱ្យមនុស្ស៣នាក់រងរបួស ។
ឧបនាយករដ្ឋមន្ត្រីកៀហ្ស៊ីស៊ីស្ថាន លោក JENISH RAZAKOV ថ្លែងទៅកាន់ក្រុមអ្នកកាសែតថា មានតែជនអត្តឃាតដែលស្លាប់ ហើយបណ្តាឆ្មាំការពារសន្តិសុខរងរបួស ។ លោកបញ្ជាក់ថាមនុស្ស៣នាក់រងរបួសបញ្ជូនទៅមន្ទីរពេទ្យ ហើយពួកគេជាជនជាតិកៀហ្ស៊ីស៊ីស្ថានសមាជិកបុគ្គលិកស្ថានទូត ។
ប្រភពព័ត៌មានប៉ូលិសក្រុងប៊ីស្កេកបញ្ជាក់ប្រាប់ AFP ថា រថយន្តធុនតូចមួយគ្រឿងបានបើកបំបុកប្រឆាំងទ្វារចូលស្ថានទូតចិនមុនពេលផ្ទុះក្នុងបរិវេណប្លុកស្ថានទូត ជិតនិវេសនដ្ឋានរបស់ឯកអគ្គរដ្ឋទូត ។
ប្រភពមួយទៀតរបស់ភ្នាក់ងារសន្តិសុខប្រទេសអាស៊ីកណ្តាលនេះមានព្រំដែនជាប់ចិនបញ្ជាក់ថា គ្រឿងផ្ទុះមួយដាក់ក្នុងរថយន្តនោះ។ ប្រជាជនក្រុងប៊ីស្កេកអះអាងប្រាប់ AFP ថា ការផ្ទុះយ៉ាងខ្លាំងធ្វើឱ្យផ្ទះពួកគេញ័រ ហើយបែកកញ្ចក់ ។
បណ្តាសមាជិកបុគ្គលិកស្ថានទូតចិន និងស្ថានទូតអាមេរិកដែលនៅក្បែរគ្នាត្រូវបានជម្លៀសចេញ ។
ជាប្រទេសក្រីក្រមួយមានប្រជាជនកាន់សាសនាអ៊ិស្លាមភាគច្រើន កៀហ្ស៊ីស៊ីស្ថានមានប្រវត្តិអស្ថេរភាពនយោបាយ និងមានការតស៊ូប្រឆាំងពួកអ៊ិស្លាមនិយមរ៉ាឌីកាល់ ។ អាជ្ញាធរប្រទេសនេះមានការព្រួយបារម្ភចំពោះឥទ្ធិពលកាន់តែខ្លាំងរបស់ក្រុមរដ្ឋអ៊ិស្លាមក្នុងប្រទេស ហើយតែងប្រកាសពីការកម្ទេចការប៉ុនប៉ងវាយប្រហារភេរវកម្មនានារបស់ក្រុមរដ្ឋអ៊ិស្លាម៕
ចែករំលែកព័តមាននេះ