ខេត្តកំពង់ឆ្នាំង ៖ ប្រជាពលរដ្ឋរស់នៅឃុំព្រៃគ្រី ស្រុកជលគីរី បានត្អូញត្អែរពីបញ្ហាឆ្នាំនេះទិន្នផលស្រូវបានតិចហើយតម្លៃស្រូវចុះថោកទៀត ផ្ទុយពីប្រេង និងជី ដែលប្រើប្រាស់ក្នុងការធ្វើស្រែ បែរជាឡើងថ្លៃទៅវិញដែលធ្វើឲ្យប៉ះពាល់ជីវភាពរស់នៅរបស់ពួកគាត់ ។…
ខេត្តកំពង់ឆ្នាំង ៖ ប្រជាពលរដ្ឋរស់នៅឃុំព្រៃគ្រី ស្រុកជលគីរី បានត្អូញត្អែរពីបញ្ហាឆ្នាំនេះទិន្នផលស្រូវបានតិចហើយតម្លៃស្រូវចុះថោកទៀត ផ្ទុយពីប្រេង និងជី ដែលប្រើប្រាស់ក្នុងការធ្វើស្រែ បែរជាឡើងថ្លៃទៅវិញដែលធ្វើឲ្យប៉ះពាល់ជីវភាពរស់នៅរបស់ពួកគាត់ ។
បុរសឈ្មោះ យ៉ាន យ៉ាត អាយុ៤៥ ឆ្នាំ មានទីលំនៅភូមិព្រៃគ្រីជើង ឃុំព្រៃគ្រី ស្រុកជលគីរី បានប្រាប់ភ្នាក់ងារកោះសន្តិភាពនៅព្រឹកថ្ងៃទី១៥ ខែមីនា ឆ្នាំ២០២២នេះថា ៖ ទិន្នផលស្រូវរបស់គាត់ឆ្នាំនេះ បានតិចជាងឆ្នាំទៅមិញ ដោយ១ហិកតាបានត្រឹមតែ៦០បាវ តែប៉ុណ្ណោះ ខុសឆ្នាំមុនបានដល់ជាង៨០ប៉ាវ ។ នេះក៏ដោយសារតែពួកគាត់មិនបានភ្ជួរដាស់ដី អោយបានត្រឹមត្រូវពីដើមដៃ ។ ផ្ទុយទៅវិញ បានស្រូវតិចហើយ គឺលក់បានថោកទៀត ។
ជាក់ស្តែង បច្ចុប្បន្ននេះបានថ្លៃត្រឹមតែពី៧០០ទៅ៨០០រៀលក្នុង១គីឡូក្រាម ដែលខុសពីឆ្នាំទៅ ១គីឡូក្រាមថ្លៃពី៩០០ទៅ១០០០រៀលក្នុង១គីឡូក្រាម ។
ចំណែកស្ត្រីឈ្មោះ មាន ស្រីអូន អាយុ៣៧ឆ្នាំ មានទីលំនៅជាមួយបុរសខាងលើក៏បាននិយាយដែរថា ៖ ឆ្នាំនេះ មូលហេតុទិន្នផលស្រូវរបស់គាត់បានថយចុះជាងឆ្នាំទៅមិញ ដោយសារតែគាត់កាត់បន្ថយការប្រើប្រាស់ជី ព្រោះមានតម្លៃថ្លៃពេក ហើយអ្នកភូមិខ្លះទៀត ពេលជីឡើងថ្លៃក៏ងាកមកប្រើជីមានតម្លៃថោកទើបគ្មានគុណភាព ។
ស្ត្រីរូបខាងលើបានបញ្ជាក់ថា ៖ ឆ្នាំនេះ ទិន្នផលស្រូវបានតិច តម្លៃស្រូវក៏ចុះថោក ចំណែកប្រេងវិញឡើងថ្លៃរហូត ។ កាលពីពេលមុន១កាន(ចំណុះ៣០លីត្រ)ថ្លៃ១២ម៉ឺនរៀល បច្ចុប្បន្នឡើងដល់១៦ម៉ឺនរៀល ពិតជាថ្លៃណាស់ ។ កសិករធ្វើស្រូវប្រាំងឆ្នាំនេះខាតដើមហើយនៅមិនទាន់គិតដល់ថ្លៃច្រូតផង ដែលថ្លៃច្រូត១ហិកតាគេយកពី៣៥ទៅ៣៨ម៉ឺនរៀល តាមស្ថានភាពស្រូវច្រូតស្រួល ឬលំបាក (ស្រូវដេកឬស្រូវឈរ) ។ ប៉ុន្តែពួកគាត់ជាកសិករ បើធ្វើស្រូវខាត១ឆ្នាំ ឆ្នាំក្រោយក៏នៅធ្វើទៀត ព្រោះគ្មានមុខរបរក្រៅពីធ្វើស្រែចំការ ។
យ៉ាងនេះក្តី លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានបញ្ជាក់នៅរសៀល ថ្ងៃទី១៥ ខែមីនានេះថា ៖ ចំពោះតម្លៃស្រូវឆ្នាំនេះថេរល្អណាស់ មិនឡើងមិនចុះទេ ។ តម្លៃស្រូវទីផ្សារចុងដៃ គឺពិតជាធ្លាក់ត្រឹម៨០០រៀលក្នុង១គីឡូក្រាមបែបនេះហើយ ឆ្នាំទៅក៏ដូចគ្នាដែរ ។ ប៉ុន្តែតម្លៃស្រូវសម្រាប់អ្នកច្រូតពីដើមដៃវិញថ្លៃពី១ពាន់ ទៅ១ពាន់២រយរៀលក្នុង១គីឡូក្រាម ។
ដោយឡែកចំពោះទិន្នផលដែលថយចុះ គឺពិតដូចដែលប្រជាពលរដ្ឋថាមែន ខ្លះមិនបានភ្ជួរដាស់ដីពីដើមដៃ ចំណែកខ្លះទៀតបានក៏មិនបានប្រើជីឱ្យបានត្រឹមត្រូវ ។ ប៉ុន្តែបើសម្រាប់ទូទាំងខេត្តកំពង់ឆ្នាំងវិញ ស្រូវឆ្នាំនេះ គឺបានល្អ ទិន្នផលខ្ពស់ជាងឆ្នាំទៅមិញ ៕
ចែករំលែកព័តមាននេះ