ខេត្តសៀមរាប ៖ ថ្មីៗកន្លងទៅនេះ ក្រសួងទេសចរណ៍បានលាតត្រដាងឱ្យដឹងថា មានកត្តាសំខាន់៤ យ៉ាងដែលបានធ្វើឲ្យទេសចរណ៍នៅទឹកដីខេត្តសៀមរាបធ្លាក់ចុះខ្លាំងមិនធ្លាប់មាន ក្នុងរយៈពេល២០ឆ្នាំកន្លងមកនៅកម្ពុជា ។ យោងតាមឯកសារមួយរបស់ក្រសួងទេសចរណ៍ស្តីពី «ផែនការមេអភិវឌ្ឍទេសចរណ៍ខេត្តសៀមរាប…
ខេត្តសៀមរាប ៖ ថ្មីៗកន្លងទៅនេះ ក្រសួងទេសចរណ៍បានលាតត្រដាងឱ្យដឹងថា មានកត្តាសំខាន់៤ យ៉ាងដែលបានធ្វើឲ្យទេសចរណ៍នៅទឹកដីខេត្តសៀមរាបធ្លាក់ចុះខ្លាំងមិនធ្លាប់មាន ក្នុងរយៈពេល២០ឆ្នាំកន្លងមកនៅកម្ពុជា ។
យោងតាមឯកសារមួយរបស់ក្រសួងទេសចរណ៍ស្តីពី «ផែនការមេអភិវឌ្ឍទេសចរណ៍ខេត្តសៀមរាប ឆ្នាំ២០២១- ២០៣៥» បានលើកឡើងថា ទោះបីក្នុងរយៈពេល២០ឆ្នាំ កន្លងមកនេះ វិស័យទេសចរណ៍ខេត្តសៀមរាបដែលធ្លាប់មានការរីកចម្រើនគួរឱ្យកត់សម្គាល់នោះ បានរងគ្រោះធ្ងន់ធ្ងរនៃការធ្លាក់ចុះភ្ញៀវទេសចរជាតិ និងអន្តរជាតិ ដោយសារការវាយលុកពីកត្តាចម្បងធំៗមួយចំនួនដែលបានកើតឡើងជាបន្តបន្ទាប់ ។
ប្រភពដដែលបានបញ្ជាក់ថា ចំនួនភ្ញៀវទេសចរអន្តរជាតិបានកើនឡើងទ្វេដងពី១,៣លាននាក់ ក្នុងឆ្នាំ២០១០ ដល់ប្រមាណ២,៥ លាននាក់ នៅឆ្នាំ២០១៨ ដែលមានអត្រាកំណើនមធ្យមជាង១៥% ក្នុងមួយឆ្នាំ ។ នេះបើតាមប្រភពផែនការមេអភិវឌ្ឍទេសចរណ៍ខេត្តសៀមរាបឆ្នាំ២០២១- ២០៣៥។
ចំពោះតួលេខនៃកំណើនភ្ញៀវទេសចរ រយៈពេលកន្លងមកនេះក្តី ក៏មានបញ្ហាប្រឈមខាងក្រៅ និងខាងក្នុងមួយចំនួន បានធ្វើឱ្យភ្ញៀវទេសចរធ្លាក់ចុះវិញ នៅឆ្នាំ២០១៩ ។ ទន្ទឹមនឹងនេះដែរមានបញ្ហាប្រឈមខាងក្រៅ និងខាងក្នុងមួយចំនួនបានធ្វើឱ្យភ្ញៀវទេសចរធ្លាក់ចុះវិញនៅឆ្នាំ២០១៩ គឺការមកដល់នៃភ្ញៀវទេសចរអន្តរជាតិធ្លាក់ចុះមកត្រឹម២,២លាននាក់ (ថយចុះ-១៤,៨៦%) និងភ្ញៀវទេសចរជាតិធ្លាក់ចុះមក២,០៥លាននាក់ (ថយចុះ –៣៦,៧%) ។ បើគិតពីចំណែកទីផ្សារនៅក្នុងចំណោមគោលដៅទេសចរណ៍សំខាន់ៗរបស់កម្ពុជា ខេត្តសៀមរាបបានចាប់យកចំណែកដ៏ធំមួយ ប្រមាណ៤១% នៃទេសចរអន្តរជាតិមកកម្ពុជាក្នុងចន្លោះឆ្នាំ២០១៥ ដល់ឆ្នាំ២០១៨ ។
«ប៉ុន្តែនៅឆ្នាំ២០២០ ចំណែកទីផ្សារនេះបានធ្លាក់ចុះមកត្រឹមប្រមាណ៣០% ប៉ុណ្ណោះនៃទេសចរអន្តរជាតិមកកម្ពុជា » ។ នេះបើតាមឯកសារដដែលបានបញ្ជាក់ ។ ប្រភពដដែលបានបន្តថា ជារួម និន្នាការនៃការមកដល់របស់ភ្ញៀវទេសចរអន្តរជាតិនៅខេត្តសៀមរាបកន្លងមក មានខ្សែវដ្ដនៃទេសចរ គឺកើនឡើង ធ្លាក់ចុះ មិនទៀងទាត់ ក្នុងនោះការធ្លាក់ចុះគួរឱ្យកត់សម្គាល់ចំនួន០៤ដងដែលបណ្តាលមកពីមូលហេតុសំខាន់ៗដូចជា លើកទី១ ក្នុងឆ្នាំ១៩៩៧ ការមកដល់នៃភ្ញៀវទេសចរអន្តរជាតិ ធ្លាក់ចុះដោយវិបត្តិហិរញ្ញវត្ថុសកលលោក, លើកទី២ ក្នុងឆ្នាំ២០០៣ ការមកដល់នៃភ្ញៀវទេសចរអន្តរជាតិស្ថិតនៅចំណុចថេរ ដោយសារវិបត្តិជំងឺឆ្លង (សារ) លើកទី៣ ក្នុងឆ្នាំ២០០៨ និងឆ្នាំ២០០៩ ការធ្លាក់ចុះនៃភ្ញៀវទេសចរ អន្តរជាតិបណ្តាលមកពីវិបត្តិសេដ្ឋកិច្ចសកល លើកទី៤ ក្នុងឆ្នាំ២០១៩ ការធ្លាក់ចុះនៃចំនួនភ្ញៀវទេសចរអន្តរជាតិ ដែលបណ្ដាលមកពីពិពិធកម្មផលិតផលទេសចរណ៍មិនទាន់ឆ្លើយតបតាមនិន្នាការទេសចរណ៍សកល ។
ក្រសួងទេសចរណ៍បានរៀបរាប់នៅក្នុង «ផែនការមេអភិវឌ្ឍទេសចរណ៍ខេត្តសៀមរាបឆ្នាំ២០២១- ២០៣៥» ថា «ដោយឡែក នៅឆ្នាំ២០២០ ស្ថានភាពទេសចរណ៍ខេត្តសៀមរាបធ្លាក់ចុះយ៉ាងខ្លាំងមិនធ្លាប់មាន ក្នុងរយៈពេល ២០ឆ្នាំចុងក្រោយ ដោយសារឥទ្ធិពលនៃវិបត្តិជំងឺកវីដ១៩ ដែលអូសបន្លាយពីចុងឆ្នាំ ២០១៩ រហូតមកដល់បច្ចុប្បន្ន »។
ជាក់ស្តែងនៅឆ្នាំ២០២០ ខេត្តសៀមរាបទទួលបានភ្ញៀវទេសចរអន្តរជាតិចំនួនប្រមាណ៤០ម៉ឺននាក់ប៉ុណ្ណោះ ធ្លាក់ចុះក្នុងអត្រា-៨២% និងភ្ញៀវទេសចរក្នុងស្រុក មានប្រមាណ៧០ម៉ឺននាក់ធ្លាក់ចុះក្នុងអត្រា -៦៦២% ។ ចំណែកគោលបំណងនៃយុទ្ធសាស្ត្រផែនការមេអភិវឌ្ឃន៍ទេសចរណ៍សៀមរាប២០២១ – ២០៣៥ គឺត្រូវធ្វើយ៉ាងណាឲ្យខេត្តសៀមរាបក្លាយជាគោលដៅទេសចរណ៍ដ៏ចម្បង និងទាក់ទាញនៅក្នុងតំបន់ និងសកលលោក ដោយឈរលើមូលដ្ឋាននៃសម្បត្តិបេតិកភណ្ឌវប្បធម៌ ធម្មជាតិ ប្រវត្តិសាស្ត្រ សាសនា និងភាពជាខ្មែរ ។
សូមបញ្ជាក់ផងដែរថា ប្រទេសកម្ពុជាបានរងនូវវិបត្តិកូវីដ១៩ លើកដំបូងនៅថ្ងៃទី២៧ មករា ២០២០ ដែលធ្វើឲ្យសេដ្ឋកិច្ចជាតិ និងចំនួនអ្នកទេសចរណ៍ទាំងភ្ញៀវជាតិ និងអន្តរជាតិមានការធ្លាក់ចុះខ្លាំងបំផុតកាលពីឆ្នាំ២០២០ ៕
ចែករំលែកព័តមាននេះ