ADផ្ទាំងផ្សព្វផ្សាយពាណិជ្ជកម្ម

Picture

រយៈពេលឆ្នាំ ​១០ ទិន្នផល​ម្រេច​កំពត​កើន​ចំនួន​ជាង ​៧០ ​តោន

2 ឆ្នាំ មុន
  • ភ្នំពេញ

ខេត្តកំពត ​៖ ក្រោយ​ពី​បាន​ក្លាយជា​ផលិតផលសម្គាល់​ភូមិសាស្ត្រ ក្នុង​ឆ្នាំ​ ២០១០ រហូត​មក​ដល់​ពេល​នេះ ម្រេច​កំពត​មានការ​រីក​ចម្រើន​គួរឱ្យកត់សម្គាល់ ​។ រីក​ចម្រើន​ទាំង​សមាជិក​ដាំ​ដុះ ផ្ទៃ​ដុះ​ដាំ​ដុះ…

ខេត្តកំពត ​៖ ក្រោយ​ពី​បាន​ក្លាយជា​ផលិតផលសម្គាល់​ភូមិសាស្ត្រ ក្នុង​ឆ្នាំ​ ២០១០ រហូត​មក​ដល់​ពេល​នេះ ម្រេច​កំពត​មានការ​រីក​ចម្រើន​គួរឱ្យកត់សម្គាល់ ​។ រីក​ចម្រើន​ទាំង​សមាជិក​ដាំ​ដុះ ផ្ទៃ​ដុះ​ដាំ​ដុះ និង​ទិន្នផល​ដាំ​ដុះ ​។ គេ​ដឹង​ថា​កាលពី​ ១០ ​ឆ្នាំ ទិនផល​ម្រេច​កំពត​មាន​ប្រមាណ ​១០ ​តោន​ក្នុង​ ១ ​ឆ្នាំ​តែ​កាលពី​ឆ្នាំ ​២០២០ ​ទិន្នផល​បាន​កើន​ដល់ ជាង ​៨២ ​តោន ​។

លោក សួន វិជ្ជា ទីប្រឹក្សា​ក្រសួងពាណិជ្ជកម្ម ប្រធាន​លេខាធិការដ្ឋាន​គណៈកម្មាធិការ​ជាតិ​គ្រប់គ្រង​កម្មសិទ្ធិបញ្ញា និង​ប្រធាន​នាយកដ្ឋាន​កម្មសិទ្ធិបញ្ញា​បានឱ្យ​ដឹង​ថា សាវតា​នៃ​ការ​ជ្រើសរើស និង​ចុះបញ្ជី «ម្រេច​កំពត​» ជា​ម៉ាក​សម្គាល់​ភូមិសាស្ត្រ​ទំនិញ​ដំបូង​គេ​បង្អស់​នៅ​ក្នុង​កម្ពុជា​ ។ ​លោក​ថា កាលពី​ឆ្នាំ ​២០១០ ពេល​ចាប់ផ្តើម​ដំបូង មាន​ផលិតករ​ចំនួន ១១៨ ​គ្រួសារ ក្រុមហ៊ុន​ចំនួន ១២ និង​ផ្ទៃដី​ដាំ​ដុះ​ចំនួន ១០​ ហិក​តា ដែល​អាច​ប្រមូល​ទិន្នផល​បាន​តែ ១០ ​តោន​ប៉ុណ្ណោះ ​។

«​មក​ដល់​ឆ្នាំ ​២០២០ ​នេះ មាន​ផលិតករ​សរុប​មាន​ចំនួន ៤៥៥​ គ្រួសារ ក្រុមហ៊ុន​ចំនួន ៣៨ និង​ផ្ទៃដី​ដាំ​ដុះ​កើនឡើង​ដល់ ២៩០ ​ហិក​តា ដែល​អាច​ប្រមូល​ទិន្នផល​បាន​ចំនួន ៨២,៧៨ ​តោន និង​មាន​ទីផ្សារ​នាំ​ចេញ​ទៅ​ប្រទេស​នៅ​ទ្វីបអាស៊ី និង​អឺរ៉ុប ​។ ម៉ាក​សម្គាល់​ភូមិសាស្ត្រ​ទំនិញ ​«​ម្រេច​កំពត​»​ ត្រូវ​បាន​ទទួល​ការ​ចុះបញ្ជី​ជា​បន្តបន្ទាប់​នៅ​ក្នុង​តំបន់ និង​សកលលោក ដោយ​ទទួល​បានការ​ការពារ​នៅ​ប្រទេស ថៃ វៀតណាម និង​សហភាព​អឺរ៉ុប»​ នេះ​បើ​តាម​ការ​បញ្ជាក់​របស់​មន្ត្រី​ ។

លោក សួន វិជ្ជា បានឱ្យដឹងទៀត​ថា កាល​ពេល​ថ្មី​ៗ​នេះ​ក្រសួងពាណិជ្ជកម្ម​បាន​ជួយ​សម្របសម្រួល​ដាក់​ពាក្យ​ស្នើ​សុំ​ចុះបញ្ជី​ម៉ាក​សម្គាល់​ភូមិសាស្ត្រ​ទំនិញ ម្រេច​កំពត ជា​អន្តរជាតិ​នៅ​បណ្តា​ប្រទេស​ចំនួន ​៣២​ ក្រោម​ច្បាប់​ស្តី​ពី​ទីក្រុង​ហ្សឺ​ណែវ​ នៃ​កិច្ចព្រមព្រៀង​ទីក្រុង​លី​ស្បោ​ន ​ស្តី​ពី​ប្រភព​ដើម​ទំនិញ​ និង​ម៉ាក​សម្គាល់​ភូមិសាស្ត្រ​ទំនិញទៀត​ផង ​។

លោក ងួ​ន ឡាយ ប្រធាន​សមាគម​លើកកម្ពស់​ម្រេច​កំពត​ធ្លាប់​បានឱ្យ​ដឹង​ថា​ នៅ​ឆ្នាំ ​២០២១ ​កន្លង​ទៅ​ម្រេច​កំពត​ឃើញ​ថា ​មាន​ទីផ្សារ​ល្អ ។ ​ល្អ​ត្រង់​ថា ​ការ​ផលិត​ម្រេច​បាន​ក្នុង​រង្វង់​តែ​ ១០០​ តោន តែ​បរិមាណ​នៃ​ការ​នាំ​ចេញ​បាន​រហូត​ដល់ ​១១៤​ តោន ​។​ លោក​ថា នៅ​ឆ្នាំ​ ២០២១​ ចាត់ទុកជា​ប្រវត្តិសាស្ត្រ​របស់​សមាគម ព្រោះ​កន្លង​មក​សមាគម​មិន​ដែល​ធ្លាប់​នាំ​ចេញ​បាន​ដល់ ​១១៤​ តោន​បែប​នេះ​ទេ ធ្លាប់​នាំ​ចេញ​បាន​តែ​ក្នុង​រង្វង់ ​៧០ ​តោន​ប៉ុណ្ណោះ ​។

លោក ងួ​ន ឡាយ គូសបញ្ជាក់​ថា ​ឆ្នាំ​ ២០២២​ នេះ ទីផ្សារ​របស់​ម្រេច​កំពត​មាន​ក្រុមហ៊ុន​បាន​ធ្វើ​កិច្ចសន្យា​ជាមួយ​ប្រជា​កសិករ​ដាំ​ម្រេច​ខ្នាត​តូច ​និង​មធ្យម​មាន​ប្រមាណ​ ៨០ ​តោន ​។​ ឆ្នាំ​ ២០២២​ នេះ​បង្ហាញ​ថា ​ទីផ្សារ​កាន់តែ​ល្អ​ជាង​ឆ្នាំ ​២០២១ ​ហើយ​តម្លៃ​លក់​ចេញ​ គឺ​នៅ​តែ​រក្សា​បាន​ថ្លែ​ដូច​កាលពីដើម​ ។

តម្លៃ​ម្រេច​វិញ ម្រេចខ្មៅ​ថ្លៃ​ ១៥ ​ដុល្លារ​,​ ម្រេច​ក្រហម ​២៥​ ដុល្លារ​ និង​ម្រេច ស តម្លៃ ​២៨ ​ដុល្លារ​អា​មេ​រិ​ក​ក្នុង​មួយ​គីឡូក្រាម​ ​។​ ប្រធាន​សមាគម​លើកកម្ពស់​ម្រេច​កំពត និយាយ​ថា​ ក្នុង​រយៈពេល​ ២​ ឆ្នាំ​មកនេះ​ទោះបី​មាន​កើត​ជំងឺ​កូ​វី​ដ​ ១៩ ក៏​ដោយ​សម្រាប់​ម្រេច​កំពត​នៅ​តែ​មាន​ទីផ្សារ​ល្អ​ ៕

អត្ថបទសរសេរ ដោយ

កែសម្រួលដោយ