រាជធានីភ្នំពេញ ៖ គិតត្រឹមដំណាច់ឆ្នាំ ២០២១ កម្ពុជាមានសន្និធិបំណុលសាធារណៈសរុបចំនួន ៩,៤៩ ពាន់លានដុល្លារអាមេរិក សុទ្ធសឹងតែជាបំណុលសាធារណៈក្រៅប្រទេស ខណៈបំណុលសាធារណៈក្នុងប្រទេស ត្រូវបានទូទាត់បញ្ចប់ទាំងស្រុងកាលពីថ្ងៃទី…
រាជធានីភ្នំពេញ ៖ គិតត្រឹមដំណាច់ឆ្នាំ ២០២១ កម្ពុជាមានសន្និធិបំណុលសាធារណៈសរុបចំនួន ៩,៤៩ ពាន់លានដុល្លារអាមេរិក សុទ្ធសឹងតែជាបំណុលសាធារណៈក្រៅប្រទេស ខណៈបំណុលសាធារណៈក្នុងប្រទេស ត្រូវបានទូទាត់បញ្ចប់ទាំងស្រុងកាលពីថ្ងៃទី ១១ ខែកុម្ភៈ ឆ្នាំ២០២០ កន្លងទៅ ។
យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយកាលពីពេលថ្មីៗនេះ បញ្ជាក់ថា តាមលទ្ធផលបឋមនៃការសិក្សាវិភាគចីរភាពបំណុលបង្ហាញថា បើទោះបីជាសេដ្ឋកិច្ចកម្ពុជាទទួលផលប៉ះពាល់ពីការរីករាលដាលនៃកូវីដ ១៩ ក្ដី ក៏ស្ថានភាពបំណុលសាធារណៈកម្ពុជា នៅតែបន្តរក្សាបាននូវចីរភាព និងហានិភ័យទាប ដោយរាល់សូចនាករបំណុលគន្លឹះៗទាំងអស់ ឆ្នាំ ២០២១ សុទ្ធតែស្ថិតក្រោមអនុបាតគោល ក្នុងនោះសូចនាករសំខាន់ជាងគេ គឺអនុបាតតម្លៃបច្ចុប្បន្ននៃបំណុលសាធារណៈក្រៅប្រទេស ធៀបនឹងផសស ស្ថិតនៅកម្រិត ២៤,៤ ភាគរយ ធៀបនឹងអនុបាតគោល ៤០ ភាគរយ ។
ក្រសួងអះអាងថា ទោះបីជាកម្ពុជា បានជួបវិបត្តិនឹងស្ថានភាពកូវីដ ១៩ យ៉ាងនេះក្តី ក៏កម្ពុជាបានទូទាត់បំណុលជូនដៃគូអភិវឌ្ឍន៍សរុបបានចំនួន ៣៨២,៧៨ លានដល្លារអាមេរិក ក្នុងនោះប្រាក់ដើមមានចំនួន ២៨៥,៦៦ លានដុល្លារអាមេរិក និងការប្រាក់ និងកម្រៃផ្សេងៗមានចំនួន ៩៧,១២ លានដុល្លារអាមេរិក ។
បើគិតចាប់តាំងឆ្នាំ ១៩៩៣ រហូតមកដល់ឆ្នាំ ២០២១ រាជរដ្ឋាភិបាលបានទូទាត់សេវាបំណុលជូនដៃគូអភិវឌ្ឍន៍សរុបចំនួន ២,៤៦ ពាន់លានដុល្លារអាមេរិក ក្នុងនោះ ក្របខ័ណ្ឌបំណុលសាធារណៈ ក្នុងប្រទេសមានចំនួនប្រមាណ ១ ភាគរយ ត្រូវនឹងប្រមាណ ២២,៨៣ លានដុល្លារអាមេរិក ប្រាក់ដើម ១៩,៧២ លានដុល្លារអាមេរិក និងការប្រាក់ ៣,១១ លានដុល្លារអាមេរិក និងក្របខ័ណ្ឌបំណុលសាធារណៈក្រៅប្រទេស មានចំនួន ៩៩ ភាគរយ ត្រូវនឹងប្រមាណ ២,៤៤ ពាន់លានដុល្លារអាមេរិក ក្នុងនោះប្រាក់ដើម ១,៦០ ពាន់លានដុល្លារអាមេរិក និងការប្រាក់ និងកម្រៃផ្សេងៗមាន ៨៣៨,៧០ លានដុល្លារអាមេរិក ៕
ចែករំលែកព័តមាននេះ