ច្រាំងទន្លេក្រុងកំពង់ចាម រងការបាក់ស្រុតច្រើនកន្លែង
ខេត្តកំពង់ចាម ៖ ច្រាំងទន្លេចាប់ពីត្រង់ចំណុចមុខសណ្ឋាគារមេគង្គ និងចំណុចមុខខណ្ឌរដ្ឋបាលជលផលខេត្តបានបាក់ស្រុតនាពេលកន្លងមក បង្កឲ្យពលរដ្ឋដែលមានផ្ទះ
ខេត្តកំពង់ចាម ៖ ច្រាំងទន្លេចាប់ពីត្រង់ចំណុចមុខសណ្ឋាគារមេគង្គ និងចំណុចមុខខណ្ឌរដ្ឋបាលជលផលខេត្តបានបាក់ស្រុតនាពេលកន្លងមក បង្កឲ្យពលរដ្ឋដែលមានផ្ទះនៅតាមមាត់ទន្លេមានក្តីកង្វល់ខ្លាចបាក់ដល់ផ្ទះរបស់ពួកគាត់។ ច្រាំងទន្លេនេះ ត្រូវបានក្រសួងធនធានទឹក ចំណាយថវិការាប់រយលានរៀល ដើម្បីសាងសង់ច្រាំងទន្លេពីបេតុងរឹងមាំ ហើយខ្ពស់ការពារមិនឲ្យទឹកទន្លេជន់លិចក្រុងកំពង់ចាមកើតទៀតនោះទេ តែការរៀបជញ្ជាំងបេតុងនោះ ត្រូវបានពលរដ្ឋរិះគន់ថា បានធ្វើកេងនូវលក្ខណៈបច្ចេកទេសខ្លះមិនបាន១០០ភាគរយ។
លោក ចាន់ ផល្លី អភិបាលក្រុងកំពង់ចាម បានប្រាប់ឲ្យដឹងនៅព្រឹកថ្ងៃទី១៧ ខែសីហានេះថា នាពេលកន្លងមកនៅពេលដែលរដូវទឹកទន្លេមេគង្គឡើងម្តងៗនោះ បានធ្វើឲ្យទឹកហៀរចូលមកលិចតាមផ្លូវមាត់ទន្លេ ជួនពេលខ្លះ ត្រូវបានដាក់បារាសមិនឲ្យមានយានយន្តបើកឆ្លងកាត់នោះទេ ព្រោះតែនាំឲ្យបង្កខូចផ្លូវថ្នល់។ ហើយអាជ្ញាធរគ្រប់លំដាប់ថ្នាក់ ព្រមទាំងស្ថាប័នពាក់ព័ន្ធ មាននគរបាល កងរាជអាវុធហត្ថ និងទាហាន រាប់រយពាន់នាក់ បាននាំគ្នាច្រកបាវខ្សាច់ទប់ទឹកតាមមាត់ទន្លេ ដើម្បីចៀសវាងកុំឲ្យទឹកហូរចូលលិចក្រុងកំពង់ចាម។
លោក ចាន់ ផល្លី អភិបាលក្រុងកំពង់ចាមបានបន្តថា ដោយសារតែចរន្តទឹកទន្លេក្នុងរដូវវស្សាបានហូរខ្លាំងពេកនោះធ្វើឲ្យហូរច្រោះដីផ្នែកខាងក្រោម បាក់ច្រាំងទន្លេត្រង់ចំណុចមុខសណ្ឋាគារកាលពេលកន្លងមក សូម្បីតែសំណង់អាគារលក់ដូរ ក៏ត្រូវបានបាក់ស្រុតដែរ តែមិនមានគ្រោះថ្នាក់ដល់មនុស្សទេ។ ច្រាំងទន្លេបានបន្តបាក់រហូតដល់ត្រង់ចំណុច មុខខណ្ឌរដ្ឋបាលជលផលខេត្តរាប់រយម៉ែត្រ ត្រូវបានថ្នាក់ដឹកនាំខេត្តបានចុះមកពិនិត្យមើលក្នុងរដូវប្រាំងឆ្នាំ២០១៥។
ក្រសួងធនធានទឹកនិងឧតុនិយម បានចំណាយប្រាក់ជាច្រើន ដើម្បីសាងសង់ច្រាំងទន្លេពីបេតុង ចាប់ផ្តើមក្បែរមុខសណ្ឋារមេគង្គប្រវែង២១០ម៉ែត្រ ហើយមកដល់ឆ្នាំ២០១៦ ក៏បានចាប់ផ្តើមធ្វើបន្តទៀត ត្រង់មុខខណ្ឌជលផលខេត្តរហូតដល់ក្រោមស្ពានគីហ្ស៊ុណា មានប្រវែង១៨០ម៉ែត្រ ដែលកំពុងតែដំណើរការធ្វើជិតរួចរាល់ហើយ ដែលច្រាំងបេតុងនោះ ធ្វើខ្ពស់ជាងនីវ៉ូទឹក ទន្លេមេគង្គ ដើម្បីការពារកុំឲ្យទឹកលិចចូលក្រុងកំពង់ចាម។ពលរដ្ឋម្នាក់បានលើកហេតុផលថា ច្រាំងបេតុងត្រង់ដើមជ្រៃជិតគល់ស្ពានគីហ្ស៊ុណា គាត់ឃើញជាងសំណង់បូកស៊ីម៉ងត៍តែខាងក្រៅ ចំណែកខាងក្នុងវិញមិនបានបូកនោះទេ ពោលគឺគេចាក់ដីយកតែម្តងតាមលក្ខណៈបច្ចេកទេសត្រូវតែបូកស៊ីម៉ង់ត៍ទាំងសងខាងការពារកុំឲ្យពេលដែលទឹកទន្លេឡើងមកជ្រាបបាន តែនេះទំនងជាងធ្វើកេងយកចំណេញទើបបាត់បង់នូវគុណភាព។
នារសៀលថ្ងៃទី១៧ ខែសីហា ឆ្នាំ២០១៦នេះ លោក អ៊ុំ វិបុល ប្រធានមន្ទីរធនធានទឹក និងឧតុនិយមខេត្ត បានប្រាប់ឲ្យដឹងដែរថា ចំពោះមូលហេតុដែលរូបលោកមិនឲ្យជាងបិទស៊ីម៉ង់ត៍ពីក្នុងដោយសារតែ ឥដ្ឋត្រូវបានរៀបឡើង៣តឹក ហើយត្រង់កណ្តាលត្រូវបានបិទស៊ីម៉ងត៍ជិត ហេតុដូច្នេះហើយទឹកមិនអាចជ្រាបកើតនោះទេ គម្រោងចុងក្រោយប្រវែង១៨០ម៉ែត្រនេះ ត្រូវចំណាយទឹកប្រាក់ចន្លោះពី៦០ទៅ៧០ម៉ឺនដុល្លារថែមទៀត ៕
ចែករំលែកព័តមាននេះ