រាជធានីភ្នំពេញ ៖ បើគិតមកត្រឹមវេលារសៀលថ្ងៃទី១៦ ខែសីហា ឆ្នាំ២០១៦នេះ សពស្ត្រីម្នាក់ដែលត្រូវអតីតប្តីចុងអារកសម្លា.ប់ព្រោះតែការសុំរួមរស់នៅជាមួយគ្នាវិញមិនបាន
រាជធានីភ្នំពេញ ៖ បើគិតមកត្រឹមវេលារសៀលថ្ងៃទី១៦ ខែសីហា ឆ្នាំ២០១៦នេះ សពស្ត្រីម្នាក់ដែលត្រូវអតីតប្តីចុងអារកសម្លាប់ព្រោះតែការសុំរួមរស់នៅជាមួយគ្នាវិញមិនបាន នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ នោះត្រូវបានបូជារួចរាល់ជាស្ថាពរហើយ នៅឈាបនដ្ឋាន នៃវត្តសំបួរមាស ស្ថិតក្នុងភូមិសាស្ត្រសង្កាត់ដង្កោ ខណ្ឌដង្កោ រាជធានីភ្នំពេញ ដោយមានការចូលរួមសោកស្តាយពីក្រុមគ្រួសារសាច់ញាតិផងដែរ។
នៅក្នុងឱកាសខាងលើនេះលោកស្រី កែ ចាន់ដួង តំណាងលោកជំទាវ ម៉ក់ វណ្ណស៊ីថា ប្រធានមន្ទីរកិច្ចការនារីដើម្បីអភិវឌ្ឍន៍សង្គម រាជធានីភ្នំពេញ អមដំណើរដោយលោកស្រី ចន គន្ធា ប្រធានសមាគមន៍នារី ខណ្ឌមានជ័យ និងលោក សេង សាញ់ ចៅសង្កាត់ស្ទឹងមានជ័យ បានយកបច្ច័យទៅចូលរួមបុណ្យសព ដើម្បីជាការចូលរួមរំលែកទុក្ខប្រជាពលរដ្ឋក្នុងមូលដ្ឋាន។
ថវិកាគណៈកម្មាធិការសាខាសមាគមន៍នារីរាជធានីចំនួន៥០ម៉ឺនរៀល លោកស្រី ចន គន្ធា ប្រធានសមាគមន៍នារីប្រចាំខណ្ឌ និង ភរិយាលោក ពេជ្យ កែវមុនី អភិបាលនៃគណៈអភិបាលខណ្ឌមានជ័យ បានចូលរួមរំលែកទុក្ខនូវបច្ច័យចំនួន៤០ម៉ឺនរៀល លោក សេង សាញ់ ចៅសង្កាត់ស្ទឹងមានជ័យ រួមទាំងសមាជិកក្រុមប្រឹក្សាសង្កាត់ បានចូលរួមរំលែកទុក្ខដល់គ្រួសារនៃសពនូវបច្ច័យចំនួន២០ម៉ឺនរៀលផងដែរ។
គួររំលឹកថា ស្ត្រីរងគ្រោះខាងលើមានឈ្មោះ សុខ សុឃិន ភេទស្រី អាយុ៤០ឆ្នាំ មុខរបរជាថៅកែម៉ាស្សានៅកន្លែងកើតហេតុ និងមានស្រុកកំណើតនៅភូមិវាល ឃុំចាម ស្រុកកំពង់ត្របែក ខេត្តព្រៃវែង។ រូបនាងត្រូវបាន អតីតបុរសជាប្តីចុង លបលួចកាត់ដំបូលផ្ទះ ចូលមកអារកសម្លាប់ ដោយប្រើកាំបិតប៉័ងតោធំមួយ បណ្តាលឲ្យដេកស្លាប់ក្នុងថ្លុកឈាម កាលពីវេលាម៉ោង១២និង៣០នាទីរំលងអាធ្រាត្រ ឈានចូលថ្ងៃទី១៦ ខែសីហា ឆ្នាំ២០១៦ នៅចំណុចផ្ទះម៉ាស្សា សុខវិសាល១២៦ ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ ព្រោះតែបុរសជាអតីតប្តីសុំរួមរស់នៅជាមួយគ្នាវិញពុំបាន ក្រោយប្រេះឆាស្នេហាជាង២ខែកន្លងមក។
ចំណែកឯបុរសជាអតីតប្តីចុងមានឈ្មោះ ទុន ធាវី អាយុ៤៥ឆ្នាំ មានមុខរបររត់ម៉ូតូឌុបស្នាក់នៅផ្ទះជួល ក្រោយពីធ្វើឃាតប្រពន្ធរួច ក៏គេចខ្លួនបាត់ស្រមោលតែម្តង៕
ចែករំលែកព័តមាននេះ