រាជធានីភ្នំពេញ ៖ រថយន្ត២គ្រឿងបើកក្នុងល្បឿនលឿនដូចគ្នាបានបុកគ្នាយ៉ាងពេញទំហឹងបណ្ដាលឲ្យរថយន្ត១គ្រឿងជ្រុលទៅបុកទម្លុះទ្វាររូត២ជាន់បុកចូលទៅផ្ទះលក់កាហ្វេ គុយទាវ
រាជធានីភ្នំពេញ ៖ រថយន្ត២គ្រឿងបើកក្នុងល្បឿនលឿនដូចគ្នាបានបុកគ្នាយ៉ាងពេញទំហឹងបណ្ដាលឲ្យរថយន្ត១គ្រឿងជ្រុលទៅបុកទម្លុះទ្វាររូត២ជាន់បុកចូលទៅផ្ទះលក់កាហ្វេ គុយទាវ បណ្ដាលឲ្យម្ចាស់ផ្ទះភ័យស្ទើរលស់ព្រលឹងគ្រប់ៗគ្នា ។
ហេតុការណ៍នេះកើតឡើងកាលពីវេលាម៉ោង១ និង១៤នាទីយប់រំលងអាធ្រាត្រឈានចូលថ្ងៃទី១៥ ខែសីហា ឆ្នាំ២០១៦ នៅចំណុចផ្ទះលក់កាហ្វេ គុយទាវ យីហោ វេង លី ចំណុចផ្លូវលេខ១៦៣ កែងផ្លូវលេខ៤៣២ សង្កាត់ទួលទំពូង១ ខណ្ឌចំការមន ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តម៉ាក ស៊ីណា ពណ៌ស ពាក់ស្លាកលេខ ភ្នំពេញ 2AC 8209 ធ្វើដំណើរតាមផ្លូវលេខ១៦៣ ទិសដៅពីជើងទៅត្បូង ក្នុងល្បឿនលឿន ខណៈមកដល់ចំណុចកើតហេតុ ដែលជាផ្លូវបំបែកជាបួន ក៏ស្រាប់តែមានរថយន្តម៉ាកកាមរីបាឡែន ពណ៌កណ្តុរល្មែះ ពាក់ស្លាកលេខ ភ្នំពេញ 2AG 6525 ធ្វើដំណើរតាមផ្លូវលេខ៤៣២ ទិសដៅពីកើតទៅលិច ក្នុងល្បឿនលឿនដូចគ្នា ក៏ជ្រុលទៅបុករថយន្តម៉ាកស៊ីណាចំថ្ពាល់ខាងមុខចំហៀងខាងឆ្វេងពេញទំហឹង ធ្វើរថយន្តស៊ីណារេចង្កូតទៅបុកចូលផ្ទះលក់កាហ្វេ និងគុយទាវ យីហោ វេង លី ធ្លុះទ្វាររូត២ជាន់ បុករះម៉ូតូ៤គ្រឿង ម៉ាក PCX ១គ្រឿង ម៉ាកស្តេប១គ្រឿង ម៉ាកហុងដាឌ្រីម១គ្រឿង ម៉ាកកូនទា១គ្រឿង និងតុ កៅអី ទូ និងសម្ភារគ្រឿងទេសសម្រាប់លក់ដូរខ្ទេចខ្ទីអស់មួយចំនួនទៀត តែមិនបណ្តាលមានអ្នករងរបួសឡើយ ហើយភ្លាមៗនោះអ្នកបើកបររថយន្តបានរត់គេចខ្លួនបាត់ ។ ដោយឡែកខាងរថយន្តបង្កកាមរីបាឡែន ឃើញសភាពដូចនេះក៏បានបន្ថែមល្បឿនបើករត់គេចខ្លួនបាត់ស្រមោល ដោយបន្សល់ទុកស្លាកលេខនៅកន្លែងកើតហេតុ ។
ក្រោយពេលហេតុរថយន្តបង្កត្រូវសមត្ថកិច្ចស្ទូចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីទុកធ្វើការដោះស្រាយនៅពេលក្រោយ ៕
ចែករំលែកព័តមាននេះ