ខេត្តប៉ៃលិន ៖ សួនកុមារដែលមានទីតាំងនៅទល់មុខសាលាខេត្តប៉ៃលិន ក្បែរវិមានឯករាជ្យ ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន មានប្រជាពលរដ្ឋក្មេងចាស់ប្រុស ស្រីជាច្រើននាក់
ខេត្តប៉ៃលិន ៖ សួនកុមារដែលមានទីតាំងនៅទល់មុខសាលាខេត្តប៉ៃលិន ក្បែរវិមានឯករាជ្យ ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន មានប្រជាពលរដ្ឋក្មេងចាស់ប្រុស ស្រីជាច្រើននាក់ នាំគ្នាទៅលេងកម្សាន្តយ៉ាងសប្បាយរីករាយបំបាត់នូវក្តីកង្វល់និងអផ្សុកក្នុងអារម្មណ៍ ខណៈអ្នកលក់ដូរគ្រប់ប្រភេទនៅជុំវិញសួនកុមារនោះក៏លក់ដាច់កាក់កបគួរឱ្យកត់សម្គាល់ដែរ ។
ប្រភពព័ត៌មានពីអ្នកទៅលេងកម្សាន្តនៅសួនកុមារនេះបានឱ្យដឹងថា លោក កើត សុធា អភិបាលខេត្ត បានរៀបចំសណ្តាប់ធ្នាប់នៅក្នុងក្រុងប៉ៃលិនឱ្យមានភាពទាក់ទាញ ដោយនៅតាមដងផ្លូវក្នុងក្រុងមានដាក់ភ្លើងហ្វា ចម្រុះពណ៌ ដើម្បីបំភ្លឺផ្លូវ ចាប់តាំងពីក្បាលល្ងាចរហូតដល់ភ្លឺទើបបិទ ។ ចំណែកនៅតាមសួនកុមារមានតុបតែងភ្លើងចម្រុះពណ៌ផ្សេងៗ ហើយកាលពីពេលថ្មីៗនេះ មានគេដាក់ល្បែងកម្សាន្តសម្រាប់កុមារតូចៗដូចជា ស៊ីក្លូជួលជិះលេង ពោងលោតលេង ហើយក៏មានការរាំហាត់ប្រាណរបស់ស្ត្រីចាស់ៗដើម្បីសុខភាពផងដែរ ។ ដោយសារបែបនេះហើយ ទើបធ្វើឱ្យសួនកុមារកាន់តែអ៊ូអរ មានមនុស្សក្មេងចាស់រាប់រយនាក់ទៅលេងស្ទើររាល់ល្ងាច ជាពិសេសនៅថ្ងៃសៅរ៍ និងថ្ងៃអាទិត្យចុងសប្តាហ៍ មានមនុស្សទៅលេងកម្សាន្តច្រើនណាស់ ។
ប្រភពដដែលបន្តទៀតថា ដូច្នេះហើយ ទើបមានប្រជាពលរដ្ឋមួយចំនួនបានយកគ្រឿងហូបដូចជាប្រហិតចៀន សាច់គោអាំង សាច់មាន់ចង្កាក់អាំង មឹកអាំង ពោតស្ងោរ ការ៉េម មីឆា ពងមាន់ ពងទាកូនជាដើម ដាក់លក់យ៉ាងព្រោងព្រាត ហើយអ្នកលក់ដូរម្នាក់ៗបានចំណេញប្រាក់ជាច្រើន ក៏បបួលគ្នាដាក់លក់បន្តបន្ទាប់ថែមទៀតផង ។
រីឯអ្នកមកលេងកម្សាន្តវិញ និយាយថា ជារៀងរាល់ល្ងាចពិសេសចុងសប្តាហ៍ ពួកគាត់តែងតែនាំប្រពន្ធកូនមកលេងកម្សាន្តនៅសួនកុមារនេះ ដើម្បីបំបាត់ភាពធុញថប់ ទុក្ខព្រួយ និងអស់កម្លាំង បន្ទាប់ពីបំពេញការងាររៀងៗខ្លួន។ ម្យ៉ាងវិញទៀត កូនៗរបស់ពួកគាត់ក៏សប្បាយរីករាយក្នុងចិត្តនឹងរបស់លេងជាច្រើនដូចជាជិះពោង ជិះស៊ីក្លូ និងរត់លេងនៅសួនកុមារផងដែរ ដោយក្មេងខ្លះមិនចង់ត្រឡប់ទៅផ្ទះវិញឡើយ ។
ចំណែកអ្នកខ្លះទៀតលាន់មាត់ថា ក្រុងប៉ៃលិនឥឡូវនេះពិតជាមិនធម្មតាមែន ពោលគឺមានភាពសម្បូរសប្បាយជាងមុនឆ្ងាយណាស់ បើទោះបីជាកសិករមួយចំនួនមានការលំបាកនឹងកសិផលចុះថោកបន្តិចក៏ដោយ តែពួកគាត់ពិតជាមានសេចក្តីសុខសាន្តជួបជុំគ្រួសារ មិនគិតខ្វល់ពីបញ្ហាសង្គ្រាមរត់លូនដូចកាលពីប៉ុន្មានឆ្នាំមុន ឬព្រួយអត់អាហារទទួលទាននោះទេ ៕
ចែករំលែកព័តមាននេះ