រាជធានីភ្នំពេញ ៖ ជាមួយម៉ូតូដែលមានធុងដាក់សម្ភារសម្រាប់ជួសជុលរថយន្តដឹកពីក្រោយ លោក ម៉េង សាន បានធ្វើដំណើរទៅរកកន្លែងដែលរថយន្តខូច ដែលម្ចាស់គេបានទូរស័ព្ទហៅលោកឱ្យទៅជួសជុល ខុសពីជាងជួសជុលរថយន្តផ្សេង ដែលគេមានយានដ្ឋាន…
រាជធានីភ្នំពេញ ៖ ជាមួយម៉ូតូដែលមានធុងដាក់សម្ភារសម្រាប់ជួសជុលរថយន្តដឹកពីក្រោយ លោក ម៉េង សាន បានធ្វើដំណើរទៅរកកន្លែងដែលរថយន្តខូច ដែលម្ចាស់គេបានទូរស័ព្ទហៅលោកឱ្យទៅជួសជុល ខុសពីជាងជួសជុលរថយន្តផ្សេង ដែលគេមានយានដ្ឋាន ឬរោងជាងជួសជុលនៅមួយកន្លែង ។ មិនថា នៅកន្លែងណាឱ្យតែលោកអាចទៅបាន មានពេលទំនេរអាចទៅជួសបាន គឺទៅជួសជុលឱ្យអតិថជនមិនឱ្យខកបំណងឡើយ ។
ជាមួយសេវាកម្មល្អ ការជួសជុលប្រកបដោយគុណភាព លោក ម៉េង សាន ទទួលបានការគាំទ្រពីអតិថជនជានិច្ច ពិសេសនៅពេលដែលបណ្តាញទំនាក់ទំនងសង្គម Facebook ប្រើប្រាស់យ៉ាងទូលំទូលាយដូចពេលបច្ចុប្បន្ននេះសេវាកម្មដែលជាងរថយន្តជាច្រើនមិនសូវអនុវត្តនេះ បានឱ្យលោក ម៉េង សាន កាក់កបនៅក្នុងការជួសជុលរថយន្តចល័តនេះ ។ តាមពិតទៅលោក សាន ដែលមានវ័យជាង ៥០ ឆ្នាំ គាត់បានប្រកបរបរនេះប្រមាណជាង ២០ ឆ្នាំមកហើយ ។
«រយៈពេលជាង ២០ ឆ្នាំមកហើយដែលខ្ញុំបានចាប់យកមុខរបរជាងជួសជុលរថយន្តចល័តនេះ ក្រោយពីខ្ញុំបានរៀនជំនាញនេះនៅម្តុំផ្សារតូចខាងជើងស្ពានជ្រោយចង្វា ។ ជាទូទៅខ្ញុំជួសជុលគ្រឿងក្រោមរថយន្តខូចមិនទៅមុខ ។ ប៉ុន្តែបើប្រភេទរថយន្តសាំយ៉ុង វិញមិនថា គ្រឿងក្រោម ឬគ្រឿងលើនោះទេ គឺធ្វើបានទាំងអស់ ។ ដោយសារយើងមានជំនាញច្បាស់លាស់ ជួសជុលហើយគេអាចប្រើប្រាស់បានយូរ ហើយតម្លៃវិញសមរម្យ មិនថ្លៃពេក បានធ្វើឱ្យម្ចាស់ឡានទទួលស្គាល់ហើយពេលខូចម្តងៗគេទូរស័ព្ទហៅឱ្យទៅធ្វើឱ្យគេជានិច្ច» លោក ម៉េង សាន រៀបរាប់ឱ្យដឹង ។
លោក ម៉េង សាន មានស្រុកកំណើតនៅស្រុកអូរាំងឪ ខេត្តកំពង់ចាម បច្ចុប្បន្នស្នាក់នៅសហគមន៍បឹងទំពុន ។លោកមានកូនប្រុសស្រី ៣ នាក់នៅក្នុងបន្ទុក ។ លោកបានឱ្យដឹងថា ក្នុងមួយថ្ងៃៗមិនដែលថា អត់រថយន្តជួសជុលនោះទេ យ៉ាងហោចណាស់មានរថយន្តពី ៤ ទៅ ៥ គ្រឿនខូចហៅលោកទៅជួសជុល ។
ជាមធ្យមក្នុងមួយថ្ងៃលោកអាចរកចំណូលបា ៦០ ទៅ ៧០ ដុល្លារ ។ ដោយមិនលាក់លៀមលោកនិយាយថា ក្នុងមួយខែលោកអាចរកចំណូលពី ១០០០ ទៅ ២០០០ ដុល្លារ ។ «មុខរបរជួសជុលរថយន្តចល័តនេះទាមទារឱ្យមានភាពអំណត់ជាខ្លាំង ដោយសារពេលចេញទៅជួសជុលរថយន្តឱ្យគេ យើងជួបឧបសគ្គជាច្រើន ជួនកាលផ្លូវឆ្ងាយ ជូនកាលនៅកន្លែងជួសជុលនោះយើងខ្វះនេះខ្វះនោះ មិនដូចការដែលយើងមានកន្លែងជួសជុលផ្ទាល់ឡើយ» ។
ជារៀងរាល់ថ្ងៃលោក ម៉េង សាន តែងតែចេញពីផ្ទះនៅម៉ោង ៥ ព្រឹក ។ ជាទូទៅលោកចេញទៅជួសជុលរថយន្តឱ្យគេនៅជុំវិញក្រុងភ្នំពេញ ។ ដោយសារតែមុខរបរជួសជុលរថយន្តចល័តនេះបានធ្វើឱ្យគ្រួសារលោកមានជីវភាពសមរម្យ ។ ចំណែកកូនប្រុស ស្រីទាំងបីនាក់បានរៀនសូត្រខ្ពង់ខ្ពស់ និងមានមុខរបរត្រឹមត្រូវចិញ្ចឹមជីវិតផងដែរ ៕
ចែករំលែកព័តមាននេះ