រាជរាធានីភ្នំពេញ៖ ​​យោងទៅតាមទិន្នន័យរបស់អង្គការអង្កេតផ្នែកសុខភាព ​​និងប្រជាសាស្ត្រកម្ពុជា​ហៅកាត់ថា(CDHS) ​​ឆ្នាំ២០១៤ របស់ក្រសួងសុខាភិបាល ​​និងក្រសួងផែនការបានឲ្យដឹងថា​ ​៣២%នៃកុមារកម្ពុជា ​​ដែលមានអាយុក្រោម៥ឆ្នាំ ​​មានបញ្ហាកម្ពស់​មិនស្របនឹងវ័យ​ (ក្រិន)។

CDHS បន្តថា ​ដើម្បីធានាដល់ការលូតលាស់ជាអតិបរមា​និងចៀសសផុតពីជំងឺក្រិន​ មាតាបិតាគ្រប់រូបគួរតែ​យកចិត្តទុកដាក់អំពីការ​ផ្តល់​សារធាតុ​កាល់ស្យូមឲ្យ ​បានគ្រប់គ្រាន់ជាពិសេសក្នុងរយៈពេល ​១០០០ថ្ងៃដំបូងនៃជីវិត។​ ទិន្នន័យបានឲ្យដឹងថា ​បន្ទាប់ពីការ​ផ្តល់​កំណើតដល់បុត្រធីតា​ដោយសុវត្ថិភាពហើយនោះ​ ឳពុកម្តាយគ្រប់រូបតែងតែ​ចង់ឲ្យបុត្រធីតារបស់ខ្លួនពេលធំ​ឡើងមាន​កម្ពស់​ខ្ពស់​ស្រស់សង្ហានិងឆ្អឹងរឹងមាំ​ ក៏ប៉ុន្តែពេលខ្លះពួកគាត់​មិនបានយកចិត្តទុកដាក់អំពី​របបអាហាររបស់កូនៗ ​ដែលអាចជះ​ឥទ្ធិពល​អាក្រក់ដល់ការលូតកម្ពស់​ និងឆ្អឹងរបស់កូនតាំង​ពីវ័យកុមារភាព។

អង្គការអង្កេតផ្នែកសុខភាព​ និងប្រជាសាស្ត្រកម្ពុជាបានបញ្ជាក់ថា​ មាតាបិតាគ្រប់រូបគប្បីផ្តល់​អាហារដែលសម្បូរ​សារធាតុ​កាល់ស្យូម​​​​​តាំងពីកូនរបស់ខ្លួននៅក្នុងផ្ទៃមកម្ល៉េះ ​ហើយវារឹតតែសំខាន់ថែមទៀតនៅ​ពេលកុមារស្ថិតក្នុងវ័យលូតលាស់។​ អ្វីដែលរឹត​តែ​គួរ​ឲ្យព្រួយបារម្ភនោះគឺ ​កុមារខ្លះរើសចំណីនិងមិនចូលចិត្ត​បរិភោគបន្លែបៃតងចាស់ដែលជាប្រភព​នៃសារធាតុកាល់ស្យូម។

កាល់ស្យូមជាសារធាតុមួយ​ដែលជីវិតត្រូវការជាចាំបាច់​ ដែលមិនត្រូវមើលរំលងជាពិសេសសម្រាប់ការ​លូតលាស់ឆ្អឹង​ និងកម្ពស់​របស់កុមារ។ ​កាល់ស្យូមគឺជាសារធាតុរ៉ែដែលសំខាន់​សម្រាប់ការលូតលាស់ឆ្អឹងនិងធ្វើឲ្យឆ្អឹងរឹងមាំ ។​ ជាង៩៩%នៃកាល់ស្យូម​ផ្ទុកនៅក្នុងឆ្អឹងនិងធ្មេញ ​ហើយមានតួនាទីផ្សេងទៀតនៅក្នុង​រាង្គកាយរាប់បញ្ចូលទាំងមុខងារបេះដូង។​ ផ្ទុយទៅវិញប្រសិនបើខ្វះ​សារធាតុកាល់ស្យូម​ តើកុមារអាចទទួលរងផលវិបាក ​ដូចជាកុមារដែលមិនទទួលបានសារធាតុ​កាល់ស្យូមគ្រប់គ្រាន់អាចប្រឈម​មុខខ្លាំងជាមួយបញ្ហានៃការលូតលាស់ឆ្អឹងនិងធ្មេញ ​ជាពិសេសប្រឈមជាមួយ​រោគក្រិស និងក្រិន ។

CDHS បញ្ជាក់ថា​ រោគក្រិសស្តែងឡើង​ដោយមានភាព​មិនប្រក្រតីនៃការរីកលូតលាស់ឆ្អឹង​ ហើយភាគច្រើន​កើតមានចំពោះកុមារ។វាបណ្តាលមកពីកង្វះកាល់ស្យូម​ កង្វះវីតាមីនដេ​ កង្វះផូស្វាត ​និងមិនបានត្រូវពន្លឺថ្ងៃគ្រប់គ្រាន់ ​។ ជាទូទៅរោគក្រិសមានអការៈ​ដូចជា៖ឈឺឆ្អឹងដៃ ជើង​ ត្រគាក​ និង ខ្នង,ភាពក្រិន ​,បាក់ឆ្អឹង,រមួលក្រពើ,​ធ្មេញដុះមិនប្រក្រតី,​ទ្រង់ទ្រាយឆ្អឹងខុសប្រក្រតី,ប្រកាច់។ អ្នកដែលប្រឈមនឹង​រោគក្រិសមាន៖ទារកអាយុ(៦ទៅ៣៦ខែ),របបអាហារ​ (ទទួលទានបន្លែច្រើន ​ដោយគ្មានសាច់ ​ស៊ុត ទឹកដោះ​​)​,​ពណ៌សម្បុរ ​​(ស្បែកខ្មៅសំយោគវីតាមីនដេមិនបានល្អ),​រស់នៅតំបន់ដែលមិនសូវមានពន្លឺព្រះអាទិត្យ​,ពូជអម្បូរ ។ ​ទោះបីមាន​រោគសញ្ញាយ៉ាងណាក្តី ​មានវិធីសាស្ត្រអ្វីខ្លះដែលអាចការពាររោគក្រិន ​បានដូចជាទទួលទាន​អាហារសម្បូរកាល់ស្យូម​​,ទទួលទាន​អាហារសម្បូរវីតាមីនដេ,​ទទួលទានអាហារសម្បូរផូស្វ័រ,ចំណាយពេលខ្លះហាលថ្ងៃ ​។ ភាពក្រិន គឺស្តែងឡើង​ដោយមានកម្ពស់ទាប​បើធៀបជាមួយនឹងអាយុ ​ដោយសារតែមានការប៉ះពាល់ដល់​ការរីកលូតលាស់ពេលដែល​កុមារមិនបានទទួល​របបអាហារ ឬ   អាហា​រូបត្ថម្ភគ្រប់គ្រាន់​ ​ជាពិសេសជាតិកាល់ស្យូមក្នុង​១០០០ថ្ងៃដំបូងនៃជីវិត ។

អង្គការអង្កេតផ្នែកសុខភាព ​និងប្រជាសាស្ត្រកម្ពុជាសង្កត់ធ្ងន់​ទៀតថា​ ​​ដើម្បីសម្គាល់ថា​កូន​របស់​អ្នកមានការលូតកម្ពស់មិនប្រក្រតី មាតាបិតា​​គ្រប់រូបអាចតាមដានមើល ​ការលូតលាស់របស់កូនដោយផ្អែកលើប័ណ្ឌលឿង​ (ប័ណ្ឌចាក់ថ្នាំបង្ការ) ​របស់កូនដែល​ចេញ​ដោយមន្ទីរពេទ្យបាន ​ប្រសិនបើកូនៗរបស់អ្នកមានការលូតលាស់ ​មិនតាមស្តង់ដាររបស់ប័ណ្ឌលឿង​ សូមទៅពិគ្រោះជាមួយ​គ្រូពេទ្យកុមារ ​​។ មធ្យោបាយដើម្បីជៀសវាងនូវភាពក្រិនគឺ ​មាតាត្រូវទទួលទានអាហារូបត្ថម្ភឲ្យ​បានត្រឹមត្រូវមុនពេល ​អំឡុងពេល និងក្រោយពេលមានផ្ទៃពោះ,បំបៅដោះកូនឲ្យបានគ្រប់គ្រាន់​,មានអនាម័យល្អក្នុងការរស់នៅ ​។អាហារដែលសម្បូរជាតិ​កាល់ស្យូម​មានដូចជា៖​ ទឹកដោះគោស្រស់/ជូរ ​តៅហ៊ូ ទឹកសណ្តែក​ ត្រីសាឌីន ​និងបន្លែពណ៌បៃតងចាស់ដូចជា ​(ស្ពៃតឿ ខាត់ណា​ និងស្ពៃ Broccoli) ។ល។​ សារធាតុកាល់ស្យូមជួយដល់​ការលូតលាស់របស់កុមារមុនចូលសាលារៀន​ ព្រោះថា ​កុមារត្រូវការនូវអាហារ​បំប៉ន​​ក៏ដូចជា​អាហារូបត្ថម្ភជាច្រើនដើម្បីទ្រទ្រង់​ដល់ការលូតលាស់ទាំងផ្នែករាង្គកាយ ​ស្មារតី និងសតិបញ្ញា ។ ​ប្រសិនបើកុមារ ខ្វះជាតិកាល់ស្យូមរ៉ាំរ៉ៃ ​វានឹងធ្វើឲ្យសារធាតុរ៉ែរបស់ឆ្អឹងមិនប្រក្រតី ​ភាពរឹងមាំរបស់ឆ្អឹងថយចុះ​ ឬបាត់បង់ ​អាចបណ្តាលឲ្យមាន​ភាពក្រិន​ និង រោគក្រិស។

គួរបញ្ជាក់ថាបើយោងតាម​ National Academy Press ​ឆ្នាំ២០១០ ​បានណែនាំថា៖ កុមារអាយុចាប់ពី១ឆ្នាំ​ ទៅ៣ឆ្នាំត្រូវការ​កាល់ស្យូមចំនួន៧០០មិល្លីក្រាមជាប្រចាំថ្ងៃ។​ កុមារអាយុចាប់ពី៤ឆ្នាំ​ ទៅ៨ឆ្នាំត្រូវការកាល់ស្យូមចំនួន១០០០មិល្លីក្រាម ​ជាប្រចាំថ្ងៃ កុមារអាយុចាប់ពី៩ឆ្នាំ ​ទៅ១៨ឆ្នាំត្រូវការកាល់ស្យូម ​ចំនួន១៣០០មិល្លីក្រាម ​ជាប្រចាំថ្ងៃ ៕