ស្ថានភាពផ្លូវក្រុងព្រះសីហនុ ដែលជាតំបន់ខ្ពង់រាប គឺផ្លូវឡើងចុះតាមកម្ពស់ភ្នំ ដូច្នោះហើយយានយន្តនានាត្រូវតែគិតពីហ្វ្រាំងឱ្យបានម៉ត់ចត់ ព្រោះតម្រូវការប្រើប្រាស់ច្រើនបំផុតមិនដូចផ្លូវ
ខេត្តព្រះសីហនុ ៖ ស្ថានភាពផ្លូវក្រុងព្រះសីហនុ ដែលជាតំបន់ខ្ពង់រាប គឺផ្លូវឡើងចុះតាមកម្ពស់ភ្នំ ដូច្នោះហើយយានយន្តនានាត្រូវតែគិតពីហ្វ្រាំងឱ្យបានម៉ត់ចត់ ព្រោះតម្រូវការប្រើប្រាស់ច្រើនបំផុតមិនដូចផ្លូវរាបស្មើទេ ។
ឧទាហរណ៍ជាក់ស្តែងមួយ បុរសម្នាក់បើករថយន្តធុនយីឌុបមួយគ្រឿងចុះពីចំណោតវត្តលើ ខណៈរថយន្ដកំពុងតែដឹកធ្ងន់ផងនោះ ស្រាប់តែចុះដល់ពាក់កណ្ដាលផ្លូវបន្តិចជាន់ហ្វ្រាំងមិនស៊ីក៏ជ្រុលបុកចូលផ្ទះល្វែងពេញកម្លាំងបណ្ដាលឱ្យអ្នកបើកបររថយន្តរងរបួសល្មមហើយសំណាងល្អមិនបណ្ដាលឲ្យអ្នកធ្វើដំណើរតាមផ្លូវនោះមានគ្រោះថ្នាក់នោះទេ ។
ហេតុការណ៍នេះបានកើតឡើងនៅវេលាម៉ោង៤រសៀលថ្ងៃទី២៨ ខែកុម្ភៈ ឆ្នាំ២០២២ នៅតាមបណ្ដោយផ្លូវ៨០១ ស្ថិតក្នុងសង្កាត់លេខ២ ក្រុងព្រះសីហនុ ។
យោងតាមការបញ្ជាក់ពីអ្នកបើកបររថយន្ដផ្ទាល់បានឲ្យដឹងថា រថយន្តគាត់ជាប្រភេទរថយន្តធុនធ្ងន់ ពណ៌ខៀវ ពាក់ផ្លាកលេខ ភ្នំពេញ3D-8584 ចុះពីឃ្លាំងលើទៅតាមចំណោតផ្លូវបេតុងសំដៅមកមហោស្រពចាស់ ។ ខណៈពេលមកដល់កន្លែងកើតហេតុខាងលើ ជាន់ហ្វ្រាំងមិនជាប់ ក៏ជ្រុលចង្កូតទៅបុករថយន្តសាំយ៉ុង ១គ្រឿង ពាក់ផ្លាកលេខភ្នំពេញ 2S-4559 ហើយក៏មិនទាន់អស់ល្បឿនក៏ជ្រុលបុកចូលផ្ទះថ្មមួយល្វែង បណ្ដាលឲ្យរថយន្ដ១គ្រឿងទៀតម៉ាក Lexus LX570 ពណ៌ស្ករ ពាក់ផ្លាកលេខ ព្រះសីហនុ 2C-1515 ចំកាងក្រោយ ប៉ុន្តែខូចខាតបន្តិចបន្តួច និងសំណាងល្អដែលមិនបណ្ដាលឲ្យមនុស្សដែលធ្វើដំណើរនៅផ្លូវនោះមានគ្រោះថ្នាក់នោះទេ ។
ក្រោយពេលកើតហេតុសមត្ថកិច្ចនគរបាលចរាចរណ៍ផ្លូវគោកបាននាំយកម្ចាស់រថយន្តរួមទាំងវត្ថុតាងទាំងសងខាងទៅការិយាល័យចរាចរណ៍ផ្លូវគោករង់ចាំធ្វើការដោះស្រាយទៅតាមនីតិវិធី ៕
ចែករំលែកព័តមាននេះ