ទោះសាំងឡើងថ្លៃកម្ពុជា បាននាំសាំងចូលកើនឡើង
- ភ្នំពេញ
រាជធានីភ្នំពេញ ៖ ទោះថ្លៃ ឬថោកក៍តម្រូវការប្រេងឥន្ទនៈមិនអាចខ្វះបាន ។ កម្ពុជាមានកំណើនក្នុងការលំចូលប្រេងជាលំដាប់ ។ គិតត្រឹមខែតែមករា ឆ្នាំ ២០២២…
រាជធានីភ្នំពេញ ៖ ទោះថ្លៃ ឬថោកក៍តម្រូវការប្រេងឥន្ទនៈមិនអាចខ្វះបាន ។ កម្ពុជាមានកំណើនក្នុងការលំចូលប្រេងជាលំដាប់ ។ គិតត្រឹមខែតែមករា ឆ្នាំ ២០២២ នេះ ការនាំចូលប្រេងប្រេងឥន្ធនៈសម្រាប់ផ្គត់ផ្គង់តម្រូវការប្រើប្រាស់នៅក្នុងស្រុកមានជាង ២០ ម៉ឺនតោន ដែលឆ្លងកាត់តាមរយៈកំពង់ផែស្វ័យតក្រុងព្រះសីហនុ ។ ចំនួននេះ មានការកើនឡើងជាង ៤១% បើប្រៀបធៀបទៅនិងខែមករា ឆ្នាំ ២០២១ មានជាង ១៤ ម៉ឺនតោន ។ នេះបើតាមការឱ្យដឹងរបស់មន្ត្រីកំពង់ផែ ។
តម្រូវការប្រេងឥន្ទនៈកើនឡើងត្រូវគេមើលឃើញដោយសារកម្ពុជា មានតម្រូវការថាមពលផលិតពីប្រេងសាំងច្រើន នៅក្នុងនោះមានកំណើនយានជំនិះជាដើម ។ លោកបណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ចបានមើលឃើញពីជ្រុងមួយទៀតថា ការនាំចូលប្រេងឥន្ធនៈមានការកើនឡើងនេះក្នុងគោលបំណង ដើម្បីទប់ស្កាត់ការឡើងថ្លៃប្រេងនាពេលខាងមុខ ដោយសារតែការព្យាករណ៍ឃើញថា ប្រេងឥន្ធនៈនឹងមានកើនឡើងថ្លៃ ។
លោកថា អ៊ីចឹងហើយបានជាក្រុមហ៊ុននាំប្រេងបានសម្រុកនាំចូល ទុកជាមុនដើម្បីទទួលបានផលចំណេញ ។
ពាក់ព័ន្ធនិងប្រេងឥន្ធនៈនេះ លោក ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម បានឱ្យដឹងថា បញ្ហាប្រេងសាំង កម្ពុជាបានពឹងផ្អែកទាំងស្រុងលើការនាំចូលប្រេងពីក្រៅប្រទេស ។ ក្នុងពេលនេះសភាពការណ៍រុស្សី និងអ៊ុយក្រែន កំពុងតានតឹងប្រឈមមុខដាក់គ្នារួមនឹងបញ្ហាកូវីដ ១៩ ផងនោះបានធ្វើឱ្យតម្លៃប្រេងនៅលើទីផ្សារអន្តរជាតិមានការប្រែប្រួល ។
«មានប្រទេសចំនួន ៣ មានប្រតិបត្តិការអាជីវកម្មប្រេងធំជាងគេ ក្នុងនោះប្រទេសរុស្សី ជាប្រទេសមួយផលិតប្រេង និងហ្គាស សម្រាប់ផ្គត់ផ្គង់ទីផ្សារអន្តរជាតិ ។ ដូច្នេះចំពោះការដាក់ទណ្ឌកម្មលើរុស្សី វាបានបង្អាក់ដល់ដំណើរការផ្គត់ផ្គង់ប្រេង នឹងអាចធ្វើឱ្យតម្រូវការផ្គត់ផ្គង់ប្រេងលើពិភពលោកបានថយចុះ ។ ស្របពេលប្រេងឆៅបានហក់ឡើងពី ៧០ ដុល្លារ ទៅ ១០០ ដុល្លារ ក្នុង ១ បារ៉ែល ។ នេះតាមការបញ្ជាក់របស់មន្ត្រី ។
មន្ត្រីនាំពាក្យក្រសួងពាណិជ្ជកម្មខាងលើបញ្ជាក់ថា សម្រាប់កម្ពុជាវិញ ចំពោះការបន្តហក់ឡើងតម្លៃប្រេងសាំងនេះ មិនអាចគ្រប់គ្រងស្ថានការណ៍បានឡើយ ដោយកម្ពុជាបានពឹងផ្អែកលើការនាំចូល ។ ស្របពេលពិភពលោកកំពុងមានសភាពការណ៍បែបនេះ មិនថានៅកម្ពុជា ឬប្រទេសដ៏ទៃទៀតបានកំពុងជួបអតិផរណានៃការប្រែប្រួលតម្លៃប្រេងសាំងដូចគ្នា ។
ក្រសួងពាណិជ្ជកម្ម បានកំណត់ថ្លៃប្រេងឥន្ទនៈលក់នៅលើទីផ្សារកម្ពុជាពីថ្ងៃទី ១ ដល់ថ្ងៃទី ១៥ មីនា ឆ្នាំ ២០២២ ប្រេងសាំងធម្មតាមានតម្លៃ ៤៨០០ រៀលក្នុងមួយលីត្រ និង ៤៥០០ រៀលក្នុងមួយលីត្រសម្រាប់ប្រេងម៉ាស៊ូត ៕
ចែករំលែកព័តមាននេះ