ក្រោយរងផលប៉ះពាល់ដោយសារកូវីដ-១៩ កម្ពុជាធ្វើជំរឿនសេដ្ឋកិច្ច
- ភ្នំពេញ
រាជធានីភ្នំពេញ ៖ ជំរឿនសេដ្ឋកិច្ចសម្រាប់ឆ្នាំ ២០២២ នឹងចាប់ផ្តើមពីថ្ងៃទី ១ ខែមីនា ដល់ថ្ងៃទី ៣១ ខែមីនាឆ្នាំ…
រាជធានីភ្នំពេញ ៖ ជំរឿនសេដ្ឋកិច្ចសម្រាប់ឆ្នាំ ២០២២ នឹងចាប់ផ្តើមពីថ្ងៃទី ១ ខែមីនា ដល់ថ្ងៃទី ៣១ ខែមីនាឆ្នាំ ២០២២ ទៅលើសហគ្រាស សិប្បកម្ម អាជីវកម្ម លក់ដុំ លក់រាយ និងសេវាកម្មផ្សេងៗ ។ នេះជាជំរឿនសេដ្ឋកិច្ចលើកទី២ នៅកម្ពុជាបន្ទាប់ពី «ជំរឿនសហគ្រាសបានធ្វើកាលពីឆ្នាំ ២០១១ និងអង្កេតចន្លោះជំរឿនសហគ្រាសនៅក្នុងឆ្នាំ២០១៤ ។
ពាក់ព័ន្ធនិងការជំរឿនសេដ្ឋកិច្ចទៅលើអង្គភាពអាជីវកម្មនេះ អ្នកស្រី កែវ មុំ នាយិកាក្រុមហ៊ុនផលិតនំស្រួយលីលី បានឱ្យដឹងថា ក្នុងរយៈពេល ៥ ឆ្នាំចុងក្រោយនេះបើមើលទៅលើការធ្វើអាជីវកម្មមានការប្រែប្រួល ។ នៅ ៣ ឆ្នាំមុន ដែលមិនទាន់មានជំងឺកូវីដ ១៩ ការលក់ដូរមានការកើនឡើង ។ ប៉ុន្តែចូលមកឆ្នាំ ២០២០ និង ២០២១ នៅពេលជំងឺកូវីដ ១៩ ផ្ទុះឡើង ការលក់ដូរមានការរអាក់រអួល ។ ពិសេសនៅពេលបិទខ្ទប់នៅឆ្នាំ ២០២១ កន្លងមកនេះ ធ្វើឱ្យការលក់មានការធ្លាក់ចុះខ្លាំង ។ តែក្រោយពីបញ្ចាប់ការបិទខ្ទប់ដំណើរការលក់ឃើញថា កើនឡើងវិញ តែមិនបានប៉ុន្មានក៏ធ្លាក់ចុះមកវិញនៅពេលរកឃើញថា វីរុសបំម្លែងខ្លួនថ្មីអូមីក្រុង ។
អ្នកស្រីឧកញ៉ា កែវ មុំ មានប្រសាសន៍ថា មុនជំងឺកូវីដ ១៩ ចូលមកស្រុកខ្មែរ ការធ្វើអាជីវកម្មនូវរកបានប្រាក់ចំណេញ តែចូលមកដល់វិបត្តិជំងឺកូវីដ ១៩ នៅខែខ្លះខាត និងខែខ្លះទៀតរកប្រាក់ចំណេញបានតិចតួចទុកសម្រាប់ទប់ទល់ឱ្យអាជីវកម្មដំណើរការទៅមុខ ។ ជារួមការធ្វើអាជីវកម្មនៅឆ្នាំ ២០២១ កន្លងមកនេះក្រុមហ៊ុនរកបានប្រាក់ចំណេញតិចតួច គ្រាន់បានទ្រទ្រង់អាជីវកម្ម ។
យោងតាមសារអំពាវនាវរបសរាជរដ្ឋាភិបាលការធ្វើជំរឿនសេដ្ឋកិច្ចជាការងារដ៏ធំ និងមានសារៈសំខាន់សម្រាប់ប្រទេសជាតិ ។ ការងាស្ថិតិពិតប្រាកដដែលមិនអាចខ្វះបានដើម្បីឆ្លើយតបនឹងសេចក្តីត្រូវការប្រើប្រាស់ទិន្នន័យចម្បងដែលមានការកើនឡើងជាលំដាប់របស់ស្ថាប័នរាជរដ្ឋាភិបាលដៃគូអភិវឌ្ឍ អង្គការជាតិនិងអន្តរជាតិនានាសម្រាប់ធ្វើជាធាតុចូលដ៏សំខាន់ក្នុងការរៀបចំគោលនយោបាយអភិវឌ្ឍន៍សេដ្ឋកិច្ច បរិស្ថាន សង្គម វប្បធម៌និងសុខុមាលភាពរបស់ប្រជាជនកម្ពុជា និងជាសូចនាករសំខាន់សម្រាប់ការត្រួតពិនិត្យ តាមដាន ការសម្រេចបាននូវការអនុវត្តកម្មវិធីគោលនយោបាយអភិវឌ្ឍន៍សេដ្ឋកិច្ចសង្គមរបស់រាជរដ្ឋាភិបាលកម្ពុជា យុទ្ធសាស្ត្រចតុកោណដំណាក់កាលទី ៤ និងការរៀបចំនូវគោលនយោបាយផ្សេងទៀតជាពិសេស ដើម្បីឆ្លុះបញ្ជាំងពីផលប៉ះពាល់ដែលបណ្តាលមកពីការរីករាលដាលនៃជំងឺកូវីដ ១៩ ទៅលើអង្គភាពសេដ្ឋកិច្ចដែលជាកាតាលីករជួយជំរុញកំណើនសេដ្ឋកិច្ចកម្ពជាបន្ទាប់ពីប្រទេសកម្ពុជាបានរក្សាកំណើនសេដ្ឋកិច្ចជាមធ្យម ៧% ក្នុងមួយឆ្នាំរយៈពេល ១០ ឆ្នាំកន្លងមកនេះ ។
ទិន្នន័យទាំងអស់ដែលបានមកពីជំរឿនសេដ្ឋកិច្ចគឺជាទិន្នន័យពិតប្រាកដដែលបានមកពីគ្រប់អង្គភាព សេដ្ឋកិច្ច សហគ្រាស សិប្បកម្ម អាជីវកម្ម លក់ដុំ លក់រាយ និងសេវាកម្មផ្សេងៗ ។ ដូច្នេះគ្រប់ប្រទេសនៅលើពិភពលោកសុទ្ធតែមានការចាំបាច់ក្នុងការធ្វើជំរឿនគ្រប់អង្គភាពសេដ្ឋកិច្ច ក្នុងនោះប្រទេសដែលមានការសុខសន្តិភាព ស្ថិរភាពនយោបាយ អាចប្រមូលទិន្នន័យស្ថិតិបានល្អ ជាពិសេសការធ្វើជំរឿនសេដ្ឋកិច្ចនេះ ។ លទ្ធផលទិន្នន័យដែលបានមកពីការធ្វើជំរឿនសេដ្ឋកិច្ចនឹងត្រូវបានប្រើប្រាស់ដ៏ទូលំទូលាយនៅក្នុងវិស័យសាធារណៈ និងវិស័យឯកជន ៕
ចែករំលែកព័តមាននេះ