បញ្ហាសេដ្ឋីរុស្ស៊ី Abramovich កំពុងធ្វើឱ្យក្លិប Chelsea ស្ថិតក្នុងភាពមិនច្បាស់លាស់?
អង់គ្លេស ៖ អនាគតក្លិប Chelsea ស្ថិតក្នុងភាពមិនច្បាស់លាស់មួយ បន្ទាប់ពីមហាសេដ្ឋីជនជាតិរុស្ស៊ី លោក
អង់គ្លេស ៖ អនាគតក្លិប Chelsea ស្ថិតក្នុងភាពមិនច្បាស់លាស់មួយ បន្ទាប់ពីមហាសេដ្ឋីជនជាតិរុស្ស៊ី លោក Roman Abramovich អាចនឹងត្រូវបណ្តេញចេញពីចក្រភពអង់គ្លេស និងដកហូតសិទ្ធិជាម្ចាស់ក្លិបរហស្សនាម «តោខៀវ» មួយនេះ។
កាលពីថ្ងៃទី២៦ ខែកុម្ភៈ ឆ្នាំ ២០២២ លោក Abramovich បានចេញសេចក្តីថ្លែងការណ៍បន្ទាន់ដ៏ភ្ញាក់ផ្អើលមួយ ដោយសម្រេចប្រគល់ក្លិប Chelsea ឱ្យទៅគណៈកម្មការមូលនិធិមនុស្សធម៌របស់ក្លិបជាអ្នកមើលការខុសត្រូវជំនួសរូបលោក។ សេចក្តីថ្លែងការណ៍នេះ ធ្វើឡើងមុនការប្រកួតដែល Chelsea ចាញ់ Liverpool នៅវគ្គផ្តាច់ព្រ័ត្រពានរង្វាន់ EFL Cup ដោយបាល់ប៉េណាល់ទីកាត់សេចក្តីលទ្ធផល ១០-១១ កាលពីយប់មិញ។
សេចក្តីប្រកាសនេះកើតឡើង ក្រោយពេលលោក Chris Bryant សមាជិកសភាអង់គ្លេសមកពីគណបក្សពលករបានអំពាវនាវដល់រដ្ឋាភិបាលឱ្យបណ្តេញមហាសេដ្ឋីរុស្ស៊ីវ័យ៥៥ឆ្នាំរូបនេះចេញពីអង់គ្លេស និងរឹបអូសទ្រព្យសម្បត្តិទាំងអស់ដែលមាននៅទីនោះ។ ចំពេលដែលរុស្ស៊ីបានបើកការវាយលុកឈ្លានពានលើអ៊ុយក្រែន ហើយត្រូវបានមេដឹកនាំនៅជុំវិញពិភពលោកថ្កោលទោស ចំពោះសកម្មភាពឈា្លនពានដ៏អាក្រក់មួយនេះ។
លោក Chris Bryant លើកឡើងថា លោក Abramovich ដែលជាមនុស្សស្និទ្ធិនឹងលោក ពូទីន គឺមានជាប់ពាក់ព័ន្ធនឹងហិរញ្ញវត្ថុខុសច្បាប់ រួមទាំងសកម្មភាពមិនល្អនៅក្នុងប្រទេសអង់គ្លេស។
ដោយឡែកបើយោងតាមប្រភពពី BBC បានចេញផ្សាយកាលពីថ្ងៃទី២៧ ខែកុម្ភៈ ថា អ្នកទទួលខុសត្រូវនៃមូលនិធិសប្បុរសធម៌របស់ Chelsea មិនទាន់យល់ព្រមទទួលគ្រប់គ្រងក្លិបជំនួសលោក Abramovich នៅឡើយទេ។ ដោយសមាជិកទាំងអស់បានជួបគ្នា ដើម្បីពិភាក្សាអំពីស្ថានភាពនេះ។ ខណៈដែលគេនៅមិនទាន់ដឹងច្បាស់ថា តើលោក Abramovich នឹងត្រូវរងទណ្ឌកម្មជាផ្នែកនៃវិធានការរបស់រដ្ឋាភិបាលចក្រភពអង់គ្លេសប្រឆាំងនឹងរុស្ស៊ីដែរឬទេ?
លោក Abramovich គឺជាមហាសេដ្ឋីម្នាក់ក្នុងចំណោមអ្នកមានបំផុតរបស់រុស្ស៊ី បានក្លាយជាម្ចាស់ក្លិប Chelsea នៅក្នុងឆ្នាំ ២០០៣។ ហើយចាប់តាំងពីពេលនោះមកលោកក្លាយជាបុគ្គលល្បីឈ្មោះមួយរូបលើប្រព័ន្ធផ្សព្វផ្សាយអង់គ្លេស។ ក្រោមការវិយោគពីមហាសេដ្ឋីរូបនេះ Chelsea ឈ្នះពានរង្វាន់ធំៗជាច្រើន ក្នុងនោះរួមទាំងជើងឯក Premier League និង UEFA Champions League ផងដែរ៕
ចែករំលែកព័តមាននេះ