ក្រុមប្រជាពលរដ្ឋនៅតំបន់ទំនប់រលក ហាក់អស់ជំនឿទៅលើអាជ្ញាធរ ក្រុង ខេត្ត ដែលកាលពីជិតមួយខែមុន បានដឹកនាំមន្ត្រីពាក់ព័ន្ធជាច្រើននាក់ចុះទៅធ្វើកំណត់ហេតុបញ្ឈប់សកម្មភាពសាងសង់សំណង់លើចំណីឆ្នេរ ដែលមើលទៅគួរអោយកោតសរសើរណាស់ ប៉ុន្តែផ្ទុយស្រឡះ
ខេត្តព្រះសីហនុ ៖ ក្រុមប្រជាពលរដ្ឋនៅតំបន់ទំនប់រលក ហាក់អស់ជំនឿទៅលើអាជ្ញាធរ ក្រុង ខេត្ត ដែលកាលពីជិតមួយខែមុន បានដឹកនាំមន្ត្រីពាក់ព័ន្ធជាច្រើននាក់ចុះទៅធ្វើកំណត់ហេតុបញ្ឈប់សកម្មភាពសាងសង់សំណង់លើចំណីឆ្នេរ ដែលមើលទៅគួរអោយកោតសរសើរណាស់ ប៉ុន្តែផ្ទុយស្រឡះ សំណង់មួយកន្លែងនេះ ពុំបានទុកកំណត់ ហេតុរបស់អាជ្ញាធរ ក្រុង ខេត្ត ក្នុងកែវភ្នែកឡើយ ដោយនៅតែបន្តសាងសង់យ៉ាងរលូន គិតមកដល់ថ្ងៃទី២៥ ខែកុម្ភៈ ឆ្នាំ២០២២នេះ ហើយសំណង់ខុសច្បាប់នោះ បានសាងសង់រួចរាល់ប្រមាណ៦០%ហើយ នៅឡើយតែអាជ្ញាធរ និងមន្ត្រីពាក់ព័ន្ធទេ មិនទាន់មានសកម្មភាព ដែលគេសង្ស័យថា ត្រូវដងត្រូវផ្លែគ្នាទេដឹង?។
យោងតាមប្រភពក្រុមប្រជាពលរដ្ឋ បានបង្ហើបថា កាលពីចុះផ្អាកសកម្មភាពសាងសង់កាលពីថ្ងៃទី២៨ ខែមករា ឆ្នាំ២០២២ នាពេលកន្លងមកនោះ គេឃើញមានវត្តមាន ឯកឧត្តម លៀម សូដា អភិបាលរងខេត្តព្រះសីហនុ ជាប្រធានក្រុមការងារ រួមជាមួយអាជ្ញាធរ ក្រុង និងមន្ទីរអង្គភាពពាក់ព័ន្ធជាច្រើននាក់ផងដែរ។
ហើយនៅក្នុងការចុះត្រួតពិនិត្យនេះ ឯកឧត្តមអភិបាលរងខេត្តព្រះសីហនុ បានឲ្យដឹងថា ចំពោះសំណង់លំនៅដ្ឋានដែលសាងសង់រំលោ.ភលើចំណីឆ្នេរខាងលើនេះ ក្រុមការងារបានចុះពិនិត្យឃើញជាក់ស្តែង គឺសំណង់បានចាក់គ្រឹះ និងចាក់សសរចំនួន២៤ដើម ទំហំ៦ម៉ែត្រគុណ២៦ម៉ែត្រ ដែលម្ចាស់ផ្ទះបានរុះរើផ្ទះចាស់របស់គាត់ដែលមានទំហំ៦ម៉ែត្រគុណ១៥ម៉ែត្រ ហើយបានបន្តសាងសង់បន្ថែម១១ម៉ែត្រគុណ៦ម៉ែត្រ ចូលទៅក្នុងចំណីសមុទ្រ។ ដែលទីតាំងសំណង់រឹងមាំមួយនេះ ស្ថិតនៅតំបន់រំដួលជើងភ្នំ ស្ថិតក្នុងសង្កាត់លេខ១ ក្រុងព្រះសីហនុ ។
យោងតាមរបាយការណ៍របស់ក្រុមការងាររដ្ឋបាលក្រុងព្រះសីហនុ បានបញ្ជាក់ថា ម្ចាស់សំណង់ខាងលើ មានឈ្មោះ ហ៊ន សាវ៉ន ការដ្ឋានសំណង់នេះ មិនអនុញ្ញាតឲ្យធ្វើការសាងសង់នោះទេ ដោយសារមិនមានច្បាប់អនុញ្ញាត ហើយទីតាំងនេះបើសុំច្បាប់អនុញ្ញាត ក៏មិនអាចឱ្យបាននោះដែរ នេះបើយោងតាមចរាចរណ៍ណែនាំរបស់រាជរដ្ឋាភិបាលលេខ០១ ស្តីពីការគ្រប់គ្រង់តំបន់ឆ្នេរ ពីព្រោះវាជាដីឆ្នេរសមុទ្រសាធារណៈរបស់រដ្ឋ។
តែសម្រាប់ពេលនេះ ក្រុមការងារសម្រេចឱ្យម្ចាស់សំណង់ធ្វើការរុះរើរាល់សំណង់ដែលបាន សាងសង់ទាំងប៉ុន្មានចេញឱ្យអស់ក្នុងរយៈពេល ៥ថ្ងៃជាកំណត់។ ក្នុងករណីម្ចាស់សំណង់មិនគោរពតាមការណែនាំ ក្រុមការងារនឹងអនុវត្តទៅតាមនីតិវិធីច្បាប់។ តែផ្ទុយទៅវិញមកដល់ ពេលនេះ សំណង់រឹងមាំដែលសាងសង់រំលោ.ភលើឆ្នេរខាងលើ បានសាងសង់យ៉ាងរលូនដោយពុំមានអាជ្ញាធរណាហ៊ានហាមឃាត់នោះទេ ក្នុងការសាងសង់បន្តនេះឡើយ ដូចនេះសំណង់បានសាងសង់ស្ទើរតែរួចរាល់ទៅហើយ ដែលគេយល់ថា ច្បាប់ធ្វើអីអញ!?
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ