ខេត្តព្រះសីហនុ៖ ម្ចាស់សេវាកម្មផ្គត់ផ្គង់ទឹកស្អាត នៅប្រជុំជនវាលរេញ បានរៀបចំតបណ្តាញទឹក និងដំ ឡើងជាក្បាលវ៉ាណបិទបើកទឹក សម្រាប់ផ្តល់ទឹក ដល់រថយន្តពន្លត់អគ្គិភ័យ​ សម្រាប់សមត្ថកិច្ច​ជួយសង្គ្រោះ នៅពេល​មានអគ្គិភ័យ កើតឡើង​នៅក្នុងមូលដ្ឋាន។ អាជ្ញាធរ​​មូល​ដ្ឋាន និងកម្លាំង​សមត្ថកិច្ច ស្រុកព្រៃនប់ បានថ្លែងអំណរគុណដល់ម្ចាស់សេវាកម្មផ្គត់ផ្គង់​ទឹកស្អាត​នេះ។​

លោក ខូវ ថានិត មេឃុំវាលរេញ បានសំដែង​ការសាទរ និងមានមោទនភាព ដែលម្ចាស់ផ្គត់ផ្គង់ទឹក​ស្អាតវាលរេញ បានជួយដល់មូលដ្ឋាន ទាំងការផ្គត់ផ្គង់ទឹក ដោយមិនគិតថ្លៃ ទាំងរៀបចំតប្រព័ន្ធក្បាល សម្រាប់ត​ភ្ជាប់ទៅនឹងរថយន្តពន្លត់អគ្គិភ័យ សម្រាប់សកម្មភាពជួយពន្លត់អគ្គិភ័យ ដែលកើតឡើង ជា​យថាហេតុហើយទាន់ពេលវេលា។

លោកមេឃុំ ចាត់ទុកថា នេះជាការចូលរួមចំណែកយ៉ាងសំខាន់ ហើយជាតម្រូវការចាំបាច់របស់មូលដ្ឋាន ក្នុងជួយសង្គ្រោះ នៅពេលមានអគ្គិភ័យឆាបឆេះឡើង​។

ជាមួយគ្នានេះ ទាំងអធិការនគរបាល និងមេបញ្ជាការកងរាជអាវុធហត្ថស្រុក ក៏បានថ្លែងអំណរគុណផងដែរ ដល់ម្ចាស់​ផ្គត់ផ្គង់ទឹកស្អាត នៅប្រជុំជនវាលរេញ ដែលបានរៀបចំវ៉ាននេះឡើង សម្រាប់​ដោះ​ស្រាយ​ជាបន្ទាន់ និងទាន់ពេលវេលា ក្នុងការជួយដល់​​រថ​យន្ត​​ពន្លត់​អគ្គិ​ភ័យ ហើយនេះគឺជាភាពងាយស្រួលមួយ ក្នុងការបូមទឹកដាក់​ក្នុងរថយន្ត ដោយមិនបាច់ប្រើម៉ាស៊ីនបូម​។

សមត្ថកិច្ចដដែល បានបន្តថា គិតត្រឹមថ្ងៃនេះ ថ្ងៃទី២៥កុម្ភៈ ឆ្នាំ២០២២នេះ វ៉ានបណ្តែត តាមសាធារណៈ​ក្នុងស្រុកព្រៃនប់ សម្រាប់​បូម​ផ្តល់​ជូន​រថយន្ត​​​ពន្លត់​​អគ្គិភ័យ មានចំនួន ០៣ទីតាំង គឺ ១-នៅឃុំអូ​ឧកញ៉ាហេង ២-​ឃុំ​សំរុង និង៣-​នៅទីនេះ ចំណុច​វង្វង់មូលវា​លរេញ មុខអធិការនគរបាលស្រុកនេះ​តែម្តង ហើយសង្ឃឹ​ម​ថា នៅ​តាម​បណ្តា​ឃុំ​ផ្សេង​ទៀត និងមានដំឡើងវ៉ាននេះ ជា​បន្ត​បន្ទាប់​ទៀត​ ​សម្រាប់​ភាព​ងាយ​ស្រួល​ដល់កា​រជួយ​សង្គ្រោះពន្លត់ បើមានអគ្គិភ័យឆាបឆេះឡើង នៅ​ក្នុង​មូល​ដ្ឋាន​៕