ខេត្តសៀមរាប ៖ ចិញ្ចើមផ្លូវជាតិលេខ៦ ចាប់ពីចំណុចភ្លើងស្តុបចុងកៅស៊ូ រហូតដល់ចំណុចមុខភោជនីយដ្ឋាន អាប៉ូឡូប្លាស្សា បច្ចុប្បន្ននេះបានក្លាយទៅជាចំណតរថយន្តតាក់ស៊ីគ្រប់ប្រភេទទៅហើយ។
ការដែលបណ្តោយឱ្យមានភាពអនាធិបតេយ្យនៅកណ្តាលក្រុងទេសចរណ៍បែបនេះ គេសង្ស័យថា ជាការផ្តួចផ្តើម ឬជាភាពកំសោយរបស់លោកឧកញ៉ា ទូច សៀ ជាមួយរដ្ឋអំណាចក្រុង ត្បិតឧកញ៉ារូបនេះ ជាអ្នកគ្រប់គ្រងចំណតរថយន្តក្នុងក្រុងសៀមរាប។
ក្នុងក្រុងសៀមរាបនាពេលកន្លងទៅ អាជ្ញាធរក្រុង និងខេត្ត បានរៀបចំឱ្យមានចំណតចំនួន ២ គឺទី១- នៅក្នុងបុរីសៀងណាំ ចុងកៅស៊ូ និងទី២- នៅផ្លូវក្រវ៉ាត់ក្រុង ក្នុងសង្កាត់ស្រង៉ែ នៃផ្នែកខាងលិចក្រុង។ ការដែលរៀបចំឱ្យមានចំណតបែបនេះ គឺដើម្បីឱ្យរថយន្តគ្រប់ប្រភេទចូលចតក្នុងចំណត បញ្ជៀសការកកស្ទះផ្នែកចរាចរណ៍ និងបញ្ជៀសការផ្ទេរទំនិញ ឬការចាប់ម៉ូយបង្កភាពអនាធិបតេយ្យលើដងផ្លូវផងដែរ ។
ប៉ុន្តែមួយរយៈចុងក្រោយនេះ ក្រោមការគ្រប់គ្រងរបស់ឧកញ៉ា ទូច សៀ គេសង្កេតឃើញភាពអនាធិបតេយ្យបានកើតឡើងជាប្រចាំ។ មិនថា រថយន្តតាក់ស៊ី ឬរថយន្តក្រុងនោះទេ បានឈប់លើចិញ្ចើមផ្លូវជាតិលេខ៦ សាងទំនិញ និងរត់ដេញគ្នាចាប់ម៉ូយយ៉ាងប្រសេកប្រសាចពេញដងផ្លូវជាតិតែម្តង។ ក្រៅពីនោះ ក៏បានបណ្តោយឱ្យរថយន្តខ្នាតធំៗបើកដឹក ទំនិញចូលក្នុងក្រុងតាមចិត្ត ដោយគ្រាន់តែឱ្យកូនចៅរបស់ខ្លួនឃាត់ស្ទាក់ឱ្យបង់លុយ តាមដងផ្លូវតែប៉ុណ្ណោះ។ សកម្មភាពគ្រប់គ្រងចំណតរថយន្តរបស់លោកឧកញ៉ា ទូច សៀ ក្រៅពីបង្កភាពអនាធិបតេយ្យ បំផ្លាញសណ្តាប់ធ្នាប់សង្គម ក៏បណ្តោយឱ្យរថយន្តធំទាំងនោះ បំផ្លាញផ្លូវក្នុងក្រុងផងដែរ។
ភាពកំសោយរបស់លោកឧកញ៉ា ទូច សៀ បានបង្ខំចិត្តដល់មហាជនទូទាំងក្រុងសៀមរាប ស្នើទៅថ្នាក់លើឱ្យមានការផ្លាស់ប្តូរអ្នកគ្រប់គ្រងចំណតរថយន្តថ្មី ។ត្បិតឧកញ៉ារូបនេះ ហាក់គ្មានសមត្ថភាពក្នុងការរៀបចំរថយន្តឱ្យចូលចតក្នុងចំណតនោះឡើយ។
ប្រភពពីប្រជាពលរដ្ឋក្នុងក្រុងសៀមរាប បានលើកឡើងឱ្យអ្នកយកព័ត៌មានយើងដឹងនៅព្រឹកថ្ងៃទី២៥ ខែកុម្ភៈ ឆ្នាំ២០២២ នេះថា ក្នុងមួយថ្ងៃៗ គេសង្កេតឃើញបុគ្គលិករបស់ឧកញ៉ា ទូច សៀ ដាក់ពង្រាយតាមដងផ្លូវផ្នែកខាងលិចក្រុង និងខាងកើតក្រុង ក្នុងការឃាត់ស្ទាក់រថយន្តឱ្យចូលបង់លុយបេន តែមិនមានអ្នករៀបចំឱ្យរថយន្តចូលចតក្នុងបេននោះមានរបៀបរៀបរយឡើយ។
មហាជនសង្ឃឹមថា ថ្នាក់លើនឹងពិចារណាក្នុងការដោះដូរអ្នកគ្រប់គ្រងចំណតជាថ្មី ប្រសិនបើឧកញ៉ារូបនេះ គ្មានសមត្ថភាព ហើយនៅតែបន្តឱ្យមានភាពអនាធិបតេយ្យក្នុងក្រុងទេសចរ តទៅទៀត។
ជុំវិញករណីខាងលើនេះ កោះសន្តិភាពយើងមិនអាចស្វែងរកសុំការបំភ្លឺពីលោកឧកញ៉ា ទូច សៀ ដែលជាអ្នកទទួលបានសិទ្ធិក្នុងការគ្រប់គ្រងចំណតរថយន្តនោះបានទេ នៅព្រឹកថ្ងៃទី២៥ ខែកុម្ភៈ ឆ្នាំ២០២២ នេះ ដោយសារទូរស័ព្ទហៅចូលគ្មានអ្នកទទួលច្រើនដង។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ