ខេត្តក្រចេះ ៖ ទោះបីនៅក្នុងបរិបទជំងឺកូវីដ ១៩ យ៉ាងណាក្តី ក្រូចថ្លុងកោះទ្រង់ ខេត្តក្រចេះ នៅតែរក្សាបានតម្លៃខ្ពស់ ។ កសិករអ្នកដាំក្រូចថ្លុង ដែលបានចុះបញ្ជីផលិតផលសម្គាល់ភូមិសាស្ត្រទំនិញ (GI) បានសប្បាយចិត្តជាមួយកសិផលរបស់ខ្លួនដែលបានធ្វើឲ្យជីវភាពរីកចម្រើនមួយកម្រិត ។
អ្នកស្រី ជាន ណារី ប្រធានសមាគមក្រូចថ្លុងកោះទ្រុងខេត្តក្រចេះ បាននិយាយថា តម្លៃក្រូចថ្លុងកោះទ្រុង វាមានតម្លៃជាងមុនពេលចុះបញ្ជីជាម៉ាកសម្គាល់ភូមិសាស្ត្រទំនិញ ហើយទីផ្សារស្រួលក់ជាងមុនៗ ។ ជាក់ស្តែងសព្វថ្ងៃនេះផលិតករដែលជាអ្នកដាំដុះ អត់មាននៅសល់ផ្លែក្រូចនៅផ្ទះទេ ផ្ទះណាមានផ្លែក្រូចទុំគឺមានឈ្មួញប្រមូលទិញយកអស់ ។ កសិករដាំផ្លែក្រូចថ្លុងនៅលើកោះទ្រុងអាចលក់ផ្លែក្រូចរបស់ខ្លួនបានថ្លៃ ៩០០០ រៀលក្នុងមួយផ្លែ ហើយអ្នកលក់នៅតាមខេត្តពួកគេអាចលក់បានដល់ ១៣ ០០០ រៀល ។
ប្រធានសមាគមក្រូចថ្លុងកោះទ្រុងខេត្តក្រចេះបញ្ជាក់ថា ការផ្ទុះ ជំងឺកូវីដ ១៩ ក្នុងរយៈពេលជិត ៣ ឆ្នាំមកនេះ មិនបានធ្វើឱ្យប៉ះពាល់ដល់ជីវភាពអ្នកដាំក្រូចថ្លុងនោះទេ ។ ផ្ទុយទៅវិញក្រូចថ្លុងកោះទ្រង់ បានក្លាយជាផ្លែឈើដែលប្រជាពលរដ្ឋទូទៅចូលចិត្តទទួលទានច្រើន ។ ផ្អែកលើកចំណុចនេះជីវភាពរបស់ប្រជាពលរដ្ឋដាំក្រូចថ្លុងមានការរីកចម្រើន ។
«កាលមិនទាន់បង្កើតសមាគមក្រូចថ្លុងកោះទ្រុងនៅទីនេះលក់បានថ្លៃពី ៥០០០ ទៅ ៧០០០ រៀល ក្នុងមួយផ្លែ តែមកដល់សព្វថ្ងៃនេះ ក្រូចថ្លុងមួយផ្លែអាចលក់បានជាង ១ ម៉ឺនរៀល ។ តែនៅរដូវកាលខ្លះវាអាចធ្លាក់ថ្លៃបន្តិចពិសេសនៅខែ ៩ និងខែ ១០ ខាងមុខនេះ ព្រោះវាសំបូរផ្លែក្រូច» អ្នកស្រី ជាន ណារី បានឲ្យដឹង ។
ក្រូចថ្លុងឲ្យផលច្រើន នៅចន្លោះខែកញ្ញា ដល់វិចិ្ឆការ ដែលកំឡុងពេលនេះ ពលរដ្ឋនៅលើកោះទ្រង់បានប្រមូលផលបាន ពី ១ ពាន់ទៅ ២ ពាន់ផ្លែក្នុងមួយថ្ងៃ ៕
ចែករំលែកព័តមាននេះ