រាជធានីភ្នំពេញ ៖ ស្រុតស្បូនជាជំងឺមួយប្រភេទដែលតែងជួបញឹកញាប់ជាងគេ និងមានប្រមាណ៣០%នៃស្ត្រី ជាពិសេសស្ត្រីវ័យចំណាស់ និងអស់រដូវ។ ជំងឺនេះបង្កឲ្យមានផលវិបាកធ្ងន់ធ្ងរដល់សុខភាព
រាជធានីភ្នំពេញ ៖ ស្រុតស្បូនជាជំងឺមួយប្រភេទដែលតែងជួបញឹកញាប់ជាងគេ និងមានប្រមាណ៣០%នៃស្ត្រី ជាពិសេសស្ត្រីវ័យចំណាស់ និងអស់រដូវ។ ជំងឺនេះបង្កឲ្យមានផលវិបាកធ្ងន់ធ្ងរដល់សុខភាព និងមានផលរំខានដល់ប្រព័ន្ធបង្ហូរទឹកនោម សុខភាពផ្លូវភេទ និងការបន្ទោបង់លាមក ។
១-មូលហេតុ ៖ កត្តាដែលប្រឈមចំពោះស្ត្រីនិងជំងឺនេះមាន ភាពចុះខ្សោយប្រព័ន្ធទម្រអាងត្រគាក (Défaillance du système d’amarrage), ភាពមិនធម្មតារបស់ឆ្អឹងអាងត្រគាក ដែលមានពីកំណើត (anomalie osseuse), ភាពចុះខ្សោយ ស្វិត និងយាររបស់សាច់ដុំអាងត្រគាក, ស្ត្រីធ្លាប់សម្រាលកូនច្រើន ដែលធ្វើឲ្យចុះខ្សោយសាច់ដុំអាងត្រគាក, មានជំងឺទល់លាមកញឹកញាប់, ធ្វើការធ្ងន់ ឬលើករបស់ធ្ងន់ៗ, ស្ត្រីឆាប់អស់រដូវដោយសារកង្វះអ័រមូ៉ន និងស្ត្រីដែលធ្លាប់មានការវះកាត់ជំងឺស្បូន និងជំងឺទ្វារលាមក ។
២-រោគសញ្ញា ជាទូទៅជំងឺនេះមានរោគសញ្ញាដូចជា ៖ មានផលរំខានលើមុខងារបង្ហូរទឹកនោម, អ្នកជំងឺជ្រាបទឹកនោម នៅពេលប្រឹង ក្អក សើច ឬលើករបស់ធ្ងន់, អ្នកជំងឺមានអារម្មណ៍ថា ហាក់ដូចជាមានដុំទឹងណែនរំខាននៅក្នុងទ្វារមាស, អ្នកជំងឺមានផលរំខានក្នុងការបន្ទោបង់លាមក, អ្នកជំងឺអាចជ្រាបលាមក លេចផោមដោយឯកឯង, ឈឺនៅអាងត្រគាក, មានធ្លាក់ស, រលាកទ្វារមាស, ផលរំខានក្នុងការរួមភេទ, ក្នុងករណីធ្ងន់ធ្ងរអ្នកជំងឺមានលៀនចេញនូវសរីរាង្គមួយចំនួនដូចជា ផ្លោកនោម ស្បូន ទ្វារលាមក តាមទ្វារមាសចេញមកក្រៅ ។
៣-ការព្យាបាល ៖ វិធីព្យាបាលនៃជំងឺនេះមាន៣ប្រភេទ៖
ក-ការព្យាបាលដោយប្រើថ្នាំៈ ស្ត្រីអាចប្រើថ្នាំអ័រម៉ូនមួយចំនួនដើម្បីជួយកុំឲ្យឆាប់អស់រដូវ និងធ្វើឲ្យប្រព័ន្ធទម្រសាច់ដុំអាងត្រគាករឹងមាំ។
ខ-វិធីហាត់ប្រាណៈ ការហាត់ប្រាណធ្វើឲ្យសាច់ដុំអាងត្រគាក និងសាច់ដុំពោះរឹងមាំ។
គ-វិធីវះកាត់-ការវះកាត់តាមទ្វារក្រោម ដោយយើងធ្វើការវះកាត់យកស្បូនចេញ ហើយនិងជួសជុលមុខងារបង្ហូរទឹកនោម ប្លោកនោម ទ្វារលាមក និងសុខភាពផ្លូវភេទ។ ការវះកាត់ដោយប្រើឧបករណ៍ចោះ យើងអាចចងទប់ស្បូនទៅនឹងឆ្អឹងអាងត្រគាកផ្នែកខាងក្រោយ ។
វិធីនេះមានសារៈប្រយោជន៍ខ្លាំងដល់ស្ត្រី ដោយរក្សាទុកស្បូន សុខភាពបន្តពូជ ជាពិសេសស្ត្រីដែលនៅវ័យក្មេង អាចឲ្យមានបុត្រទៅថ្ងៃក្រោយ ។
ប្រសិនបើស្ត្រីដែលមានរោគសញ្ញាដូចរៀបរាប់ខាងលើ ឬស្ត្រីដែលអស់រដូវ សូមមេត្តារួសរាន់មកពិគ្រោះនិងពិនិត្យសុខភាពជាមួយវេជ្ជបណ្ឌិតឯកទេសរោគស្ត្រី ដើម្បីធ្វើការព្យាបាលទាន់ពេលវេលា ៕
ចែករំលែកព័តមាននេះ