អ្នកទស្សនវិជ្ជាពុទ្ធសាសនា ព្រះមហាស៊ឹម សានិត បានមានថេរដីកាថា គោលការណ៍ប្រតិបត្តិសម្រាប់មេដឹកនាំមាន៦យ៉ាង តាមមាគ៌ាព្រះពុទ្ធសាសនាគឺ:
១- ទាន ឬចាគ មេដឹកនាំជាបុគ្គលដែលបដិបត្តិនូវការឱ្យទានជាប្រក្រតី ឬលះបង់ទ្រព្យធនដ៏សមគួរដើម្បីផ្តល់ក្តីសុខដល់អាណាប្រជានុរាស្ត្រ ។
២- សីល មេដឹកនាំជាបុគ្គលដែលរក្សាសីល សីល៥ សីល៨ មានសីលធម៌ និងក្រមអភិសមាចារត្រឹមត្រូវ មានអាកប្បកិរិយាល្អ និង ឥរិយាបថផ្លូវចិត្តល្អ ទឹកចិត្តល្អប្រពៃ ។
៣- ខន្តិ មេដឹកនាំជាបុគ្គលដែលបដិបត្តិនូវខន្តីធម៌ សេចក្តីអត់ធ្មត់ ចេះគ្រប់គ្រងចិត្តខ្លួនឯងបានល្អ ជាបុគ្គលមិនសម្បូណ៌ទោសៈ ឬសេចក្ដីក្រោធនៅក្នុងចិត្ត ។
៤- វីរិយៈ មេដឹកនាំជាបុគ្គលដែលប្រារព្ធសេចក្តីព្យាយាមឥតឈប់ឈរ មិនទម្រន់ មិនច្រអូសកាយចិត្ត មិនខ្ជិលច្រអូស ។
៥- សមាធិ មេដឹកនាំជាបុគ្គលដែលតែងតែប្រតិបត្តិនូវសមាធិចិត្តកម្មជាប្រក្រតី (ព្យាយាមហាត់ធ្វើចិត្តឱ្យមានអារម្មណ៍មូលតែមួយ គ្រប់គ្រងអារម្មណ៍មិនឱ្យបែកខ្ញែក ។
៦- បញ្ញា ឬបញ្ញាចក្ខុ មេដឹកនាំជាបុគ្គលដែលមានបញ្ញាឈ្លាសវៃក្នុងកិច្ចការសព្វសារពើ ឬជាបុគ្គលដែលព្យាយាមហ្វឹកហាត់ ហាត់រៀនដើម្បីបង្កើន ចំណេះដឹង ការយល់ដឹង បញ្ញា និងដើម្បីអភិវឌ្ឍខ្លួនឥតឈប់ឈរ និងជាបុគ្គលដែលមានទស្សនវិស័យវែងឆ្ងាយ ៕ សាន សារិន
ចែករំលែកព័តមាននេះ