ភ្នំពេញ៖ បន្ទាប់ពី​នាំមិត្តភក្តិ និងកូនៗ ទស្សនា​ប្រាសាទអង្គរវត្ត​ នៅខេត្តសៀមរាបរួចមក នាល្ងាច​ថ្ងៃទី២៣ ​ខែកុម្ភៈ ឆ្នាំ២០២២ តារា​ភាពយន្ត Hollywood គឺអ្នកនាង Angelina Jolie បានមកកំសាន្ត និងដើរទិញវត្ថុ​អនុស្សាវរីយ៍ នៅក្នុងផ្សារទួលទំពូង។ ផ្សារទួលទំពូង ជាផ្សារទេសចរណ៍ដ៏ល្បីល្បាញ ដែល​បរទេស​ស្គាល់ថា ជាផ្សាររុស្ស៊ី​ មានលក់​វត្ថុអនុស្សាវរីយ៍ សម្រាប់អ្នកទេសចរបរទេស​។

កាលពីថ្ងៃទី២២ ខែកុម្ភៈ ឆ្នាំ២០២២ តារាភាពយន្ត​ហូ​លី​វូ​ដ លោកស្រី Angelina Jolie បាន​បង្ហាញ​វត្តមាន​ដ៏​គួរ​ឲ្យ​ភ្ញាក់ផ្អើល ​នៅ​លើ​ទឹកដីអង្គរ ​ខេត្តសៀមរាប ជា​ថ្មី​ម្តងទៀត បន្ទាប់​ពី​តារា​អន្តរជាតិ​រូប​នេះ ក៏​ធ្លាប់​មក​ស្រុក​ខ្មែរ ដោយមកថតកុន ក៏​ដូច​ជា ​ធ្វើការងារ​សប្បុរសធម៌​នានា​ ជា​បន្តបន្ទាប់ ​កាលពី​ពេល​កន្លង​ទៅ​។

មហាជន ជា​ពិសេស​បណ្តា​អ្នកប្រើហ្វេសប៊ុក ​នៅ​កម្ពុជា បាន​សំដែង​ការ​ភ្ញាក់ផ្អើល​យ៉ាង​ខ្លាំង ក្នុង​ពេល​ដែល​ Angelina Jolie ដើរ​កំសាន្ត ដោយ​អម​ជាមួយនឹង​មិត្តភក្តិ​ជិត​ស្និទ្ធ និង​សាច់ញាតិ​មួយ​ចំនួន​ទៀត​របស់​លោកស្រី ​នៅ​ប្រាង្គប្រាសាទបុរាណ​ លើ​ទឹកដី​សៀមរាប​អង្គរ​។

​នៅ​ព្រឹក​ថ្ងៃ​ទី​២២ ខែកុម្ភៈ ឆ្នាំ​២០២២​នេះ ផេ​ក​ហ្វេ​ស​ប៊ុ​ក​ ដែល​មានឈ្មោះ​ថា Angelina Jolie/ Angie ក៏​បាន​បង្ហោះ​រូបភាព​សកម្មភាព​នានា​របស់​តារាភាពយន្ត​រូប​នេះ ជាមួយនឹង​ការ​ភ្ជាប់​សារ​ថា «Angelina Jolie នៅ​ក្នុង​តំបន់​អង្គរវត្ត នៃ​ប្រទេស​កម្ពុជា​» ។

រូបភាព​ទាំងនេះ ត្រូវ​បាន​មហាជន​កម្ពុជា នាំ​គ្នា​ចែកចាយ​ពេញ​បណ្តាញ​សង្គម​ហ្វេ​ស​ប៊ុ​ក​យ៉ាង​ព្រោងព្រាត ដោយ​អម​ជាមួយនឹង​ពាក្យពេចន៍​នៃ​ការ​ស្វាគមន៍​ការ​វិល​មក​កាន់​ប្រទេស​កម្ពុជា​ជា​ថ្មី ពី​កំពូល​តារា​សម្តែង​ហូ​លី​វូ​ដ គឺ​អ្នកស្រី Angelina Jolie នា​ពេល​នេះ ខណៈ​ពេល​ដែល​ពួក​គេ​ចាត់​ទុក​ថា នេះ​ជា​ការ​វិល​មក​ផ្ទះ​របស់​អ្នកស្រី ក្នុង​នាម​ជា​ជនជាតិ​ខ្មែរ​មួយ​រូប ដែល​ទទួល​បាន​ស​ញ្ជាតិខ្មែរ ​រយៈពេល​ជិត ​២០​ឆ្នាំ​មកនេះ​។

​​ក្នុង​បទ​សម្ភាសន៍​ជាមួយ​សារព័ត៌មាន​បរទេស​មួយ ​កាលពី​កន្លង​ទៅ លោកស្រី Angelina Jolie បាន​អះ​អាង​ថា លោកស្រី ​មាន​គម្រោង​ត្រឡប់​មក​ប្រទេស​កម្ពុជា ក្នុង​ឆ្នាំ​២០២២ នេះ ដើម្បី​សម្ពោធ​កម្មវិធី​ចិញ្ចឹមសត្វ​ឃ្មុំ​ សម្រាប់​ស្ត្រី (Woman for Bee) ក្នុងស្រុក​សំឡូត ខេត្តបាត់ដំបង់ ដែល​​លោកស្រី ​ក៏មានផ្ទះ ​នៅ​ក្នុង​ខេត្ត​បាត់ដំបងនោះ​​ផង​ដែរ​។

លោកស្រី​បញ្ជាក់​ថា យើង​នឹង​ធ្វើ​ការងារ​បន្ថែម​ជាមួយ​អង្គការ​យូ​ណេ​ស្កូ ដើម្បី​សិក្សា​ស្វែង​យល់​ពី​របៀប​ធ្វើការ​ជាមួយ​បណ្តា​ប្រទេស​នានា ហើយ​ការ​បណ្តុះបណ្តាល​បន្តបន្ទាប់​ទៀត នឹង​ត្រូវធ្វើ​ឡើង​ នៅផ្ទះ​របស់ខ្ញុំ គឺ​នៅ​ស្រុក​សំឡូត ខេត្តបាត់ដំបង ប្រទេស​កម្ពុជា​។

លោកស្រី​បន្ថែម​ថា ក្រោយ​បង្ហាញ​អំពី​គម្រោង​នេះ​ហើយ លោកស្រី​ ក៏​មាន​គម្រោង​ហ្វឹកហាត់​ដល់​ស្ត្រី​កម្ពុជា តាម​រយៈ​កម្មវិធី​ «ចិញ្ចឹមសត្វ​ឃ្មុំ សម្រាប់​ស្ត្រី» (Woman for Bee) ពី​របៀប​នៃ​ការ​ចិញ្ចឹមសត្វ​ឃ្មុំ ក្នុង​រយៈពេល ​៥​ឆ្នាំ​ខាង​មុខ​។

ជា​ការ​កត់សម្គាល់ កំពូល​តា​រាហូ​លី​វូ​ដ លោក​ស្រី Angelina Jolie ទទួល​បាន​សញ្ជាតិ​ខ្មែរ ​កាលពី​អំឡុង​ឆ្នាំ​២០០៥ និង​មានផ្ទះ​មួយ​ ក្នុងស្រុក​សំឡូត នៃ​ខេត្តបាត់ដំបង​។ លោកស្រី ក៏​បាន​ទទួលយក​កូន​ខ្មែរ​ម្នាក់​ពី​មជ្ឈមណ្ឌល​កុមារ​កំព្រា មានឈ្មោះ​ថា Maddox ទៅ​ចិញ្ចឹម តាំងពី​កុមារ​រូប​នោះ ​មាន​វ័យ ​៧​ខែ ខណៈ​បច្ចុប្បន្ន Maddox មាន​វ័យ​ប្រមាណ​ ២០​ឆ្នាំ​ហើយ​៕

(រូបភាពពីហ្វេសប៊ុក Chamroeun Soklim )