រាជធានីភ្នំពេញ ៖ នៅថ្ងៃទី១០ ខែកុម្ភៈ ឆ្នាំ២០២៦ ឯកឧត្តម គួច សុមាន រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម…
រាជធានីភ្នំពេញ ៖ នៅថ្ងៃទី១០ ខែកុម្ភៈ ឆ្នាំ២០២៦ ឯកឧត្តម គួច សុមាន រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមជាគណៈអធិបតី និងថ្លែងសុន្ទរកថាស្វាគមន៍ក្នុងពិធីបើក «សិក្ខាសាលាពិគ្រោះយោបល់ថ្នាក់ជាតិ ស្តីពីការធ្វើសមាហរណកម្មសេដ្ឋកិច្ច នៃប្រជាជនចំណូលស្រុក និងយុទ្ធសាស្ត្រអភិវឌ្ឍន៍ខេត្តជាប់ព្រំដែនក្រោយជម្លោះ» នៅសណ្ឋាគារ ហៃយ៉ាត់ រីជិនស៊ី ភ្នំពេញ ដោយមានការចូលរួមពីតំណាងស្ថាប័នពាក់ព័ន្ធជាច្រើនរូប ។
សិក្ខាសាលានេះត្រូវបានរៀបចំឡើង ក្នុងគោលបំណងពិនិត្យមើលវឌ្ឍនភាព នៃការធ្វើសមាហរណកម្មសេដ្ឋកិច្ចរបស់ប្រជាជនចំណូលស្រុក ឬអតីតពលករពីបរទេស តាមរយៈការវាយតម្លៃលទ្ធផលដែលសម្រេចបាន បញ្ហាប្រឈមដែលនៅសេសសល់ និងការស្វែងរកមាគ៌ាអនុវត្តជាក់ស្តែង ដើម្បីបញ្ចូលពួកគាត់ទៅក្នុងទីផ្សារការងារ និងសេដ្ឋកិច្ចជាតិឱ្យកាន់តែមានប្រសិទ្ធភាព ។
ក្នុងឱកាសនោះ ឯកឧត្តម គួច សុមាន បានលើកឡើងពីសារៈសំខាន់ នៃការកែសម្រួលទស្សនៈសេដ្ឋកិច្ចនៅតំបន់ព្រំដែនក្រោយជម្លោះ ដោយផ្អែកលើដំណោះស្រាយជាក់ស្តែង ដើម្បីបង្កើតការយល់ដឹងរួមអំពីឧបសគ្គ និងឱកាសនានា។ គោលដៅសំខាន់គឺការប្រែក្លាយតំបន់ទាំងនេះឱ្យទៅជាប្រព័ន្ធសេដ្ឋកិច្ច ដែលមានផលិតភាពខ្ពស់ តាមរយៈការជំរុញការវិនិយោគ លើវិស័យកែច្នៃកសិផល ឧស្សាហកម្មស្រាល សេវាកម្ម និងការបង្កើនកម្លាំងពលកម្ម តាមរយៈការអប់រំបច្ចេកទេស និងបណ្តុះបណ្តាលវិជ្ជាជីវៈ (TVET) ។
សិក្ខាសាលាដ៏មានសារៈសំខាន់នេះ ត្រូវបានរៀបចំឡើង ដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) សហការជាមួយវិទ្យាស្ថានស្រាវជ្រាវសេដ្ឋកិច្ច សម្រាប់អាស៊ាន និងអាស៊ីបូព៌ា (ERIA) ។ ដើម្បីឆ្លើយតបទៅនឹងការវិលត្រឡប់ របស់ពលករពីប្រទេសថៃ វិទ្យាស្ថានទាំងពីរ បានសហការគ្នា បង្កើតកម្មវិធីអន្តរាគមន៍មួយ សម្រាប់ការធ្វើសមាហរណកម្ម នៃការវិលត្រឡប់នោះ ដោយមានគោលបំណងផ្លាស់ប្តូរ គោលនយោបាយពីការឆ្លើយតបបន្ទាន់ ផ្នែកមនុស្សធម៌ ទៅកាន់ការធ្វើសមាហរណកម្មសេដ្ឋកិច្ច និងការស្តារឡើងវិញក្រោយជម្លោះ ជាពិសេសនៅតាមបណ្តាខេត្តជាប់ព្រំដែន ៕ អត្ថបទសហការ
ចែករំលែកព័តមាននេះ