ទីក្រុងណៃរ៉ូប៊ី ៖ ធនាគារកណ្តាលរបស់ប្រទេសកេនយ៉ាបានព្រមានប្រជាជនរបស់ខ្លួនឱ្យឈប់ប្រើប្រាស់ក្រដាសប្រាក់ដើម្បីធ្វើភួង កម្រង ឬ បាច់ផ្កា និងគ្រឿងតុបតែងមានរូបរាងដូចផ្កាទាំងអស់ សម្រាប់អំណោយ ដែលកំពុងពេញនិយមខ្លាំងនៅពិភពលោក ហើយភាពពេញនិយមនេះ…
ទីក្រុងណៃរ៉ូប៊ី ៖ ធនាគារកណ្តាលរបស់ប្រទេសកេនយ៉ាបានព្រមានប្រជាជនរបស់ខ្លួនឱ្យឈប់ប្រើប្រាស់ក្រដាសប្រាក់ដើម្បីធ្វើភួង កម្រង ឬ បាច់ផ្កា និងគ្រឿងតុបតែងមានរូបរាងដូចផ្កាទាំងអស់ សម្រាប់អំណោយ ដែលកំពុងពេញនិយមខ្លាំងនៅពិភពលោក ហើយភាពពេញនិយមនេះ បានហូរចូលមកដល់ប្រទេសអាហ្វ្រិកខាងកើតមួយនេះផងដែរ។ នេះបើយោងតាមប្រភពពី BBC បានចេញផ្សាយកាលពីសប្តាហ៍មុន។
ក្រដាសប្រាក់ត្រូវបានដកជាញឹកញាប់ មុនទិវានៃក្តីស្រឡាញ់ ហើយពេញនិយមខ្លាំងពីសំណាក់បណ្តាតារាល្បីៗ និងបុគ្គលល្បីៗលើអ៊ីនធឺណិត ដោយចែករំលែកវីដេអូរបស់ពួកគេបង្ហាញបាច់ផ្កាក្រដាសប្រាក់ជាច្រើនបែបនេះ។ ដើម្បីធ្វើបាច់ផ្កា ក្រដាសប្រាក់មានពណ៌ និងតម្លៃខុសៗគ្នាត្រូវបានរមូរ ហើយបន្ទាប់មកបិទភ្ជាប់ជាមួយគ្នាធ្វើឱ្យវាមើលទៅដូចជាផ្កាមួយបាច់។
ទោះយ៉ាងណា ធនាគារកណ្តាលកេនយ៉ា (CBK) កាលពីថ្ងៃទី២ ខែកុម្ភៈ ឆ្នាំ២០២៦បានជូនដំណឹងថា អ្នកធ្វើបែបនេះ កំពុងតែបំផ្លាញរូបិយប័ណ្ណកេនយ៉ា ហើយអាចប្រឈមមុខនឹងការជាប់ពន្ធនាគារ ៧ ឆ្នាំ ប្រសិនបើត្រូវបានចាប់ខ្លួន។ CBK បានអះអាងថា ការបត់ប្រកាសប្រាក់ស៊ីលលីងកេនយ៉ា (Kenyan Shilling) ទៅជាផ្កាប្រឈមនឹងហានិភ័យធ្វើឱ្យខូចសុចរិតភាពនៃរូបិយប័ណ្ណ ហើយការប្រើកាវ ដែកកិប និងម្ជុលអាចធ្វើឱ្យក្រដាសប្រាក់មិនស័ក្តិសមសម្រាប់ចរាចរ។ ទាំងនេះក៏ប៉ះពាល់ដល់ឧបករណ៍ដូចជា ម៉ាស៊ីនដកប្រាក់ស្វ័យប្រវត្តិ (ATM) និងម៉ាស៊ីនរាប់ប្រាក់ ហើយស្ថានភាពនេះ នាំឱ្យមានការកើនឡើងបរិមាណក្រដាសប្រាក់ត្រូវបានបោះចោល ដែលបង្ខំឱ្យមានការដកប្រាក់ និងជំនួសក្រដាសប្រាក់មុនការរំពឹងទុក បណ្តាលឱ្យមានការចំណាយមិនចាំបាច់សម្រាប់សាធារណជន និងធនាគារ។
CBK មិនជំទាស់នឹងការប្រើប្រាស់សាច់ក្រដាសប្រាក់ជាអំណោយនោះទេ។ ប៉ុន្តែការប្រើប្រាស់បែបនេះ មិនត្រូវបានរាប់បញ្ចូលនៅក្នុងសកម្មភាពណាមួយដែលផ្លាស់ប្តូរ បំផ្លាញ ឬបង្ខូចទ្រង់ទ្រាយក្រដាសប្រាក់នោះទេ ហើយបានស្នើសុំឱ្យស្វែងរកវិធីផ្សេងដើម្បីធ្វើអំណោយ ដែលមិនធ្វើឱ្យខូចក្រដាសប្រាក់។
ប្រទេសកេនយ៉ា គឺជាប្រទេសដាំដុះផ្កាលំដាប់ពិភពលោកមួយ ដូច្នេះការប្រកាសនេះ ត្រូវបានសារទរដោយប្រជាជនជាច្រើនដែលថា ផ្កាស្រស់ៗនឹងក្លាយជាអំណោយស័ក្តិសម និងសមស្របជាង សម្រាប់ទិវានៃក្តីស្រឡាញ់ នៅថ្ងៃទី១៤ ខែកុម្ភៈ ខាងមុខនេះ៕
ចែករំលែកព័តមាននេះ