ខេត្តកំពង់ស្ពឺ ៖ ខែប្រាំងជារដូវកាលដ៍ល្អនៅក្នុងការផលិតស្ករត្នោត ដោយសារទឹកត្នោតខែចេត្រផ្អែមឆ្ងាញ់ ។ នៅឆ្នាំនេះតម្រូវការស្ករត្នោតលើទីផ្សារអន្តរជាតិ មានការកើនឡើង តែពលរដ្ឋអ្នកផលិតស្ករត្នោតនៅខេត្តកំពង់ស្ពឺបារម្ភមិនអាចផលិតបានតាមតម្រូវការ ដោយសារអាកាសធាតុប្រែប្រួល និងអ្នកផលិតមានចំនួនតិច…
ខេត្តកំពង់ស្ពឺ ៖ ខែប្រាំងជារដូវកាលដ៍ល្អនៅក្នុងការផលិតស្ករត្នោត ដោយសារទឹកត្នោតខែចេត្រផ្អែមឆ្ងាញ់ ។ នៅឆ្នាំនេះតម្រូវការស្ករត្នោតលើទីផ្សារអន្តរជាតិ មានការកើនឡើង តែពលរដ្ឋអ្នកផលិតស្ករត្នោតនៅខេត្តកំពង់ស្ពឺបារម្ភមិនអាចផលិតបានតាមតម្រូវការ ដោយសារអាកាសធាតុប្រែប្រួល និងអ្នកផលិតមានចំនួនតិច ។
លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ បានឱ្យដឹងថា សមាគមរបស់លោកបានកំពុងត្រៀមចុះកុងត្រាជាមួយក្រុមហ៊ុនចំនួន ៤ ដើម្បីនាំស្ករត្នោតចេញទៅក្រៅប្រទេស ។ តែលោកកំពុងព្រួយបារម្ភខ្លាចមិនអាចផ្គត់ផ្គង់ឱ្យក្រុមហ៊ុនទាំងនោះគ្រប់ទៅតាមបរិមាណដែលគេចង់បានពី ១៥០ ទៅ ១៦០ តោន ព្រោះបច្ចុប្បន្នសមាជិករបស់សមាគមមានតែ ១៥០ គ្រួសារ ហើយអាកាសធាតុមានការប្រែប្រួល ជាហេតុអាចធ្វើឱ្យការផលិតស្ករត្នោតជួបការលំបាកក្នុងការថែរក្សាអនាម័យ ការផលិតមិនបានគ្រប់គ្រាន់ ។
លោកបន្តថា «បើយើងមិនអាចផលិតបានទៅតាមការចង់បាននោះ វានឹងធ្វើក្រុមហ៊ុនជួបបញ្ហាជាមួយដៃគូនៅខាងក្រៅដែរ ពីព្រោះគេបញ្ជាទិញពីយើង ដើម្បីនាំចេញ ។ ដូចនេះបើយើងមិនធ្វើតាមកុងត្រាអាចធ្វើឱ្យក្រុមហ៊ុនអស់ជំនឿមកលើយើង» ។
តាមប្រធានសមាគមលើកកម្ពស់ស្ករត្នោតកំពង់ស្ពឺថា ការផលិតស្ករត្នោតរបស់សមាជិកសមាគមបានចាប់ផ្តើមតាំងពីខែមករា និងចប់នៅថ្ងៃទី ៣០ ខែឧសភា ឆ្នាំ ២០២២ ។ តាមលោក សំ សារឿន ការផលិតស្ករត្នោតកំពង់ស្ពឺកាលពីឆ្នាំ ២០២១ ក្រុមហ៊ុនកុងត្រាទទួលទិញមានបរិមាណចំនួនតិច ហើយប្រភេទស្ករម្ស៉ៅអាចលក់ក្នុងតម្លៃ ៦,៨លានរៀលក្នុងមួយតោន ។ នៅឆ្នាំ ២០២២ នេះអាចលក់បាន ៧ លានរៀលក្នុងមួយតោន ។ ជារួមក្នុងឆ្នាំ ២០២១ ការផលិតស្ករត្នោតចេញពីផលិតកម្មសមាគមមាន ២៥០ តោន ក្នុងនោះស្ករម្ស៉ៅមាន ១០០ តោន និងស្ករសាច់មាន ១៥០ តោន ៕
ចែករំលែកព័តមាននេះ