នកស្រុកអង្គរ រក្សាបាននៅទំនៀមទម្លាប់ចាប់ត្រីរួមគ្នាសម្រាប់ធ្វើម្ហូបត្រៀមឡើងមាឃ ឬឡើងអ្នកតា ក្រោយពីបញ្ចប់ការងារច្រូតកាត់ ប្រមូលផលស្រូវរួចរាល់ហើយ
ខេត្តសៀមរាប ៖ នាថ្ងៃទី២១ ខែកុម្ភៈ ឆ្នាំ២០២២នេះ អ្នកស្រុកអង្គរ រក្សាបាននៅទំនៀមទម្លាប់ចាប់ត្រីរួមគ្នាសម្រាប់ធ្វើម្ហូបត្រៀមឡើងមាឃ ឬឡើងអ្នកតា ក្រោយពីបញ្ចប់ការងារច្រូតកាត់ ប្រមូលផលស្រូវរួចរាល់ហើយ ។
ប្រជាជននៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប តែងតែនាំគ្នាប្រារព្ធពិធីចាប់ត្រីសម្រាប់ឡើងមាឃ ឬឡើងអ្នកតា ជារៀងរាល់ខែមាឃ តាមទម្លាប់មិនដែលអាក់ខានបានឡើយ។ ពិធីចាប់ត្រីរួមគ្នានេះ ធ្វើឡើងនៅក្នុងបឹងបុរាណមួយ ដែលអ្នកភូមិអភិរក្សត្រី មិនឲ្យមានការនេសាទផ្តេសផ្តាសនោះទេ គឺទុកសម្រាប់តែរកត្រីរួមគ្នាក្នុងឱកាសធ្វើពិធីឡើងមាឃ ឬឡើងអ្នកតាតែប៉ុណ្ណោះ ។
បើតាមលោកមេភូមិ ពេជ្រ ឃិន បានឲ្យដឹងថា ពិធីចាប់ត្រីឡើងមាឃ ត្រូវប្រារព្ធធ្វើឡើងនៅថ្ងៃ១កើត ខែមាឃ តែត្រូវពន្យារពេលមកដល់៥រោច ខែមាឃនេះវិញ មូលហេតុដោយសារទឹកក្នុងបឹងច្រើន ថែមទាំងមានភ្លៀងកក់ខែថែមទៀត ដែលនាំឲ្យពិបាកក្នុងការចាប់ត្រីបន្តិច ដោយការនេសាទប្រើតែឧបករណ៍បុរាណសុទ្ធសាធ។
លោកឱ្យដឹងទៀតថា ឆ្នាំនេះ ត្រីក្នុងបឹងសម្បូរ ហើយប្រជាពលរដ្ឋមានការយល់ដឹង និងចូលរួមអភិរក្សកាន់តែបានល្អប្រសើរពីមួយឆ្នាំទៅមួយឆ្នាំ។ ហើយគណៈកម្មការបានកំណត់ការជួបជុំគ្នា និងចុះចាប់ពីម៉ោង៧ព្រឹក ដែលមានបាញ់កាំជ្រួចធ្វើជាសញ្ញាផងដែរ ។ ជំនួសការហ៊ុសម្រាស់ នៅឆ្នាំនេះ គណៈកម្មការរៀបចំកម្មវិធី បានសម្រេចជីកស្រះមួយនៅក្នុងផ្ទៃបឹង ដើម្បីទុកចាប់ត្រីរួមយកទៅធ្វើជាម្ហូបអាហារ និងធ្វើចង្ហាន់ជាដើម នៅក្នុងពីធីឡើងមាឃ ដោយឡែកត្រីដែលរកបានពីបឹង ប្រជាពលរដ្ឋអាចយកទៅធ្វើជាម្ហូបលក្ខណៈគ្រួសារបាន ។
លោកមេភូមិបញ្ជាក់ថា ជារៀងរាល់ឆ្នាំ ការត្រីចាប់រួម គឺបានមិនក្រោមមួយរយគីឡូនោះឡើយ និងអនុញ្ញាតឲ្យតែអ្នកភូមិបង្កោងតែប៉ុណ្ណោះ ។ ប៉ុន្ដែក្រោយពីអ្នកភូមិបង្កោង បានធ្វើពិធីចាប់ត្រីរួមគ្នារួចហើយ ទើបអ្នកភូមិផ្សេងៗអាចមានសិទ្ធិមករកត្រីនៅបឹងនេះនៅថ្ងៃបន្ទាប់បាន។
លោក ភក្តិ ភណ្ឌ អ្នកចូលរួមចាប់ត្រីម្នាក់ ក្នុងចំណោមប្រជាពលរដ្ឋភូមិបង្កោង បានសម្តែងការសប្បាយចិត្ត ដោយភូមិរបស់ខ្លួនរក្សានូវទំនៀមទម្លាប់ដែលមានតាំងពីយូរមកហើយ។ លោក ភក្តិ ភណ្ឌ បញ្ជាក់ថា ក្រោមដំបូលសុខសន្តិភាព បានធ្វើឲ្យពួកគាត់បានមកចូលរួមចាប់ត្រីនៅបឹងនេះមិនដែលខកខាន ក្រៅពីរកត្រីក៏បានជួបជុំបងប្អូនក្នុងភូមិសប្បាយរីករាយ ហើយត្រីដែលរកបានមួយផ្នែកនឹងធ្វើទឹកនំបញ្ចុកប្រគេនចង្ហាន់ព្រះសង្ឃក្នុងថ្ងៃឡើងមាឃ និងមួយផ្នែកទៀតសម្រាប់ក្រុមគ្រួសារ ព្រមទាំងបានអរគុណសន្តិភាព អរគុណស្ថាបនិកសន្តិភាព ដែលមានសម្តេចតេជោ ហ៊ុន សែន ជាប្រមុខរាជរដ្ឋាភិបាល នៃព្រះរាជាណាចក្រកម្ពុជា ។
លោក គួយ សង្វារ ប្រជាពលរដ្ឋរស់នៅខេត្តកណ្តាល ដែលបានមកមើលព្រឹត្តិការណ៍ចាប់ត្រីរួមគ្នាត្រៀមឡើងមាឃ របស់អ្នកភូមិបង្កោងបានឲ្យដឹងថា នេះជាលើកទីមួយ សម្រាប់រូបលោកដែលបានឃើញទំនៀមទម្លាប់ចាប់ត្រីរួមគ្នា ដែលជាទំនៀមទម្លាប់របស់អ្នកស្រុកអង្គរ។ទិដ្ឋភាពសប្បាយរីករាយ ប្រជាជនក្នុងភូមិបានជួបជុំគ្នា ដោយមេភូមិដឹកនាំធ្វើបន្តមិនដែលដាច់ និងរីកចម្រើនបន្ថែមទៀត។ ហើយលោកក៏ចង់ឲ្យមានពិធីនេះ នៅតែរក្សាបានគង់វង្ស ព្រមទាំងសំណូមពរដល់ប្រជាពលរដ្ឋចូលរួមថែរក្សាទំនៀមទម្លាប់វប្បធម៌ទាំងអស់គ្នា ៕
ចែករំលែកព័តមាននេះ