រាជធានីភ្នំពេញ ៖ ឧស្សាហកម្មកាត់ដេរ និងស្ថិតស្ថេរយូរឆ្នាំនៅកម្ពុជាទៅមុខទៀតក្នុងការចិញ្ចឹមពលរដ្ឋ និងសេដ្ឋកិច្ចជាតិ ។ មន្ត្រីអះអាងថា ផែនការអភិវឌ្ឍវិស័យកាត់ដេរទៅជាផ្នែកជំនាញលើសពីសព្វថ្ងៃនេះបានតាក់តែងរួចហើយ ដើម្បីជំរុញការអភិវឌ្ឍន៍ឧស្សាហកម្មនេះឱ្យកាន់តែមានជំនាញលើសអ្វីដែលមានសព្វថ្ងៃដើម្បីបង្កើនចំណូលបន្ថែម ។…
រាជធានីភ្នំពេញ ៖ ឧស្សាហកម្មកាត់ដេរ និងស្ថិតស្ថេរយូរឆ្នាំនៅកម្ពុជាទៅមុខទៀតក្នុងការចិញ្ចឹមពលរដ្ឋ និងសេដ្ឋកិច្ចជាតិ ។ មន្ត្រីអះអាងថា ផែនការអភិវឌ្ឍវិស័យកាត់ដេរទៅជាផ្នែកជំនាញលើសពីសព្វថ្ងៃនេះបានតាក់តែងរួចហើយ ដើម្បីជំរុញការអភិវឌ្ឍន៍ឧស្សាហកម្មនេះឱ្យកាន់តែមានជំនាញលើសអ្វីដែលមានសព្វថ្ងៃដើម្បីបង្កើនចំណូលបន្ថែម ។
លោក ផាន់ ផល្លារ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្នុងវេទិការសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកា ឆ្នាំ ២០២២ បានលើកឡើងថា វិស័យកាត់ដេរ គឺជាវិស័យមួយសំខាន់សម្រាប់កំណើនសេដ្ឋកិច្ច ក្នុងនោះនៅក្នុងរយៈពេលកន្លងមកមកនេះ ក្រសួងបានរៀបចំយុទ្ធសាស្ត្រអភិវឌ្ឍវិស័យកាត់ដេរ បច្ចុប្បន្នការរៀបចំយុទ្ធសាស្ត្រនេះបានបញ្ចប់រួចរាល់ ។ «ក្នុងយុទ្ធសាស្ត្រអភិវឌ្ឍន៍វិស័យកាត់ដេរនោះ គឺរាជរដ្ឋាភិបាលចង់ឃើញវិស័យនេះមានតម្លៃបន្ថែមខ្ពស់ និងការផលិតនូវទំនិញដែលល្អជាងមុន និងការផ្តល់ប្រាក់ចំណូលកាន់តែខ្ពស់» ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យសេរីកម្មករកម្ពុជា បានឱ្យដឹងកាលពីថ្ងៃទី ២១ ខែកុម្ភៈ ឆ្នាំ២០២២ នេះថា តាមពិតទៅយុទ្ធសាស្ត្រអភិវឌ្ឍន៍វិស័យកាត់ដេរ គឺជាយុទ្ធសាស្ត្រមួយដែលខាងសហជីពក៏ដូចជាខាងអង្គការ ILO និងក្រសួងសេដ្ឋកិច្ច និងហិរញ្ញវត្ថុ រួមនិងក្រសួងការងារ និងបណ្តុះបណ្តាល បានជជែកគ្នាជាង ៣ ឆ្នាំមកហើយ ។ «ខ្ញុំគិតថា បើសិនយុទ្ធសាស្ត្រអភិវឌ្ឍវិស័យមួយនេះចេញ មានន័យថា វាល្អហើយ ព្រោះនៅក្នុងយុទ្ធសាស្ត្រនោះមានការពិនិត្យគ្រប់ជ្រុងជ្រោយតាំងពីការបង្កើនជំនាញ, ការបញ្ចុះថ្លៃអគ្គិសនី ទឹកភ្លើង, តាំងពីទាក់ទាញអ្នកវិនិយោគ, តាំងពីការច្នៃម៉ូដ និងចេញម៉ូដ» ។
លោកបន្តថា វិស័យកាត់ដេរ នៅកម្ពុជាមានលក្ខណៈខ្សោយនៅឡើយ ។ គេអាចនិយាយថា ផលិតកម្មបានតែប្រភេទទំនិញ ឬម៉ូដម៉ាកផលិតផលមានលក្ខណៈសាមញ្ញៗ ដែលមានតម្លៃបន្ថែមទាបដែលងាយស្រួលក្នុងការដេរសម្រាប់តែប្រកួតប្រជែងជាមួយបង់ក្លាដេស វៀតណាម និងភូមា ។ ប៉ុន្តែសម្រាប់ម៉ូដថ្លៃៗដែលមានតម្លៃបន្ថែមខ្ពស់អត់ទេដែលភាគច្រើនគេផលិតនៅប្រទេសចិន កូរ៉េ និងហុងកុងដែលជាប្រទេសជឿនលឿន ។
ប្រធានសម្ព័ន្ធសហជីពប្រជាធិបតេយ្យសេរីកម្មករកម្ពុជា ថាអស់រយៈពេល ២០ ឆ្នាំហើយសម្រាប់វិស័យកាត់ដេរនៅកម្ពុជាសមរម្យដែលអាចអភិវឌ្ឍជំនាញម៉ូដ និងចេញម៉ូដថ្មីៗបាន ព្រោះបច្ចេកវិទ្យា ៤.០ ក៏ចេញ ហើយកម្មករបានធ្វើការនៅក្នុងវិស័យយូរឆ្នាំហើយម៉ាស៊ីស្វ័យប្រវត្តិក៍មានច្រើន គួរតែអាចចាប់ផ្តើមបាន ។ លោក អាត់ ធន់ បានបញ្ជាក់ថា កន្លងមកកម្ពុជាធ្លាប់ផលិតអាវ ខោ និងស្បែកជើង ដែលមានតម្លៃថ្លែ ពី ៧០០ ទៅដល់ ១០០០ ដុល្លារអាមេរិកដែរ ។
តាមរបាយការណ៍ អគ្គនាយកដ្ឋានគយ និងរដ្ឋាករកម្ពុជា សម្រាប់ការនាំចេញផលិតផលកាត់ដេរ មានចំនួនជាង ១១ ៣៨៩ លានដុល្លារអាមេរិក កើនឡើងប្រមាណ ១ ៥០៥ លានដុល្លារអាមេរិក ស្មើនឹង ១៥.២% ។ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឱ្យដឹងថា នៅពេលនេះលទ្ធភាពនូវការរីកចម្រើនវិស័យកាត់ដេរនៅកម្ពុជាមានច្រើន ហើយវិស័យនេះនឹងនៅទ្រទ្រង់សេដ្ឋកិច្ចយូរឆ្នាំទៅមុខទៀត ។
លោកថា ការរីកចម្រើនឧស្សាហកម្មធន់មធ្យមនៅប្រទេសវៀតណាម បានធ្វើឱ្យប្រទេសនេះខ្វះកម្លាំងពលកម្មនៅតាមរោងចក្រ ហើយបញ្ហានៅប្រទេសភូមាបានធ្វើឱ្យការបញ្ជាទិញបែរមកកម្ពុជា និងការបង្វែររោងចក្រសហគ្រាសមកកម្ពុជា ផងដែរ ។ លោកថា ទៅថ្ងៃអនាគតកម្ពុជាចង់ឃើញវិនិយោគទុនក្នុងស្រុករកស៊ីក្នុងឧស្សាហកម្មនេះឱ្យបានច្រើនជាងអ្នកវិនិយោគពីបរទេស ៕
ចែករំលែកព័តមាននេះ