មានការភ្ញាក់ផ្អើលជាខ្លាំងនៅព្រឹកថ្ងៃទី២១ ខែកុម្ភៈ ក្រោយពីមានប្រជាពលរដ្ឋរាប់រយនាក់បានតម្រង់ជួរគ្នានៅក្នុងក្រសួងប្រៃសណីយ៍ និងទូរគមនាគមន៍ តាមបណ្តោយមហាវីថីព្រះមុនីវង្ស
រាជធានីភ្នំពេញ ៖ មានការភ្ញាក់ផ្អើលជាខ្លាំងនៅព្រឹកថ្ងៃទី២១ ខែកុម្ភៈ ក្រោយពីមានប្រជាពលរដ្ឋរាប់រយនាក់បានតម្រង់ជួរគ្នានៅក្នុងក្រសួងប្រៃសណីយ៍ និងទូរគមនាគមន៍ តាមបណ្តោយមហាវីថីព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ ដើម្បីទិញថ្នាំព្យាបាលជំងឺកូវីដ-១៩ យកទៅទុកនៅផ្ទះ បើទោះបីជាបងប្អូនខ្លះ មិនទាន់មានសមាជិកគ្រួសារកើតកូវីដ-១៩ ក៏ដោយ ។
យុវជន សំផន រស់នៅខេត្តកំពង់ស្ពឺ ដែលទិញព្យាបាលជំងឺកូវីដ១៩ បាន២ប្រអប់ ហើយដើរចេញមកខាងក្រៅក្រសួងប្រៃសណីយ៍ និងទូរគមនាគមន៍ បាននិយាយឲ្យដឹងថា គាត់បានទិញឱសថម៉ូលណាទ្រីស (ម៉ូលនូពីរ៉ាវា កាប់ស៊ុល ២០០ មីលីក្រាម) MOLNATRIS (Molnupiravir Capsules 200mg) សម្រាប់ព្យាបាលជំងឺកូវីដ-១៩ បានចំនួន២ប្រអប់ តាមការកំណត់របស់គ្រូពេទ្យ ព្រោះក្នុងមនុស្សម្នាក់ទិញបានតែ២ប្រអប់តែប៉ុណ្ណោះ ។ ចំពោះការប្រើប្រាស់វិញ ពេទ្យប្រាប់ថា ត្រូវលេបថ្នាំនេះ សម្រាប់រយៈពេល១២ម៉ោងម្តង ពេលអស់ថ្នាំយើងអាចមកទិញបានម្តងទៀត ។
យុវជន សំផន បានបន្តថា ក្រុមគ្រួសាររបស់គាត់មុនដំបូងមិនសូវមានការចាប់អារម្មណ៍ទៅលើការផ្សព្វផ្សាយរបស់ក្រសួងសុខាភិបាលស្តីពីឱសថម៉ូលណាទ្រីស (ម៉ូលនូពីរ៉ាវា កាប់ស៊ុល ២០០ មីលីក្រាម) MOLNATRIS (Molnupiravir Capsules 200mg) សម្រាប់ព្យាបាលជំងឺកូវីដ-១៩ នោះទេ ។ លុះរយៈពេលប៉ុន្មានថ្ងៃកន្លងមកនេះ មានករណីផ្ទុះជំងឺកូវីដ-១៩ ប្រភេទបំប្លែងថ្មី «អូមីក្រុង» ក្នុងមួយថ្ងៃរាប់រយនាក់ ទើបឪពុកម្តាយរបស់គាត់ឲ្យគាត់មកទិញថ្នាំនៅក្រសួងប្រៃសណីយ៍ និងទូរគមនាគមន៍ ។
យុវជនដែលធ្វើដំណើរពីខេត្តកំពង់ស្ពឺ រូបនេះបានបញ្ជាក់ថា ការដែលមកទិញឱសថព្យាបាលជំងឺកូវីដ-១៩ នេះមិនមែនស្រួលនោះទេ ទម្រាំបានថ្នាំ២ប្រអប់នេះ រូបគាត់ត្រូវឈរទម្រង់ជួរគ្នាតាំងពីម៉ោង១២ថ្ងៃត្រង់ដែលមានមនុស្សរាប់រយនាក់ឈរតម្រង់ជួរផងដែរ ។
ចំណែកស្ត្រីម្នាក់ដែលបាននិយាយក្នុងន័យមិនឲ្យបញ្ចេញឈ្មោះគាត់ គ្រាន់តែប្រាប់ថា រស់នៅក្នុងខណ្ឌដូនពេញ ដែលកំពុងឈរតម្រង់ជួរចាំទិញថ្នាំព្យាបាលកូវីដ-១៩ បានឆ្លៀតនិយាយឲ្យដឹងថា គាត់ដឹងថា មានលក់ឱសថព្យាបាលជំងឺកូវីដ១៩ នៅក្រសួងប្រៃសណីយ៍ និងទូរគមនាគមន៍ តាំងពីចុងខែធ្នូ ឆ្នាំ២០២១មកម្ល៉េះ តែក្រុមគ្រួសាររបស់គាត់មិនចាប់អារម្មណ៍ លុះផ្ទុះជំងឺកូវីដ ប្រភេទបំប្លែងថ្មី «អូមីក្រុង» ពីមួយថ្ងៃទៅមួយថ្ងៃ មានអ្នកឆ្លងរាប់រយនាក់ក្នុងមួយថ្ងៃៗ រហូតដល់ពេលនេះមានអ្នកស្លា.ប់ទៀត ទើបគាត់សម្រុកមកទិញឱសថម៉ូលណាទ្រីស (ម៉ូលនូពីរ៉ាវា កាប់ស៊ុល ២០០ មីលីក្រាម) MOLNATRIS (Molnupiravir Capsules 200mg) សម្រាប់ព្យាបាលជំងឺកូវីដ-១៩ «ដើម្បីទុកប្រចាំនៅក្នុងផ្ទះ ក្រែងមានគ្រួសារគាត់ណាម្នាក់ឆ្លងអូមីក្រុង» ។
អ្នកស្រីបន្តថា តែអ្វីដែលសំខាន់នោះ គឺគ្រូពេទ្យលក់ថ្នាំព្យាបាលកូវីដ-១៩ ក្នុងម្នាក់បានតែ២ប្រអប់ប៉ុណ្ណោះ តែវាគ្រាន់បើជាងទៅទិញនៅឳសថស្ថាន១ ដែលលក់តម្លៃ៦៥ដុល្លារ ក្នុងមួយប្រអប់ ហើយទិញនៅក្រសួងប្រៃសណីយ៍ និងទូរគមនាគមន៍តម្លៃតែ៥៥ដុល្លារក្នុងមួយប្រអប់ទេ។
ជាការសម្គាល់ គណៈកម្មការជាតិប្រយុទ្ធនឹងជំងឺកូវី-១៩ ក្រុមការងារចំពោះកិច្ចគ្រប់គ្រង បែងចែក និងផ្គត់ផ្គង់ ឱសថយុទ្ធសាស្ត្រសម្រាប់ប្រយុទ្ធនឹងជំងឺកូវីដ-១៩ បានចេញសេចក្តីជូនដំណឹង ការចែកចាយឱសថប៉ូលណាទីស (ម៉ូលនូពីរ៉ាវា កាប់ស៊ុល ២០០ មីលីក្រាម) MOLNATRIS (Molnupiravir Capsules 200mg)។
ហើយក្រុមការងារចំពោះកិច្ចគ្រប់គ្រង បែងចែក និងផ្គត់ផ្គង់ឱសថយុទ្ធសាស្ត្រសម្រាប់ប្រយុទ្ធនឹងជំងឺកូវីដ-១៩ បានប្រកាសកន្លងមកថា «ដើម្បីបន្តចូលរួមទប់ស្កាត់ការឆ្លងរាលដាលនៃជំងឺ កូវីដ-១៩ បានទាន់ពេលវេលា និងបង្កើតបានភាពសុំសហគមន៍រឹងមាំពិតប្រាកដមួយទប់ទល់នឹងជំងឺរាតត្បាតសកល កូវីដ-១៩ ក្រុមការងារបាននាំចូលឱសថម៉ូលណាទ្រីស» (ម៉ូលនូពីរ៉ាវា កាប់ស៊ុល ២០០មីលីក្រាម) MOLNATRIS (Molnupiravir Capsules 200mg) សម្រាប់ព្យាបាលជំងឺកូវីដ-១៩ ចាប់ពីកម្រិតស្រាលទៅមធ្យម ចំពោះមនុស្ស ពេញវ័យ ។
សូមបញ្ជាក់ថា ឱសថនេះ នឹងត្រូវចែកចាយក្នុងតម្លៃ ៥៥ ដុល្លារអាមេរិក ក្នុង១ដូស (១ដូស ស្មើនឹង ១កំប៉ុង មាន ៤០គ្រាប់) ចាប់ពីថ្ងៃព្រហស្បតិ៍ ទី២៣ ខែធ្នូ ឆ្នាំ២០២១ មកម៉្លេះ និងមានលក់ជូនមន្ទីរពេទ្យឯកជន គ្លីនិក ឱសថស្ថាន ឱសថស្ថានរង និងសាធារណជន តាមលក្ខខណ្ឌដូចខាងក្រោម ៖ បុគ្គលម្នាក់ មានសិទ្ធិបញ្ហាទិញពី៥ ដល់១០ដូសមន្ទីរពេទ្យឯកជន គ្លីនិក ឱសថស្ថាន និងឱសថស្ថានរង មានសិទ្ធិបញ្ហាទិញពី១០ ដល់២០០ដូស (ត្រូវមានលិខិតអនុញ្ញាតបើកអាជីវកម្ម) ។ ក្រសួងបានបញ្ជាក់ថា គ្រប់ឱសថស្ថានអាចលក់បន្តមិនឱ្យលើសពី តម្លៃ ៦៥ ដុល្លារ អាមេរិក ក្នុង១ដូសទេ ។
ចែករំលែកព័តមាននេះ