រាជធានីភ្នំពេញ ៖ រដ្ឋាភិបាលទើបបែងចែកថវិកាបន្ថែមចំនួន ១០ លានដុល្លារអាមេរិកតាមរយៈធនាគារអភិវឌ្ឍន៍ជនបទ និងកសិកម្មជួលដល់វិស័យស្រូវអង្ករ ។ អ្នករកស៊ីក្នុងវិស័យស្រូវអង្ករ រួមនឹងកសិករ អាចខ្ចីថវិកានេះក្នុងអត្រកាប្រាក់ទាបជាងទីផ្សារ…
រាជធានីភ្នំពេញ ៖ រដ្ឋាភិបាលទើបបែងចែកថវិកាបន្ថែមចំនួន ១០ លានដុល្លារអាមេរិកតាមរយៈធនាគារអភិវឌ្ឍន៍ជនបទ និងកសិកម្មជួលដល់វិស័យស្រូវអង្ករ ។ អ្នករកស៊ីក្នុងវិស័យស្រូវអង្ករ រួមនឹងកសិករ អាចខ្ចីថវិកានេះក្នុងអត្រកាប្រាក់ទាបជាងទីផ្សារ ដើម្បីជំរុញផលិតកម្ម ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានឱ្យដឹងថា បើពិនិត្យមើលទៅលើទំហំទឹកប្រាក់ ១០លានដុល្លារអាមេរិកនេះ ស្មើ ២០% ដែលរាជរដ្ឋាភិបាលបានរៀបចំទុកដាក់បានជួយជ្រោមជ្រែងទៅដល់វិស័យនេះ ។លោកថា តាមរយៈធនាគារអភិវឌ្ឍន៍ជនបទ និងកសិកម្ម អ្នករកទទួលទានក្នុងវិស័យស្រូវអង្ករនឹងទទួលបានឥណទានក្នុងលក្ខខណ្ឌធានាពិសេសសម្រាប់ធ្វើជាទុនបង្វិលក្នុងការទិញស្រូវ ។
«នេះជាទុនបន្ថែមទៅអ្វីដែលធ្លាប់មានកន្លងមកទំហំទឹកប្រាក់ប្រមាណ ៧៣ លានដុល្លារអាមេរិករបស់ធនាគារអភិវឌ្ឍន៍ជនបទ និងកសិកម្ម គឺបានប្រើប្រាស់ផ្ទាល់សម្រាប់ជាទុនបង្វិលនៅក្នុងវិស័យស្រូវអង្កររួចហើយ ថែម ១០លានដុល្លារអាមេរិកទៀត វាឡើងដល់ជាង ៨០ លានដុល្លារអាមេរិក បើមើលទៅលើតួលេខក្នុងរបាយការណ៍» នេះបើតាមការឱ្យដឹងរបស់លោក លន់ យ៉េង ។
ការផ្តល់ហិរញ្ញប្បទាន ១០ លានដុល្លារបន្ថែមនេះ ត្រូវគេមើលឃើញថា នឹងជួយឱ្យរោងម៉ាស៊ីនកិនស្រូវមានលទ្ធភាពច្រើនក្នុងការបង្វិលទុនសម្រាប់ទិញស្រូវនៅរដូវប្រមូលផល ។ ការប្រមូលរបស់កសិករ មានរយៈពេលខ្លីជាងមុនដោយសារពួកគាត់មានការយល់ដឹងក្នុងការដាំដុះ ។
តាមរបាយការណ៍ក្រសួងកសិកម្មរុក្ខាប្រមាញ់ និងនេសាទ កន្លងមកបង្ហាញថា បរិមាណអង្ករនាំចេញក្នុងឆ្នាំ ២០២១ មានចំនួន ៦១៧ ០៦៩ តោន មានការថយចុះចំនួន ៧៣. ៧៦០ តោន (-១០,៦៨% បើធៀបនឹងបរិមាណនាំចេញក្នុងឆ្នាំ ២០២០ ដែលមានចំនួន ៦៩០ ៨២៩ តោន ។
បរិមាណអង្ករបាននាំចេញទៅកាន់ទិសដៅសហភាពអឺរ៉ុបចំនួន ២២ ប្រទេស មានបរិមាណសរុបចំនួន ១៥៥ ៧៧៣តោន (ថយចុះចំនួន ៤៨ ០១៨ តោន ស្មើនឹង -២៣,៥៦%) ទិសដៅប្រទេសចិនមានបរិមាណសរុប ចំនួន ៣០៩ ៧០៩តោន (កើនឡើងចំនួន ២០ ២៧០ តោន ស្មើនឹង ៧%) ទិសដៅអាស៊ានចំនួន ៧ ប្រទេស មានបរិមាណសរុបចំនួន ៦៣ ១៦៥ តោន (ថយចុះចំនួន ២៣ ៧៣៤ តោន ស្មើនឹង -២៧,៣១%) និងទិសដៅដទៃទៀតចំនួន ២៤ ប្រទេស មានបរិមាណសរុប ៨៨ ៤២២ តោន (ថយចុះចំនួន ២២ ២៧៨ តោន ស្មើនឹង -២០,១២%) ។
ក្រុមហ៊ុនដែលបាននាំចេញអង្ករមានចំនួន ៦២ ក្រុមហ៊ុន ហើយបរិមាណអង្ករដែលបាននាំចេញដោយ ក្រុមហ៊ុនធំៗចំនួន ១០ មានរហូតដល់ ៤៥៦ ២២៣ តោន (៧៣,៩៤%) និងក្រុមហ៊ុន ៥២ ដទៃទៀតបាននាំចេញ ត្រឹមតែ ១៦០ ៨៤៦តោន (២៦០៦%) ។ ដោយឡែកបើតាមអគ្គនាយកដ្ឋានគយ និងរដ្ឋាករ ថា ឆ្នាំ ២០២១ ការនាំចេញអង្ករសម្រេច ៤២៤.៩ លានដុល្លារអាមេរិក ។ ស្រូវអង្ករ និយាយជារួមវិស័យកសិកម្ម ជាចន្ទល់សេដ្ឋកិច្ចដ៍សំខាន់នៅក្នុងពេលវិបត្តិកូវីដ ១៩ ៕
ចែករំលែកព័តមាននេះ