ទើបចេញពីក្លិបម្តុំកោះពេជ្រ ហើយដួលម៉ូតូភ្លាម លេចមុខជិត១០នាក់មកធ្វើសកម្មភាពភ្លែត
- ភ្នំពេញ
យុវជន២នាក់ជិះម៉ូតូត្រឡប់មកពីដើរលេងក្លិបនៅម្តុំកោះពេជ្រ លុះត្រឡប់មកផ្ទះវិញក៏ត្រូវជនសង្ស័យ
យុវជន២នាក់ជិះម៉ូតូត្រឡប់មកពីដើរលេងក្លិបនៅម្តុំកោះពេជ្រ លុះត្រឡប់មកផ្ទះវិញក៏ត្រូវជនសង្ស័យ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជន២នាក់ជិះម៉ូតូត្រឡប់មកពីដើរលេងក្លិបនៅម្តុំកោះពេជ្រ លុះត្រឡប់មកផ្ទះវិញក៏ត្រូវជនសង្ស័យកា.ប់យកស្លាកលេខម៉ូតូជនរងគ្រោះ ហើយរត់គេចខ្លួនបាត់ បង្កឲ្យមានការភ្ញាក់ផ្អើលកាលពីវេលាម៉ោង៣និង១០នាទីទៀបភ្លឺឈានចូលថ្ងៃទី២១ ខែកុម្ភៈ ឆ្នាំ២០២២ នៅតាមបណ្ដោយផ្លូវវេងស្រេង ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនរងគ្រោះខាងលើឈ្មោះ ផៃ សុផាត ភេទប្រុស អាយុ១៩ឆ្នាំ មុខរបរជួយលក់ឈើពូ មានស្រុកកំណើតនៅស្រុកភ្នំព្រឹក ខេត្តបាត់ដំបង ជិះម៉ូតូម៉ាកហុងដាឌ្រីម ស៊េរី២០២២ ពណ៌ខ្មៅ ពាក់ស្លាកលេខបាត់ដំបង 1AJ-6776 ដោយជិះគ្នាពីរនាក់ ក្នុងទិសដៅពីកើតទៅលិច ចេញមកពីក្លឹប EDM នៅម្ដុំកោះពេជ្រ ក្នុងគោលបំណងត្រឡប់ទៅផ្ទះវិញនៅឯផ្សារបុ័ងសង្កី ខេត្តតាកែវ។
តាមប្រភពព័ត៌មានពីជនរងគ្រោះបានឲ្យដឹងថា នៅមុនពេលកើតហេតុ ពួកគាត់បានត្រឡប់មកពីដើរលេងក្លិបនៅម្តុំកោះពេជ្រ ហើយដំបូងឡើយគ្នាគាត់មានច្រើននាក់ តែពួកគាត់បានសម្រាកនៅខណ្ឌមានជ័យខ្លះហើយ ចំណែកឯជនរងគ្រោះពីរនាក់ខាងលើ គាត់ជិះម៉ូតូមួយគ្រឿងក្នុងទិសដៅពីកើតទៅលិច ។
ជនរងគ្រោះបន្តថា លុះបើកមកដល់ចំណុចកើតហេតុ នៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ស្រាប់តែម៉ូតូរបស់គាត់បានដួល ហើយក៏ស្រាប់តែលេចមុខជនសង្ស័យមាន៥ម៉ូតូ គ្នាជិតដប់នាក់ ដោយយកដាវ និងកាំបិត មកដេញកា.ប់ពួកគាត់ ខណៈពេលដែលពួកគាត់ដួលម៉ូតូ ។ បន្ទាប់មកជនរងគ្រោះក៏រត់ចេញពីម៉ូតូ ចំណែកជនដៃដល់ក៏បានយកដាវ និងកាំបិតកា.ប់យកស្លាកលេខម៉ូតូរបស់ជនរងគ្រោះយកទៅបាត់ និងយកដុំថ្មវា.យម៉ូតូជនរងគ្រោះ បណ្តាលឲ្យខ្ទេចតែម្តង ហើយជនបង្កខាងលើក៏នាំគ្នាជិះម៉ូតូរត់គេចខ្លួនបាត់ស្រមោល ។
តាមប្រភពព័ត៌មានពីបងប្អូនប្រជាពលរដ្ឋនៅកន្លែងកើតហេតុ បានបញ្ជាក់ទៀតថា មុនពេលកើតហេតុ ករណីជនសង្ស័យកា.ប់យកស្លាកលេខម៉ូតូជនរងគ្រោះនោះ ក៏មានករណីមួយទៀត គឺកា.ប់ប្លន់យកម៉ូតូម៉ាកនិច ពណ៌ស មិនចាំស្លាកលេខ នៅម្តុំវត្តគោកបញ្ជាន់ តាមបណ្ដោយផ្លូវវេងស្រេងដែរ ដែលស្ថិតនៅក្នុងសង្កាត់ចោមចៅទី២ ខណ្ឌពោធិ៍សែនជ័យ ហើយជនរងគ្រោះរងរបួសធ្ងន់ ត្រូវបានរថយន្តសង្គ្រោះគ្លីនិចឯកជនសម្ភពរស្មី ដឹកយកទៅសង្គ្រោះភ្លាមៗផងដែរ ដោយសន្លប់ស្តូកស្តឹងភ្លាមៗមិនទាន់ដឹងខ្លួននៅឡើយទេ ។
ក្រោយពេលកើតហេតុ ជនរងគ្រោះដែលត្រូវជនសង្ស័យកា.ប់យកស្លាកលេខម៉ូតូ បាននាំគ្នាដឹកម៉ូតូទៅដាក់ពាក្យបណ្ដឹងនៅប៉ុស្តិ៍នគរបាលសង្កាត់ចោមចៅទី២ភ្លាមៗ រីឯជនរងគ្រោះដែលត្រូវជនសង្ស័យកា.ប់ប្លន់យកម៉ូតូយកទៅបាត់នោះ មិនទាន់ដាក់ពាក្យបណ្ដឹងនៅឡើយ ទេ ខណៈកំពុងសង្គ្រោះបន្ទាន់ ៕
ចែករំលែកព័តមាននេះ