អត្ថបទសុខភាពថ្មីមួយដែលបានចេញផ្សាយក្នុងព្រឹត្តិបត្រ Daily Express របស់អង់គ្លេសនិយាយថា ថ្នាំគ្រាប់តូចល្អិតដែលជួយសម្រួលដល់បុគ្គលពិបាកក្នុងការដេកលក់ឈ្មោះ Ambien(ឈ្មោះសមាសធាតុគីមីផ្សំដើមជា Zolpidem)
អត្ថបទសុខភាពថ្មីមួយដែលបានចេញផ្សាយក្នុងព្រឹត្តិបត្រ Daily Express របស់អង់គ្លេសនិយាយថា ថ្នាំគ្រាប់តូចល្អិតដែលជួយសម្រួលដល់បុគ្គលពិបាកក្នុងការដេកលក់ឈ្មោះ Ambien(ឈ្មោះសមាសធាតុគីមីផ្សំដើមជា Zolpidem) មានផលប៉ះពាល់ដល់សុខភាពរបស់អ្នកប្រើប្រាស់ជាប្រចាំនៅពេលណាមួយ ។
នៅក្នុងបទបង្ហាញនាកិច្ចប្រជុំប្រចាំឆ្នាំ រៀបចំដោយសមាគមជំងឺបេះដូងអាមេរិកនៅទីក្រុងដាឡាស កាលពីពេលថ្មីៗកន្លងមកនេះ ក្រុមអ្នកស្រាវជ្រាវមកពីសាកលវិទ្យាល័យសុខាភិបាលនៅតៃវ៉ាន់បាននិយាយថា ថ្នាំងងុយដេកដ៏មានប្រជាប្រិយភាព Ambien អាចបង្កើនហានិភ័យកើតជំងឺគាំងបេះដូងដល់៥០ភាគរយ ប្រសិនជាគេប្រើប្រាស់អស់៦០គ្រាប់ក្នុងមួយឆ្នាំ ។ ក្រុមអ្នកស្រាវជ្រាវបាននិយាយនៅក្នុងរបាយការណ៍របស់ខ្លួនថា ៖ «ហានិភ័យនៃការងាប់ជាលិកាសាច់ដុំបេះដូងបានកើនឡើងយ៉ាងស្រួចស្រាល់នៅពេលប៉ះជាមួយ Zolpidem » ។
ចំណែកឯការសិក្សាមួយផ្សេងទៀតដែលគេយកមកធ្វើបទបង្ហាញក្នុងពេលជាមួយគ្នានោះដែរ បានអះអាងថា ការប្រើប្រាស់ថ្នាំ Ambien អាចបង្កើនហានិភ័យ Aortic Dissection (ជាលក្ខខណ្ឌវេជ្ជសាស្ត្រដ៏គ្រោះថ្នាក់មួយដែលសរសៃឈាមក្រហមសំខាន់នាំឈាមពីបេះដូងទៅរាងកាយរហែក ហើយបណ្តាលឱ្យចេញឈាមក្នុងរាងកាយ)។
ដោយឡែក ការសិក្សាមួយចំនួនទៀតក៏បានភ្ជាប់ថ្នាំ Ambien ទៅនឹងបញ្ហាសុខភាពជាច្រើន។ ការសិក្សាមួយកាលឆ្នាំ២០១២បានរកឃើញថា អត្រាស្លាប់ដោយសារជំងឺមហារីកបានកើនឡើងខ្ពស់ក្នុងចំណោមអ្នកដែលប្រើប្រាស់ថ្នាំងងុយដេក ៕
ចែករំលែកព័តមាននេះ