ខេត្តកំពង់ធំ ៖ បុរសម្នាក់ត្រូវបានសមត្ថកិច្ចចាប់ខ្លួនខណៈដើរលបៗបម្រុងចូលផ្ទះវិញ បន្ទាប់ពីជនសង្ស័យរូបនេះបានប្រើដំបងវាយនារីម្នាក់ប៉ុនប៉ងចាប់រំលោភ ។ ហេតុការណ៍ចាប់ខ្លួននេះធ្វើឡើងកាលពីព្រលប់ថ្ងៃទី២៧ ខែកក្កដាឆ្នាំ២០១៦ នៅផ្ទះជនសង្ស័យ ស្ថិតក្នុងភូមិវាលល្ពាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។
លោកវរសេនីយ៍ត្រី ផល សឿន អធិការនគរបាលស្រុកប្រាសាទបល្ល័ង្ក បានឲ្យដឹងថា ជនសង្ស័យដែលត្រូវបានឃាត់ខ្លួនឈ្មោះ បូយ ថន ភេទប្រុស អាយុ៣៦ឆ្នាំ រស់នៅក្នុងភូមិ-ឃុំកើតហេតុ ។ ចំណែកនារីរងគ្រោះឈ្មោះ ហ៊ុយ ហាវ អាយុ២០ឆ្នាំ រស់នៅផ្ទះជិតគ្នា រងរបួសរយះក្បាល២កន្លែង ។
នៅចំពោះមុខសមត្ថកិច្ច ជនសង្ស័យបានសារភាពថា រូបគេជាបុរសពោះម៉ាយយូរហើយដោយត្រូវបានប្រពន្ធលែងចោល រស់នៅជាមួយម្តាយចាស់ ពេលកើតគំនិតចង់រួមភេទ ក៏មានបំណងចាប់រំលោភនារីរងគ្រោះដែលនៅផ្ទះជិតគ្នា ។ ខណៈឃើញនាងដើរតែម្នាក់ឯងដល់កន្លែងស្ងាត់ ក៏បានយកដំបងវ៉ៃនាងបំណងឲ្យសន្លប់សិនរួចនឹងអាលចាប់រំលោភ តែនៅពេលវាយចំក្បាលនារីរងគ្រោះ នាងមិនបានសន្លប់ទេ ព្រោះនាងដឹងខ្លួនទាន់ ហើយរត់បណ្ដើរស្រែកឲ្យជួយបណ្ដើរ ពេលនោះអ្នកឃ្វាលគោចេញមកជួយ រូបគេក៏បានរត់គេចខ្លួនចូលព្រៃបាត់ លុះពេលងងឹតៗបានដើរលបៗមកចូលផ្ទះ ក៏ត្រូវសមត្ថកិច្ចចាប់ខ្លួនតែម្តង ៕
ចែករំលែកព័តមាននេះ