ភ្នំពេញ៖ ស្ត្រីម្នាក់ ស្រវឹងស្រាស្រឿងៗ បែកគំនិត មកឈរយំ លើស្ពានជ្រោយចង្វារ ដោយអ្នកឃើញហេតុការណ៍ សង្ស័យថា នាងបម្រុងលោតទឹកបញ្ចប់ជីវិត ក៏ឃាត់ទាន់។ តែស្ត្រីក្រមុំចាស់នោះ ប្រាប់ថា នាងឈរលេង យកខ្យល់អាកាសប៉ុណ្ណោះ។ ហេតុការណ៍នេះ បានកើតឡើង កាលពីម៉ោង ៨ និង ៣០នាទីយប់ ថ្ងៃទី១៦ ខែកុម្ភៈ ឆ្នាំ២០២២។
ស្ត្រីប៉ុនប៉ងលោតទឹក មិនបានសម្រេចនោះ បានប្រាប់ទាំងភាពលាក់លៀមថា រូបនាង មានអាយុ ៤៥ឆ្នាំហើយ ជាក្រមុំចាស់ បច្ចុប្បន្នស្នាក់នៅ ម្តុំជិតពេទ្យលោកសង្ឃ។
ស្ត្រីដដែលបន្តថា រូបនាង មិនមានវិបត្តិអ្វីនោះទេ។ មុនកើតហេតុ នាងបានផឹកស្រាជុំគ្នាជាមួយអ្នកស្គាល់គ្នា អស់តិចតួច។ លុះស្រវឹងស្រឿងៗ នាងស្រាប់តែមានអារម្មណ៍ធុញថប់ ក៏ហៅម៉ូតូកង់បី ជិះពីផ្ទះ មកឈប់លើស្ពានជ្រោយចង្វារ គោលបំណងឈរលេងស្រូបយកខ្យល់អាកាស អោយស្រឡះ ខួរក្បាលតែប៉ុណ្ណោះ។
ប៉ុន្តែប្រជាពលរដ្ឋ នៅកន្លែងកើតហេតុ បានប្រាប់ថា មុនកើតហេតុ ពួកគាត់បានឃើញស្ត្រីខាងលើ ឈរតោងបង្កាន់ដៃស្ពាន យំតែម្នាក់ឯង ទឹកមុខសោកសៅ។ មើលសភាពនារីនោះ គឺមានបំណងប៉ុនប៉ង ធ្វើអត្ត.ឃា.ត។ ឃើញដូច្នោះ ពួកគាត់ ក៏បាននាំគ្នាចូលទៅជួយឃាត់ និងសួររកមូលហេតុ។ តែស្ត្រីខាងលើ មិននិយាយស្ដីអ្វីទាំងអស់ គិតតែក្តោបមុខ អង្គុយយំ។ ពួកគាត់ក៏សម្រេចឃាត់នារីខាងលើ អោយសមត្ថកិច្ចប៉ុស្តិ៍នគរបាលសង្កាត់ជ្រោយចង្វារ ជួយអន្តរាគមន៍បន្ត។
ក្រោយកើតហេតុ ស្ត្រីខាងលើ ត្រូវបានសមត្ថកិច្ច និយាយលួងលោម និងទាក់ទងរកសាច់ញាតិ អោយមកទទួល យកនាងត្រឡប់ទៅផ្ទះវិញ ដោយសុវត្ថិភាព៕
ចែករំលែកព័តមាននេះ