ខេត្តស្ទឹងត្រែង៖ អគ្គនាយកដ្ឋានពន្ទនាគារ បានសម្រេចផ្លាស់ប្តូរប្រធានពន្ធនាគារ អនុប្រធាន និងប្រធានផ្នែកសរុបចំនួន៥រូប អោយទៅបម្រើការងារនៅអគ្គនាយកដ្ឋានពន្ធនាគារ និងជំនួសដោយប្រធាន និងអនុប្រធានពន្ធនាគារថ្មីចំនួន២រូប កាលពីព្រឹកថ្ងៃទី១៧ ខែកុម្ភៈ…
ខេត្តស្ទឹងត្រែង៖ អគ្គនាយកដ្ឋានពន្ទនាគារ បានសម្រេចផ្លាស់ប្តូរប្រធានពន្ធនាគារ អនុប្រធាន និងប្រធានផ្នែកសរុបចំនួន៥រូប អោយទៅបម្រើការងារនៅអគ្គនាយកដ្ឋានពន្ធនាគារ និងជំនួសដោយប្រធាន និងអនុប្រធានពន្ធនាគារថ្មីចំនួន២រូប កាលពីព្រឹកថ្ងៃទី១៧ ខែកុម្ភៈ ឆ្នាំ២០២២ នេះ។
តាមសេចក្តីប្រកាសរបស់ក្រសួងមហាផ្ទៃ លេខ៤៨៨.ប្រ.ក ចុះថ្ងៃទី០៨ ខែកុម្ភៈ ឆ្នាំ២០២២ ស្តីពីការប្រគល់ភារកិច្ច និងតែងតាំងមន្រ្តីពន្ធនាគារ បានសម្រេចតែងតាំងលោកឧត្តមអគ្គានុរក្សថ្នាក់លេខ៣ ប្រាជ្ញ សុភី អត្តលេខ ០៣៨៥ ឱ្យកាន់មុខតំណែងជាប្រធានពន្ធនាគារខេត្តស្ទឹងត្រែង និងលោកវរអគ្គានុរក្សថ្នាក់លេខ១ រិទ្ធិ ឌីណា ជាអនុប្រធានពន្ធនាគារ ។
ដោយឡែក លោកឧត្តមអគ្គានុរក្សថ្នាក់លេខ២ ឈុន ដារ៉ា អត្តលេខ ០៣៣៣ អតីតប្រធានពន្ធនាគារខេត្តស្ទឹងត្រែង និងមន្ត្រីពន្ធនាគារចំនួន៤រូបផ្សេងទៀតត្រូវផ្ទេរភារកិច្ចទៅឱ្យទៅបម្រើការងារនៅអគ្គនាយកដ្ឋានពន្ធនាគារ។ ក្នុងគ្រាដែលប្រកាសផ្ទេរនិងចូលកាន់មុខតំណែងប្រធានអនុប្រធានពន្ធនាគារថ្មីនោះលោក ស្វាយ សំអ៊ាង អភិបាលខេត្តស្ទឹងត្រែង បានបង្ហាញពីការសោកស្តាយចំពោះករណីអ្នកទោសកំពុងជាប់ឃុំបានធ្វើសកម្មភាពលួចទម្លាយជញ្ជាំងរបស់ពន្ធនាគារខេត្តរត់គេចខ្លួនបានមួយរយៈពេលខ្លីកន្លងទៅថ្មីនេះ ប៉ុន្តែត្រូវស្រាវ
ជ្រាវរកឃើញនិងចាប់បានមកវិញ ក្រោមបទបញ្ជាយ៉ាងម៉ឺងម៉ាត់របស់សម្តេចក្រឡាហោម ស ខេង ឧនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ករណីនេះត្រូវចាត់ទុកជាមេរៀននិងបទពិសោធន៍ដែលប្រធាន អនុប្រធានពន្ធនាគារថ្មីទើបចូលកាន់មុខតំណែងត្រូវ ពង្រឹងការគ្រប់គ្រងពន្ធនាគារឲ្យបានម៉ឺងម៉ាត់ ហ្មត់ចត់ ច្បាស់លាស់ និងមានប្រសិទ្ធភាពខ្ពស់ ដើម្បីធានាបានពីករណីឆកល្វែង ឬអសកម្មផ្សេងៗកើតមានឡើងជាថ្មី៕
ចែករំលែកព័តមាននេះ