ខេត្តតាកែវ ៖ ការធ្វើដំណើរតាមរថយន្តឈ្នួលជារៀងរាល់ថ្ងៃពីផ្ទះមករោងចក្រកាត់ដេរ ពីរោងចក្រទៅផ្ទះ របស់កម្មករកម្មការិនីរោងចក្រកាត់ដេរត្រូវគេមើលឃើញពីហានិភ័យ ដែលអាចនឹងឆ្លងកូវីដ ១៩ និងប្រឈមគ្រោះថ្នាក់ចរាចរណ៍ ដោយសាររថយន្តមួយៗបានផ្ទុកចំនួនអ្នកជិះច្រើន ចង្អៀតណែន…
ខេត្តតាកែវ ៖ ការធ្វើដំណើរតាមរថយន្តឈ្នួលជារៀងរាល់ថ្ងៃពីផ្ទះមករោងចក្រកាត់ដេរ ពីរោងចក្រទៅផ្ទះ របស់កម្មករកម្មការិនីរោងចក្រកាត់ដេរត្រូវគេមើលឃើញពីហានិភ័យ ដែលអាចនឹងឆ្លងកូវីដ ១៩ និងប្រឈមគ្រោះថ្នាក់ចរាចរណ៍ ដោយសាររថយន្តមួយៗបានផ្ទុកចំនួនអ្នកជិះច្រើន ចង្អៀតណែន ។ តាមពិតទៅបញ្ហាដែលមានជាយូរមកហើយនេះ កម្មករខ្លួនឯងផ្ទាល់ពួកគាត់បារម្ភជាងអ្នកមើលពីខាងក្រៅទៅទៀត ។
ក្នុងចំណោមកម្មករកម្មការិនី ជាច្រើនរយនាក់ដែលបម្រើការងារនៅក្នុងរោងចក្រមួយកន្លែងក្នុងខេត្តតាកែវ ដែលបានសម្រាកពីការងារនៅម៉ោងជាង ១១ ព្រឹក ដើម្បីទទួលទានអាហារថ្ងៃត្រង់ ដែលបានសម្ភាសពួកគាត់បានបង្ហាញការព្រួយបារម្ភជាខ្លាំងពីបញ្ហានេះ ។
អ្នកស្រី ផុនស្រី អាយុ ២៧ ឆ្នាំ បាននិយាយថា រយៈពេល ៧ ឆ្នាំហើយ ដែលអ្នកស្រីបានជិះរថយន្តឈ្នួលដាក់ខែមកធ្វើការ ។ នៅរៀងរាល់ថ្ងៃនេះ អ្នកស្រីមានការបារម្ភជាខ្លាំងពីសុវត្ថិភាពពេលធ្វើដំណើរ ។ ភ័យខ្លាចជួបគ្រោះថ្នាក់ក្នុងពេលធ្វើដំណើរពីព្រោះនៅលើដងផ្លូវមានករណីគ្រោះថ្នាក់ចរាចរណ៍សឹងរាល់ថ្ងៃ ដែលអ្នកស្រីបានឃើញនឹងភ្នែក ។
កម្មការិនីរូបនេះបញ្ជាក់ទៀតថា នៅក្នុងបរិបទផ្ទុះជំងឺកូវីដ ១៩ នេះ អ្នកស្រីកាន់តែបារម្ភពីការឆ្លងជំងឺនេះត្បិតអីពេលធ្វើដំណើរម្តងៗមានគ្នាច្រើន សឹងអង្គុយមិនត្រង់ខ្នងផង ។ «យើងគ្មានដំណោះស្រាយអ្វីក្រៅពីពាក់ម៉ាស និងបាញ់អាកុលការពារនោះទេ ។ ម្ចាស់រថយន្តគេមិនអាចដាក់មនុស្សតិចបានឡើយ ពីព្រោះជាចំណូលរបស់គេ» ។
ការជិះរថយន្តឈ្នួលមកធ្វើការនៅតំបន់ខេត្តតាកែវនេះ កម្មករនិយាយថា ជាទូទៅពួកគាត់ត្រូវចំណាយប្រាក់ពី ៥ទៅ ១០ ម៉ឺនរៀលក្នុងមួយខែ លើមធ្យោបាយធ្វើដំណើរនេះ តាមផ្ទះជិត ឬឆ្ងាយ ។ អ្នកស្រី ផុនស្រី ថាគាត់ចំណាយ ៦ម៉ឺនរៀលក្នុងមួយខែ ។
និយាយដល់តម្លៃឈ្នួលរថយន្តនេះ កម្មការិនីខាងលើបានត្អូញថា ម្ចាស់រថយន្តទើបដំឡើងថ្លៃឈ្នូល ៥ ពាន់រៀលទៀត នៅឆ្នាំ ២០២២ នេះ នៅពេលកម្មករទទួលបានការដំឡើងប្រាក់ខែគោល ២ ដុល្លារដែរនោះ ។
អ្នកស្រី រឿន សោភា អាយុ ៤១ ឆ្នាំ និយាយថា ការធ្វើដំណើរពីផ្ទះមកធ្វើការពីកន្លែងធ្វើការទៅផ្ទះសម្រាប់អ្នកស្រី យ៉ាប់ជាងពេលធ្វើការទៅទៀត ត្បិតអីត្រូវប្រជ្រៀតគ្នាអង្គុយ និងឈរមិនស្រួលឡើយ ។ «បរិយាសកាសធ្វើដំណើរក្តៅហប់ណាស់ ។ ដូចខ្ញុំជាអ្នកពុលឡានទៀត ពេលធ្វើដំណើរម្តងៗសឹងដាច់ខ្យលពិសេសនៅពេលនេះការពារកូវីដ ១៩ ត្រូវពាក់ម៉ាសទៀតកាន់តែហប់» ។ អ្នកស្រី សោភា ថារាល់ថ្ងៃនេះគាត់បានរម្ភពីការឆ្លងជំងឺកូវីដ ១៩ ណាស់ ប៉ុន្តែមិនដឹងធ្វើយ៉ាងណា ។
អ្នសក្រី សោភា បានត្អូញត្អែរបន្ថែមថា នៅពេលនេះពួកយើងធ្វើការពេញម៉ោង និងថែមម៉ោងគ្មានប្រាក់លើកទឹកចិត្ត ៥% ទេ ។ បើកលុយមួយខែៗបានជាង ២០០ ដុល្លារ បើទូទាត់ទៅនិងការចំណាយប្រចាំថ្ងៃនៅក្នុងគ្រួសារ និងបង់ប្រាក់ថ្លៃឈ្នួលរថយន្ត ហូបចុកខ្លួនឯងប្រចាំថ្ងៃ សរុបទៅសឹងមិនគ្រប់ ។ ធ្វើការបានត្រឹមធ្វើការ គ្មានសល់ទេ ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានស្នើយ៉ាងទទូចដល់ក្រសួងការងារ ក៏ដូចជារដ្ឋាភិបាលជួយពន្លឿនអំពីសុវត្ថិភាពការធ្វើដំណើររបស់កម្មករកាត់ដេរ ។ សុវត្ថិភាពទាំងការពារគ្រោះថ្នាក់ចរាចរណ៍ និងការទប់ស្កាត់ជំងឺកូវីដ ១៩ ដោយមិនគួរអនុញ្ញាតឱ្យរថយន្តឈ្នួលបន្តដឹកកម្មករច្រើនហូសហេតុ គ្មានកន្លែងអង្គុយត្រឹមត្រូវទៀតនោះឡើយ ។
លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅក្នុងកិច្ចប្រជុំបូកសរុបលទ្ធផលការងារបេឡាជាតិរបបសន្តិសុខសង្គម កាលពីពេលថ្មីៗនេះ បានបញ្ជាក់ថា ក្រសួងរបស់លោកបាននិងកំពុងបន្តសហការជាមួយក្រសួងពាក់ព័ន្ធ ដោះស្រាយបញ្ហាសុវត្ថិភាពក្នុងការដឹកជញ្ជូន និងការធ្វើដំណើររបស់កម្មករនិយោជិត ការរៀបចំកែសម្រួលមធ្យោបាយដឹកជញ្ជូន និងពង្រឹងការអនុវត្តច្បាប់ចរាចរណ៍ផ្លូវគោក ៕
ចែករំលែកព័តមាននេះ