ឃាត់ខ្លួនគូស្នេហ៍ឌីជេ ដកហូតបានកាំភ្លើង២ដើម និងវត្ថុតាងមួយចំនួន
រាជធានីភ្នំពេញ ៖ គូស្នេហ៍ឌីជេ១គូត្រូវបានកម្លាំងកងរាជអាវុធហត្ថរាជធានីភ្នំពេញសហការជាមួយកម្លាំងកងរាជអាវុធហត្ថខណ្ឌទួលគោក ឃាត់ខ្លួនក្នុងប្រតិបត្តិការបង្ក្រាប
រាជធានីភ្នំពេញ ៖ គូស្នេហ៍ឌីជេ១គូត្រូវបានកម្លាំងកងរាជអាវុធហត្ថរាជធានីភ្នំពេញសហការជាមួយកម្លាំងកងរាជអាវុធហត្ថខណ្ឌទួលគោក ឃាត់ខ្លួនក្នុងប្រតិបត្តិការបង្ក្រាបគ្រឿងញៀន ដោយដកហូតបានកាំភ្លើងខ្លី២ដើម រថយន្តឡិចស៊ីស១គ្រឿង និងគ្រឿងញៀនមួយចំនួនធំ ។
ការបង្ក្រាបគ្រឿងញៀននេះធ្វើឡើងនៅវេលាម៉ោង៤ និង៣០នាទី ថ្ងៃទី២៦ ខែកក្កដា ឆ្នាំ២០១៦ នៅជាន់ទី១ ក្នុងខុនដូរ លេខ៣៧ហ្សេត ផ្លូវ២៦១ហ្សេត ស្ថិតក្នុងភូមិ៣ សង្កាត់បឹងសាឡាង ខណ្ឌទួលគោក ។ ប្រតិបត្តិការនេះដឹកនាំដោយលោកវរសេនីយ៍ ប៉ាន់ សុភាព នាយការិយាល័យប្រឆាំងបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ព្រមទាំងមានការសម្របសម្រួលពីលោក សៀង សុខ ព្រះរាជអាជ្ញារងអយ្យការអមសាលាដំបូងរាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ ចាន់ វិចិត្រ ភេទប្រុស អាយុ៣២ឆ្នាំ ជនជាតិខ្មែរ ជាឌីជេ (DJ) នៅក្លឹប លីកាស៊ី ស្នាក់នៅខុនដូខាងលើ និងមានស្រុកកំណើតភូមិកន្តៀង ឃុំកន្តៀង ស្រុកកន្តៀង ខេត្តពោធិ៍សាត់ ។ ចំណែកនារីដែលគេអះអាងថាជាគូស្នេហ៍ជនសង្ស័យឈ្មោះ សំ សូនីតា ជនជាតិខ្មែរ អាយុ១៦ឆ្នាំ ជាសិស្សថ្នាក់ទី១០ នៃអនុវិទ្យាល័យសន្ធរម៉ុក ស្នាក់នៅក្នុងបូរីលឹមឈៀងហ៊ាក់ ក្នុងសង្កាត់ដង្កោ ខណ្ឌដង្កោ ។
តាមមន្ត្រីកងរាជអាវុធហត្ថបានឲ្យដឹងថា មុនឈានដល់ការចុះឆែកឆេរខុនដូរបង្ក្រាបគ្រឿងញៀន កម្លាំងកងរាជអាវុធហត្ថខណ្ឌមានជ័យបានធ្វើការឃាត់ខ្លួនបក្ខពួកម្នាក់កាលពីយប់ថ្ងៃទី២៥ ខែកក្កដា ឆ្នាំ២០១៦ ។ យោងតាមចម្លើយសារភាពសមត្ថកិច្ចឈានទៅឆែកឆេរខុនដូរ ឃាត់ខ្លួនជនសង្ស័យបាន២នាក់តែម្តង ។
តាមមន្ត្រីកងរាជអាវុធហត្ថ បានឲ្យដឹងទៀតថា ក្នុងការបង្ក្រាបគ្រឿងញៀននេះសមត្ថកិច្ចដកហូតបានវត្ថុតាងរួមមានគ្រឿងញៀនជាច្រើនប្រភេទ និងកាំភ្លើងខ្លី២ដើម ព្រមទាំងសម្ភារប្រើប្រាស់មួយចំនួនទៀត និងរថយន្ត Lexus GS300 ពណ៌ស ស្លាកលេខភ្នំពេញ 2AC-5515 មួយគ្រឿង ។
ក្រោយពេលចាប់ខ្លួន ជនសង្ស័យទាំង២នាក់ រួមទាំងវត្ថុតាង ត្រូវបានបញ្ជូនទៅកាន់ទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរ និងចាត់ការតាមច្បាប់ ៕
ចែករំលែកព័តមាននេះ