ស្របពេលដែលក្រសួងអប់រំ យុវជននិងកីឡា ក្រសួងវប្បធម៌ និងវិចិត្រសិល្បៈ បានចេញសេចក្តីអំពាវនាវ «ទិវានៃសេចក្តីស្រឡាញ់» ជាពិសេសបានក្រើនរំលឹក និងដាស់តឿនរបស់
រាជធានីភ្នំពេញ ៖ ស្របពេលដែលក្រសួងអប់រំ យុវជននិងកីឡា ក្រសួងវប្បធម៌ និងវិចិត្រសិល្បៈ បានចេញសេចក្តីអំពាវនាវ «ទិវានៃសេចក្តីស្រឡាញ់» ជាពិសេសបានក្រើនរំលឹក និងដាស់តឿនរបស់រដ្ឋបាលរាជធានីភ្នំពេញ ដល់យុវជនទាំងអស់កុំឲ្យប្រព្រឹត្តទង្វើប្រាស់ចាកពីប្រពៃណី និងទំនៀមទម្លាប់ដ៏ផូរផង់របស់ជាតិ នៅក្នុងថ្ងៃ «ទិវានៃក្តីស្រឡាញ់» ១៤កុម្ភៈនេះ ។
គេសង្កេតឃើញថា ទីតាំងលក់ផ្កាជុំវិញសាលារៀនរដ្ឋ ក៏ដូចជាឯកជន មិនមានដាក់លក់ផ្កាយ៉ាងគគ្រឹកគគ្រេងដូចបណ្តាឆ្នាំមុនៗនោះទេ ហើយក្រុមយុវជន និងនារីៗក៏មិនមានការចោមរោមទិញផ្កានោះដែរ រីឯសាលារៀនដំណើរការបង្រៀនជាធម្មតា នេះនិយាយតែសាលារៀនរដ្ឋ និងឯកជនទាំង១៥ នៅក្នុងខណ្ឌដូនពេញ រាជធានីភ្នំពេញតែប៉ុណ្ណោះ ។
ដោយឡែកទីតាំងលក់ផ្កាស្រស់នៅខាងកើតផ្សារធំថ្មី គេបានឃើញមានបុរសស្ត្រីក្នុងវ័យជាង៣០ឆ្នាំបានចូលទិញផ្កាស្រស់ម្នាក់មួយបាច់ៗ ខ្លះពីរបាច់ទាំងទឹកមុខញញឹម រួចដើរចេញទៅឡើងជិះរថយន្តទៅបាត់ទៅ។
ហើយបើតាមលោកគ្រូម្នាក់នៅវិទ្យាល័យព្រះស៊ីសុវត្ថិ ក្នុងខណ្ឌដូនពេញ និយាយក្នុងន័យសុំមិនបង្ហាញឈ្មោះបានឲ្យដឹងថា ទិវានៃក្តីស្រលាញ់ ថ្ងៃ១៤កុម្ភៈ ឆ្នាំ២០២២នេះ នៅតែទទួលបានការចាប់អារម្មណ៍ពីសំណាក់យុវវ័យនៅក្នុងប្រទេសកម្ពុជា ហើយទិវានៃក្ដីស្រលាញ់នេះ ត្រូវបានយុវវ័យកម្ពុជា បង្ហាញពីការយល់ឃើញខុសៗគ្នា ។ ខណៈអ្នកខ្លះចាត់ទុកថ្ងៃ១៤កុម្ភៈ គ្រាន់តែថ្ងៃធម្មតា មិនសំខាន់ឡើយ ព្រោះមិនមែនជាបុណ្យប្រពៃណីជាតិខ្មែរទេ ប៉ុន្តែអ្នកខ្លះទៀតចាត់ទុកថា ១៤កុម្ភៈ គឺជាថ្ងៃសំខាន់សម្រាប់ពួកគេផងដែរ ។
ប្រភពដដែលបន្តថា ក៏ប៉ុន្តែទិវានៃក្តីស្រឡាញ់ឆ្នាំនេះ ឃើញថាយុវសិស្សទាំងប្រុស ទាំងស្រីមិននាំគ្នាឈប់ការពីសិក្សានោះទេ ហើយការលក់ផ្កានៅជុំវិញសាលា គឺគ្មានតែម្តង ម្យ៉ាងវិញទៀតក្រសួងអប់រំ យុវជន និងកីឡា បានចេញសេចក្តីណែនាំដល់គ្រឹះស្ថានសិក្សាមាន៤ចំណុច ដែលត្រូវធ្វើការផ្សព្វផ្សាយដល់ប្អូនសិស្សានុសិស្ស ។
បើតាមស្ត្រីលក់ផ្កា នៅខាងកើតផ្សារធំថ្មី ក៏និយាយក្នុងន័យមិនបង្ហាញអត្តសញ្ញាណ និងថតរូប បាននិយាយឲ្យដឹងថា កាលពីថ្ងៃអាទិត្យ មុនថ្ងៃទិវានៃសេចក្តីស្រឡាញ់មួយថ្ងៃ គាត់សង្កេតឃើញមានយុវជន យុវនារី តិចតួចណាស់ ដែលមកទិញផ្កាស្រស់ ។ ហើយភាគច្រើនគឺបុរស ស្ត្រីក្នុងវ័យជាង៣០ឆ្នាំមកទិញម្នាក់ៗយ៉ាងតិចពីរបាច់ តែយើងមិនដឹងថា គាត់យកទៅឲ្យនរណានោះទេ? ព្រោះមិនមែនរឿងគាត់ គាត់គិតតែពីលក់ផ្កាតែប៉ុណ្ណោះ ។
ប្រភពដដែលបន្តថា ហើយឆ្នាំនេះឃើញថា កន្លែងគាត់មានភ្ញៀវចាស់ៗចូលមកទិញច្រើន រីឯយុវជន យុវនារីមានចំនួនតិចណាស់ តែទោះជាយ៉ាងណា វាគ្រាន់បើជាងសម័យកូវីដដែរ។ ហើយអ្នកស្រីសង្ឃឹមថា អាចលក់ដាច់នៅល្ងាចថ្ងៃបង្ហើយទិវានៃក្តីស្រឡាញ់នេះ ប៉ុន្តែឆ្នាំទៅមិញ គឺចប់តែម្តង នៅផ្ការាប់រយដើមឯណោះ ។
ចំណែកអ្នកស្រី កូឡាប ស្ថិតក្នុងវ័យជាង៣០ឆ្នាំ ដែលកំពុងរៀបចំផ្កាតាំងលក់នៅជាប់របងវត្តលង្ការ តាមបណ្តោយវិថីព្រះសីហនុ ស្ថិតក្នុងសង្កាត់បឹងកេងកងទី១ ខណ្ឌចំការមន បានឲ្យដឹងដែរថា ជារៀងរាល់ឆ្នាំនៃ «ថ្ងៃទិវានៃក្តីស្រឡាញ់» គាត់តែងតែមករៀបចំតាំងផ្កាចម្រុះចាប់តាំងពីម៉ោង៨ព្រឹក នាថ្ងៃទីវាក្តីស្រឡាញ់១៤កុម្ភៈ។ ក៏ប៉ុន្តែឆ្នាំនេះ ក៏ដូចជាបណ្តាឆ្នាំមុន លក់ផ្កាក៏ដូចជាកាដូមិនសូវដាច់ប៉ុន្មាននោះទេ វាធ្លាក់ចុះច្រើន ហើយភាគច្រើនលក់ដាច់តែលើយុវជនតែប៉ុណ្ណោះ តែដោយសារស្តាយក្នុងការលក់ផ្កាជារៀងរាល់ឆ្នាំទៅហើយ ចេះតែមកលក់ៗទៅ ។
អ្នកស្រីបន្តថា យូរៗឃើញនារី និងបុរសម្នាក់ពីរជិះម៉ូតូមកទិញផ្កា ឲ្យរៀបចំកាដូមួយពីរ ពួកគេថា យកទៅជូនឱពុកម្តាយនៅពេលយប់ក្នុងពិធីជប់លៀងជួបក្រុមគ្រួសារក្នុងថ្ងៃទិវានៃក្តីស្រឡាញ់នេះ ។
ចំពោះយុវជន បញ្ញា ដែលជាសិស្សរៀននៅវិទ្យាល័យឯកជនមួយ ក៏បាននិយាយដែរថា ទិវានៃក្ដីស្រលាញ់នេះ មិនមែនជារឿងមិនល្អនោះឡើយ មិនល្អលុះត្រាតែអ្នកមិនបានយល់ច្បាស់ពីអត្ថន័យទិវានេះ។ មែនទែនទៅ ទិវានៃក្ដីស្រលាញ់ មិនសំដៅចំពោះគូសង្សារឡើយ តែសំដៅលើអ្នកទាំងអស់គ្នាដែលនៅក្បែរអ្នកដូចជា ក្រុមគ្រួសារ ឪពុក-ម្ដាយ, បងប្អូន, មិត្តភក្ដិជាដើម។
យុវជនរូបនេះបន្ដថា ប៉ុន្ដែទិវានេះ អាចប៉ះពាល់ដែរ ប្រសិនបើអ្នកទាំងអស់គ្នា ជាពិសេសបុរសៗឆ្លៀតយកឱកាសថ្ងៃ១៤កុម្ភៈនេះ ប្រព្រឹត្តអំពើមិនគួរគប្បីណាមួយចំពោះនារីភេទ ។ បច្ចុប្បន្នយុវវ័យកម្ពុជា យល់ដឹងច្រើនពីទិវានៃក្ដីស្រលាញ់នេះ បើចំពោះនារីភេទវិញ ប្រហែលជាមិនអាចចាញ់បោកការលួងលោមរបស់បុរសនោះឡើយ ព្រោះពួកគាត់ដឹងច្បាស់ថា ថ្ងៃនេះគ្រាន់តែជាថ្ងៃចែករំលែកក្ដីស្រលាញ់ចំពោះគ្រប់គ្នា មិនមែនជាការដោះដូរខ្លួនប្រាណ ដើម្បីបញ្ជាក់ក្ដីស្រលាញ់នោះឡើយ ។
បញ្ញា បានបញ្ជាក់ថា ចំពោះខ្ញុំអត់មានគម្រោងទៅណាទេ ព្រោះថា ថ្ងៃ១៤កុម្ភៈនេះ ជាថ្ងៃរៀនសូត្រធម្មតា ដូច្នេះខ្ញុំនឹងមកសាលារៀនប៉ុណ្ណោះ ” ។
បើតាមមន្ត្រីការិយាល័យអប់រំ យុវជន និងកីឡា ខណ្ឌដូនពេញមួយរូប ទាក់ទិននឹងទិវាថ្ងៃក្តីស្រឡាញ់១៤កុម្ភៈ នេះ បានថ្លែងថា ក្នុងខណ្ឌដូនពេញ មានសាលារៀនរដ្ឋ និងឯកជនចំនួន១៥ ហើយមន្ត្រីសាលាខណ្ឌដូនពេញក៏បានចុះផ្សព្វផ្សាយសេចក្តីណែនាំរបស់សម្តេចតេជោ ក្រសួងអប់រំ យុវជន និងកីឡា ក្រសួងវប្បធម៌ ក្រសួងកិច្ចការនារី ទៅដល់ស្រទាប់សិស្សានុសិស្សឲ្យយល់ដឹងពីអត្ថន័យទិវានៃក្តីស្រលាញ់១៤កុម្ភៈ ក៏ប៉ុន្តែតាមការសង្កេតឃើញថា តាមដងវិថីនានា និងតាមសាលារៀនរដ្ឋ និងឯកជន មិនដាក់តាំងលក់ផ្កាគគ្រឹកគគ្រេងនោះទេ គឺមានការថយចុះយ៉ាងខ្លាំង នេះដោយសារតែការខិតខំពីប្រមុខរាជរដ្ឋាភិបាល ក៏ដូចជាក្រសួងពាក់ព័ន្ធព្យាយាមធ្វើការផ្សព្វផ្សាយដល់ស្រទាប់យុវជនមុនពេលថ្ងៃនេះមកដល់ ។
ថ្ងៃទី១៤ កុម្ភៈ នេះដែរ គឺជាថ្ងៃនែក្តីស្រឡាញ់ ឬ Valentine’ Day ដែលពិភពលោកបានប្រារព្ធធ្វើឡើង។ ជាក់ស្តែងនៅថ្ងៃទី១៤ ខែកុម្ភៈ ឆ្នាំ២០២២នេះដែរ នៅក្នុងប្រទេសកម្ពុជារបស់យើង ក៏ដូចជាបណ្តាប្រទេសនៅលើសកលលោក ក៏បានប្រារព្ធថ្ងៃនៃក្តីស្រឡាញ់នេះដែរ។
គួរបញ្ជាក់ផងដែរថា រដ្ឋបាលរាជធានីភ្នំពេញ បានចេញសេចក្តីណែនាំ ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ-១៩ មេរោគបំប្លែងខ្លួនថ្មី ប្រភេទ «អូមីក្រុង» ស្របតាមវិធានការសុខាភិបាល និងដើម្បីធានារក្សាបាននូវទំនៀមទម្លាប់ វប្បធម៌ ប្រពៃណីដ៏ល្អផូរផង់របស់ជាតិខ្មែរ ស្របតាមសេចក្តីណែនាំលេខ ០៩ អយក.សណន ចុះថ្ងៃទី១១ ខែកុម្ភៈ ឆ្នាំ២០២២ របស់ ក្រសួងអប់រំ យុវជន និងកីឡា នៅក្នុងទិវានៃក្តីស្រឡាញ់ ថ្ងៃទី១៤ ខែកុម្ភៈ ឆ្នាំ២០២២ រដ្ឋបាលរាជធានីភ្នំពេញ សូមធ្វើការណែនាំ ដូចខាងក្រោម ៖
១- ហាមធ្វើសកម្មភាពជួបជុំប្រមូលផ្តុំក្នុងចំណោមសិស្ស-និស្សិត និងយុវជន-យុវនារីតាមគ្រប់រូបភាព នៅតាមគ្រឹះស្ថាន សិក្សាសាធារណៈ និងគ្រឹះស្ថានសិក្សាឯកជន ព្រមទាំងទីតាំងសាធារណៈនានា ក្នុងភូមិសាស្ត្ររាជធានីភ្នំពេញ ដែលអាចបង្កហានិភ័យខ្ពស់នៃការឆ្លងរាលដាលជំងឺកូវីដ-១៩ បំប្លែងថ្មី ប្រភេទ «អូមីក្រុង» ចូលក្នុងសហគមន៍ជាទ្រង់ទ្រាយធំ។
២- គណៈគ្រប់គ្រងគ្រឹះស្ថានសិក្សា លោកគ្រូ អ្នកគ្រូ មាតាបិតា និងអាណាព្យាបាលទាំងអស់ ត្រូវខិតខំធ្វើការអប់រំ ណែនាំ ដល់សិស្ស-និស្សិត និងបុត្រធីតាគ្រប់រូប ឱ្យគោរពនូវទំនៀមទម្លាប់ វប្បធម៌ និងប្រពៃណីដ៏ល្អផូរផង់ របស់ជាតិខ្មែរ ដើម្បីកុំឱ្យពួកគេមានការយល់ច្រឡំថា «ទិវានៃក្តីស្រលាញ់ ថ្ងៃទី១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួប រវាងគូសង្សារ និងដើម្បីចៀសវាងការប្រព្រឹត្តសកម្មភាពខុសសីលធម៌ផ្សេងៗ ដែលធ្វើឱ្យប៉ះពាល់ដល់សេចក្តីថ្លៃថ្នូររបស់ខ្លួនឯង គ្រួសារ-សាច់ញាតិ និងសង្គមជាតិទាំងមូល។
៣- ប្រគល់ភារកិច្ចជូនរដ្ឋបាលខណ្ឌទាំង១៤ មន្ទីរអប់រំ យុវជន និងកីឡា មន្ទីរវប្បធម៌ និងវិចិត្រសិល្បៈ មន្ទីរកិច្ចការ នារី និងមន្ទីរសុខាភិបាលនៃរដ្ឋបាលរាជធានីភ្នំពេញ ដើម្បីសហការចុះត្រួតពិនិត្យ តាមដាន ឃ្លាំមើល និងចាត់វិធានការជាបន្ទាន់ ចំពោះសកម្មភាពមិនប្រក្រតីទាំងឡាយណា ដែលអាចកើតមានក្នុងឱកាសទិវានៃ ក្តីស្រលាញ់នេះ៕
ចែករំលែកព័តមាននេះ