រាជធានីភ្នំពេញ៖ ឆ្នាំ២០២១ ការនាំចេញផលិតផលកាត់ដេរមានទឹកប្រាក់សរុបជាង១១,៣៨៩លានដុល្លារអាមេរិក កើនឡើងប្រមាណ ១,៥០៥ លានដុល្លារអាមេរិកស្មើប្រមាណជាង ១៥% បើប្រៀបធៀបនិងឆ្នាំ២០២០ ។ លោក…
រាជធានីភ្នំពេញ៖ ឆ្នាំ២០២១ ការនាំចេញផលិតផលកាត់ដេរមានទឹកប្រាក់សរុបជាង១១,៣៨៩លានដុល្លារអាមេរិក កើនឡើងប្រមាណ ១,៥០៥ លានដុល្លារអាមេរិកស្មើប្រមាណជាង ១៥% បើប្រៀបធៀបនិងឆ្នាំ២០២០ ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និយាយថាទំហំនៃការនាំចេញផលិតផល ក្នុងវិស័យកាត់ដេរកើនឡើងនេះ ជាសញ្ញាល្អសម្រាប់វិស័យនេះនៅក្រោយពីវិបត្តិកូវីដ១៩ ។
លោកថាវិស័យកាត់ដេរហាក់បានងើបឡើងវិញលឿនជាងនានា ។ ការងើបឡើងវិញនេះ សម្រាប់ប្រធានសម្ព័ន្ធសហជីព ខាងលើមានកក្តាជាច្រើន នៅក្នុងនោះបញ្ហាប្រទេសភូមាស្ថានភាពវិបត្តិនៅភូមាបានផ្តល់ឱកាសល្អសម្រាប់កម្ពុជាផងដែរ ។
ក្រៅពីបញ្ហានៅប្រទេសភូមាតាមលោកអាត់ ធន់ការរឹតបន្តឹងវិធានសុខាភិបាលការពារកូវីដ១៩ នៅប្រទេសវៀតណាម បានធ្វើឱ្យប្រទេសនេះពិបាក ក្នុងការនាំផលិតផលកាត់ដេរចេញទៅទីផ្សារអន្តរជាតិ ដែលបានបង្ករលក្ខណៈអំណោយផលដល់កម្ពុជាមួយផ្នែកទៀត ។
កន្លងមកមានការលើកឡើងថា នៅក្នុងអំឡុងពេលកូវីដ ១៩ នេះ មានរោងចក្រប្រមាណ ១៣០ បានបិទទ្វារ នៅក្នុងនោះក៏មានរោងចក្រតូចៗ ដែលទទួលការងារបន្ត(Sub Contract) ផងដែរ ដែលធ្វើឱ្យកម្មករប្រហែលជាជាង ២ ម៉ឺននាក់បានបាត់បង់ការងារ ក្នុងចំណោមកម្មករ ៥ ម៉ឺននាក់ ដែលក្រោយមកមួយចំនួន ទទួលបានការងារវិញពីរោងចក្រដែលបើកថ្មី ។ ជាមួយគ្នានេះ រោងចក្រដែលព្យួរគឺមានប្រហែលជាង ៥០ រោងចក្រ និងមានកម្មករប្រហែលជិត ២ ម៉ឺននាក់ ។
វិស័យវាយនភ័ណ្ឌកាត់ដេរ និងដេរស្បែកជើង គឺជាផ្នែកមួយដ៏សំខាន់ ក្នុងការជួយទ្រទ្រង់ដល់សេដ្ឋកិច្ចកម្ពុជា ។ វិស័យនេះមានប្រាក់ចំណូលរហូតដល់ ១១ ពាន់លានដុល្លារកាលពីឆ្នាំ២០១៩ ។
លោក អូនពន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករឆ្នាំ២០២១ លើកឡើងថា ឆ្នាំ២០២១ ទាំងការនាំចេញទាំងការនាំចូលសុទ្ធសឹងមានកំណើនល្អ ដែលឆ្លុះញ្ជាំងពីការងើបឡើងវិញ នៃសេដ្ឋកិច្ចរបស់កម្ពុជា ។ ការនាំចេញទំនិញវិស័យកាត់ដេរ មានកំណើល្អ ១៥% បន្ទាប់ពីធ្លាក់ចុះជាង ៨% កាលពីឆ្នាំ២០២០ ៕
ចែករំលែកព័តមាននេះ