រាជធានីភ្នំពេញ ៖ បុរសជាជនពិការគថ្លង់ម្នាក់ បានលង់ទឹកស្អុយស្លា.ប់យ៉ាងអាណោចអាធ័ម បន្ទាប់ពីផឹកស្រាស្រវឹង ហើយដើរទៅឈរលេងនៅក្បែរបង្កាន់ដៃស្ពានប្រឡាយទឹកស្អុយ រួចក៏បានរអិលជើងធ្លាក់ចូលទៅក្នុងទឹកលិចបាត់ប្រមាណជា២ម៉ោង បង្កឲ្យមានការភ្ញាក់ផ្អើលឡើងកាលពីវេលាម៉ោង១០និង១០នាទីយប់ ថ្ងៃទី១១ ខែកុម្ភៈ ឆ្នាំ២០២២ ត្រង់ចំណុចស្ពានបឹងសាឡាង តាមបណ្ដោយផ្លូវ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក។
ជនរងគ្រោះខាងលើមានឈ្មោះ ស៊ុយ សុជាតិ ភេទប្រុស អាយុ២១ឆ្នាំ ជាជនពិការគថ្លង់ ស្នាក់នៅក្បែរកន្លែងកើតហេតុ។
តាមសម្តីពីស្ត្រីជាម្តាយរបស់ជនរងគ្រោះ បានរៀបរាប់ប្រាប់ឲ្យដឹងថា ជនរងគ្រោះ គឺជាជនពិការគថ្លង់ ដែលសព្វថ្ងៃនេះជនរងគ្រោះរស់នៅក្រោមការមើលថែរបស់គាត់ផ្ទាល់។ ហើយនៅមុនពេលកើតហេតុ គឺជនរងគ្រោះបានអង្គុយផឹកស្រាជាមួយអ្នកជិតខាង បន្ទាប់ពីផឹកស្រាស្រវឹង ជនរងគ្រោះក៏បានដើរចាកចេញពីកន្លែងផឹកដែលនៅក្បែរផ្ទះរបស់ខ្លួននោះ ដោយក្នុងគោលបំណងរបស់ជនរងគ្រោះ គឺចង់ទៅដើរលេងនៅម្ដុំៗចំណុចកើតហេតុ ដែលជាកន្លែងជនរងគ្រោះឧស្សាហ៍ទៅលេងនាពេលកន្លងមក។
ប្រភពដដែលបន្តថា ខណៈពេលនោះ ដោយស្ត្រីជាម្តាយឃើញជនរងគ្រោះមានសភាពស្រវឹង ក៏ព្យាយាមឃាត់មិនឲ្យជនរងគ្រោះទៅ ប៉ុន្តែជនរងគ្រោះមិនស្តាប់នោះទេ រួចក៏បានដើរចាកចេញពីម្តាយបាត់ទៅ។
ប្រភពដដែលបន្តទៀតថា ក្រោយដើរចាកចេញពីម្តាយ ជនរងគ្រោះក៏បានទៅឈរលេងតែម្នាក់ឯងនៅមាត់ប្រឡាយទឹកស្អុយ ដោយឈរផ្អែកទៅនឹងបង្កាន់ដៃស្ពាន។ លុះដល់វេលាកើតហេតុ ដោយជនរងគ្រោះឈរផ្អែកចុះឡើងៗ ក៏ស្រាប់តែរអិលជើងធ្លាក់ចូលទៅក្នុងប្រឡាយទឹកស្អុយដែលមានជម្រៅប្រមាណ២ទៅ៣ម៉ែត្រនោះតែម្តង។ ភ្លាមៗនោះ ក៏មានប្រជាពលរដ្ឋនៅក្បែរកន្លែងកើតហេតុ បានឃើញ និងស្រែកឆោឡោឲ្យគេឯងជួយ ខណៈពេលដែលជនរងគ្រោះកំពុងតែស្រវេស្រវានៅក្នុងប្រឡាយទឹកស្អុយនោះ។ លុះបន្តិចក្រោយមក ជនរងគ្រោះក៏បានលិចចូលទៅក្នុងទឹកស្អុយបាត់តែម្តង ដោយប្រជាពលរដ្ឋបានត្រឹមតែផ្អើលនាំគ្នាមកចោមមើលតែប៉ុណ្ណោះ។
ប្រភពដដែលបន្តថា បន្ទាប់មកក៏បង្កឲ្យមានការភ្ញាក់ផ្អើលដល់សាច់ញាតិរបស់ជនរងគ្រោះ រួមជាមួយសមត្ថកិច្ចមូលដ្ឋានចុះមកធ្វើការអន្តរាគមន៍ និងបាននាំគ្នាធ្វើការរាវរកជនរងគ្រោះនៅក្នុងប្រឡាយទឹកស្អុយអស់រយៈពេលប្រមាណជិត២ម៉ោង ទើបរាវរកឃើញ និងបានធ្វើការស្រង់យកដាក់ខាងលើគោកវិញ។ ភ្លាមៗនោះដែរ សាច់ញាតិរបស់ជនរងគ្រោះក៏ព្យាយាមជួយសង្គ្រោះបឋមធ្វើចលនាបេះដូង តែជាអកុសលជនរងគ្រោះបានស្លា.ប់បាត់ទៅហើយ។
ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញ បានធ្វើការត្រួតពិនិត្យ ហើយបានប្រគល់ស.ពជនរងគ្រោះឲ្យទៅក្រុមគ្រួសារ ដើម្បីយកទៅចាត់ចែងធ្វើបុណ្យទៅតាមប្រពៃណីជាបន្តទៀត៕
ចែករំលែកព័តមាននេះ